2 SAMUELI 22 - BIBILLYA Mareiyo Meele a Iruva

Kyiimbo kya Davidi Kya Itumbe

¹ Davidi eekilollya shaasa Nndumi Iruva alenkira maakony a Sauli na vakiduva vakwe vengyi, llyo aleimmbya Nndumi Iruva kiimbo kya marero yaa:

² Nndumi Iruva mmbwe mbanga yakwa na turuve yakwa na mwikira wakwa. Ee-da mwiikira wakwa.

³ Iruva ni mbanga yakwa, shimmbikye nsya mmbwe shinkusirye. Ngao yakwa na finya ya ukiro lwakwa, mmbwe kirishony kyakwa Mwiikira wakwa mmbo kwanshikira efo kinyaleny kyawo

⁴ Mmbo nshevaangaa Nndumi Iruva yeu asumani yiitikiswa. Llyo nsheawukaa maakony a vakiduva vakwa.

⁵ Mashika finya ta ufu mmbo tileshishingillya na finya ya uravi ikasheerese

⁶ Fiwoye fya ufu fikashoomwa Mireiyo ya ufu ikashiringitya

⁷ Efo ngatareny takwa mmbo shilevaanga Nndumi Iruva Yee, shafuuya Iruva wakwa. Nawe keeta unyanga lwakwa eke efo mmba yakwe. Kiiyo kyakwa kikaanga maarwiny akwe.

⁸ Llyo na uruka lulering'ina neererema neefo iruveeu kukasava-savaa Na irinyiswa kyeendwa ni unyafi lwakwe.

⁹ Nsu ukooka efo mmbweny yakwe ukarwa na uwe Muro ukooka kaniny kyakwe ukamamita Makaa akakangala.

¹⁰ Mmbo aleoloka ooka iruveeu kukooloka ireema yoo kwasi ya marende akwe

¹¹ Kasaama uwe ya kerubi karumbuka Yee, kashelollyo yoo uwe ya maaru avakye uraato.

¹² Kavika ireema lyindingitye lyivake yeema. Mura ukakusang'irya, nag'u mafishi a nginii-u. y

¹³ Makaa a muro akaatwa wuuka kulya seny ilya yekee mbee yakwe.

¹⁴ Nndumi Iruva mmbo aleende iruruma lyuuka iruveeu Neeto akee uwe ya findo fyoose karera

¹⁵ Keera mife, kavanyanyata, keende kimwii, kawombuta.

¹⁶ Llyo ukalollyo mura wa yeeve Kirembo kya ulana kikalollyo Elyi Nndumi Iruva alevakeemya Na uraato elo luleuka mmbweny yakwe.

¹⁷ Mmbo aleruma nrumi ooka uwe kashitira Kashaauwa efo mureny mwiingyi

¹⁸ Kashaauwa maakony a nkiduva wakwa atiri finya, Neevo vashisuuye Mashika mmbo veetiri finya ngota ukiva lwakwa

¹⁹ Vakashishingillya kyeeri kya ukiva lwakwa Lyo Nndumi Iruva kava mmbwe kirishyony kyakwa

²⁰ Kashaauwa kashivika ando kutiri mwaanya Kashikira kimmba aleshikunda.

²¹ Nndumi Iruva kashitannya kiinani na usumanu lwakwa Kashitaa shaasa shiletana mesha.

²² Mashika elyi shilesora shia yakwe Nta nshilelema Iruva wakwa-fo

²³ Mashika usumanu lwakwe mmbo lwekee mbee yakwa kyeeri kyoose Nang'u mavavaso akwe nta nshilearafo.

²⁴ Neeny shava nsaari kwakwe Shakwiisa shilasheeva nravi

²⁵ Nkyo Nndumi Iruva kashitaa kya usumanu lwakwa, Kashitaa shaasa shilentannya.

²⁶ Yeto mwiikutannya mesha mmbo kuntannyaa mesha. Kwa yeto nsaari kuveva nsaari.

²⁷ Na kwa yeto mwiikwilyisa kuve mweele, Na kweeto nravi kuve nnyaasi.

²⁸ Neewo vafote kuvaauwe Lyo yewo veekung'anisa kuvanyiise.

²⁹ Mashika elyi kukee taa yakwa, woi Nndumi Iruva Neewe Nndumi Iruva kushimikye shuuke ireeminy.

³⁰ Elyi kwasheekya shedima yeenda fireny, Elyi Iruva asheekya shaidima ikillya isimamba.

³¹ Shia ta Iruva mmbo tikee ta usumanu, Na kyaasa kyakwe kyikava kya dede We mmbwe ngawo yaawo woose yewo vanrishyaa

³² A mmbi yeto akee Iruva, kulore ni Nndumi Iruva muni? Mmbi yeto akeemmbaanga, kuuta Iruva weeru muni?

³³ Iruva mmbwe turuve yakwa ya finya. Neewo vamwiirikye kavateterya shieny yakwe.

³⁴ Marende akwa kaallwa sha a sarya, Kashisaleesa ando kwa uwe.

³⁵ Kashilosha shaasa shikabana fireny, Maako akwa akoommwa ura lwa minya.

³⁶ Neewe kwashisimba ngao ya ukiro lwakwa, Na ufoo lwafo lukashilela.

³⁷ Marende akwa kwaaniinga mwaanya Nta marende akwa nnyalerendeya-fo.

³⁸ Mmbo shilerishisa vakiduva vakwa, shavamamita Neeny nta shilawuye numa llya valekabwa

³⁹ Neeny shaveedima shavakaba, valaidimi ikaa-u Yee, vakawa yoo marendeny akwa.

⁴⁰ Mmbo kuleshivika nkanda nkaari wa fira, Valya vekeeshivingya kwavavika yoo si yakwa.

⁴¹ Yee, vakiduva vakwa kwavarishisa mbee yakwa, Naambo shifune deny yewo vashisuuye.

⁴² Vakavaanga Nndumi Iruva valalollye mwivaauwa, Vakavaanga Nndumi Iruva lyo nalavairikye.

⁴³ Shavavavara sha kiluulyi marendeny Sha mabwashi efo shia, shavanyanyata.

⁴⁴ “Kwaveshaauwa efo kweewo vekeesalala neeny, Kwashiringa naambo shishillye masanga. Na vandu veny vashe vasheshirunndya.

⁴⁵ Vandu veny veekunyiisye, Elyi valeeta mbony takwa Nawo vashiinndyaa.

⁴⁶ Veny nawo vafwe mirima, Wooke turuveny tawo vereremaa.”

⁴⁷ Nndumi Iruva mmbwe muni muu, Mmbwe mwarafumwa kaveva mbanga yakwa, Naitikiswa we Iruva akee mbanga ya ukiro lwakwa,

⁴⁸ Yee, Iruva mmbwe asheeka itaiya kiduva, Neevika vandu yewo si yakwa.

⁴⁹ Kashifumira poo vakiduva vashilollye, Yee, kashirosa mbee yeewo vakeeshivinngya, Kwashaauwa na vandu yewo va kinyala

⁵⁰ Naasa Nndumi Iruva mmbo nshekwaanaa masanga alollye, Neeny mmbo nsheimmbya irina lyafo.

⁵¹ Keenngye mangyi ukiro uniini, Kalyillya nsauwe wakwe Mmbwe Davidi na ufyari lwakwe fika llung'anu.