2 SAMUELI 23 - BIBILLYA Mareiyo Meele a Iruva

Marero a Davidi emarisya

¹ Naasany yaa nng'u marero a Davidi eefurumya. Davidi mwana wa Yese aamba indi, Yeu aleipoiywa uwe mmbwe akeerera, Yeu mmwaambe mafura wa Iruva wa Yakobo. Mwiisongosya fiimbo fya Israeli fisennyi

² Mmumuyo wa Nndumi Iruva uleshikaya, Na irero lyakwe lyikakaa kaniny kyakwa.

³ Iruva wa Israeli mmbo alerera, We mbanga ya Israeli kashivia, Yeto mwishillya vandu kya usumanu, Kashillya na usumanu lwa Iruva.

⁴ Mmbo ashevakaa sa ya nkyeere kyeeri kya ngama Ngama ilatiri mafishi mmbo weende mooro urukeny Elyi weende mwi ukasorya mmbwa.

⁵ A Nndumi Iruva nshi indo alollye mmba yakwa? Elyi alevika neeny kyaasa kya llung'anu Uramba lwavayo llwa meeri moose. Llo ukiro lwakwa, llo shilulanngye.

⁶ Lyo nnyasherosaa vandu va tangalu-fo, Wo mmbo vashevaa sha miinga ya kasa. Ilavaa itira na maako.

⁷ Kwakooya nndu atira na woko Nkuti naipaane na minya Nawo nng'u kweni vasherumatywa mmuro. Vasikari va Davidi vatiri nnduma

Vasikari Vatakusu va Davidi

⁸ Na yaa nng'u marina a vandu vakaari va Davidi valya va fira. Ni Yashobeamu, Mhakmoni, nsongoru wa vashilyi, yeu mmbo eedima iwaa vandu mayana nyanya na ifumu we muni.

⁹ Ungyi ni Eleaseri mwana wa Dodai, mwahohi, yeu ni umwi wa valya vakaari vararu va Davidi. Kyeeri valearara Vafilisti naambo vakabe nawo vandu va Israeli wo mmbekiiyo-fo.

¹⁰ Eleasari kakupoo, kakaba Vafilisti kutani maako aaraa, katira usu nawe Nndumi iruva kanniinga uvingyi uniini nnu, na Israeli vakashesha numa yakwe ishetira findo.

¹¹ Numa yakwe kweifo Shama mwana wa Agee Mharari. Vafilisti mmbo venkusang'irya kulya Lehi, ireminy lya sosoko, Israeli vakarisha Vafilisti,

¹² lyo Shama kasalala yoo nnang'ani ya irema llya, kakabannya-u na Vafilisti kavawaa, Nndumi Iruva kanniinga uvingyi uniini.

¹³ Efo yeekeniny lya vandu makumi araru, vararu veesongoye vakasoka vakandevia Davidi, nakyo nkyeeri kya fimu fika Adulamu, na Vafilisti mmbo veemannyi ulale kulya imungony lya Varefai.

¹⁴ Na Davidi nawe nkulya turuveny eekai na vasikari va Vafilisti vakakaa Betlehemu.

¹⁵ Nkonu umwi Davidi kaamba, “A shoota kwi nndu ashininga mura wa kirori kya Betlehemu, kilya kifiitani na ngiri.”

¹⁶ Naasa vandu yewo vakaari vararu vakareka muu vakanderorova alya nnang'ani kavii ya Vafilisti valya, vakanderaa mura alya kiroriny kya Betlehemu kifiitani na ngiri, vakarwaya Davidi mura yeto, lyo nalakunde yuuna, kandeurwaa ando kwa yiinndya Nndumi Iruva.

¹⁷ Kaamba, “Oode Nndumi Iruva nshinaa mura yen-fo, mashika mura nkyimwi na samu ya vandu yewo vakureeka-u indo kya muu wawo.” Vandu yewo vararu vakaari niindo valetana.

¹⁸ Naasa Abishai mwanamaye wa Yoabu, mwana wa Seruya mmbwe yeto eesongoye yewo vengyi. Yeu mmbo aleepoo ifumu lyakwe kandekabana na mayana araru, kavawoo, katirany nnduma ngota yewo vengyi vavii.

¹⁹ A yeto nshi aletira irina ngota yewo vengyi? Kavikwany nave nsongoru waawo.

²⁰ Na Benaya nawe, we mwana wa Yehoyada, nndu nkaari wa kulya Kabseeli eke mwiitana findo finiini, nawe mmbo eedima iwaa miiso shinyaasi ivii ta Moabu, kookafo kandewaa miiso yeekee irininy kyeeri kya laura shiroo.

²¹ Kaidima iwaa Mmisri, nndu mwaasha eetiri ifumu, kantira kankaba na iriinga, kansoka ifumu elyo lyakwe kammbwaa nalyo.

²² Benaya niindo aletana, katira nnduma nawe nnang'ani ya valya vararu.

²³ Nnang'ani ya vandu valya makumi araru kawona nnduma lyo nshi sha valya vararu-fo.

²⁴ Nawe Asaheli mwanamaye wa Yoabu, ekee umwi wa valya makumi araru, na Eehanani we mwana wa Dodo, wa Betlehemu.

²⁵ Na Shama nawe, Mharodi na Elka Mharodi.

²⁶ Na Helesi, Mpeloni, na Ira, mwana wa Ikeshi, Mtekoi.

²⁷ Na Abieseri va kullya Anatoti, na Sibekai, Mhushati.

²⁸ Na Salmon, mwahohi, na Maharai Mnetofati,

²⁹ na Heledi mwana wa Baana, Muetofati, na Itai mwana wa Ribai wa vana va Benyamen va Gibea,

³⁰ na Benaya, Mpiratoni, na Hurai wa kulya ngyusokeny ta Gaashi.

³¹ Na Abieli, Mwarbati, na Asaweti, Mbarhumi,

³² na Eliaba, Mshalboni, na Yasheni na Yonatan,

³³ mwana wa Shama, Mharari, na Ahiamu mwana wa Shalali, Mharari,

³⁴ na Elifeleti mwana wa Ahasibai na Heferi, Mwaakati, na Eliamu mwana wa Ahitofeli, Mgiloni.

³⁵ Na Hesro, Mkarmeli, na Paarai, Mwarbi,

³⁶ na Igali mwana wa Natan, wa Soba, na Bani, Ngadi.

³⁷ Na Seleki, Mwamoni, na Naharai, Mbeeroti, mmbo veeipoo fisha fya Yoabu mwana wa Seruya,

³⁸ na Ira, Mwitri na Garebu, Mwitri.

³⁹ Na Uria Mhiti woose ando amwi ni vandu makumi araru na mfungare.