2 SAMUELI 21 - BIBILLYA Mareiyo Meele a Iruva

Vafyari va Sauli vawaawo

¹ Kyeeri Davidi ekee mangyi kwesha-fo shaa ando a myaaka iraru ikusorye. Davidi katereva Nndumi Iruva, nawe Nndumi Iruva kaamba nkimaruma kya Sauli, elyi ekee mwiwaa, na llya alewaa Vagibeon valya.

² Naasa mangyi Davidi kavaanga Vagibeon kavavia, (Vagibeon nshi udeena lwa Israeli-fo, ni udeena lwa Vaamori, na vana va Israeli mmbo veevikyani nawo kyaasa kya ufoo lyo Sauli kakunda ivawaa naambo naringe Israeli na Yuda).

³ Nawe Davidi kavavia Vagibeon yewo, “Shamutannya-ki ndesa naambo lukundani, naambo neese lwiirikyo ni Nndumi Iruva?”

⁴ Nawo Vagibeon vakammbia, “Nshi mbony ya sye ya fesa ao saabu ikee kitere kyeru na Sauli, ao mmba yakwe-fo, ao yese kive mmbo luwaiye nndu wa Israeli-fo.” Davidi kavavia, “Ekyo mushaambaa nkyo shimutannyaa.”

⁵ Nawo vakavia mangyi, nndu ulya alelureta neluvia mbony ta ilureta, naambo lulave na ando koose kwekaa kunu Israeli,

⁶ mmbo lwatereva lurammbikywa vandu vakwe mfungare efo vaniny vakwe neese lundevavaanika na irina lya Nndumi Iruva kulya Gibeon alya ifumbuny lya Nndumi Iruva. Mangyi kavavia, “Nkisha, shimurammbikyaa.”

⁷ Nalyo mangyi kalekea Mefiboshet mwana wa Yonatan akee mwana wa Sauli kimaruma kya kyaasa kya Davidi na Yonatan vevikyani kyaasa mbee ya Nndumi Iruva.

⁸ Kyeendi mangyi kaniinngya vana vavii va Rispa mfu wa Aya valya aleirya Sauli. Armon na Mefiboshet, na vana varaanu va Merabu mfu wa Sauli aleirya Adrieli mwana wa Barsilai, Mmeholat.

⁹ Yewo mfungare kavavika maakony a Vagibeon nawo vakandevavanika nrii-u mbee ya Nndumi Iruva, vakamamitwa indo. Nakyo nkyeeri kya fimu fya mbee fya nganu.

¹⁰ Nawe Rispa mfu wa Aya karaa makunnya kalala maweny uka elyo nganu tekeevewa kutani elyo mmbwa ilesha, nta nalelekeye ndeye nsanyiny ao mafisi kio ashelya minying'a ilya.

¹¹ Nalyo Davidi kashevywa shaasa Rispa mfu wa Aya, nka kishinga wa Sauli aletana,

¹² keenda kandeuta mafwa a Sauli na a Yonatan kulya Yabesh-gileadi, mashika mmbo valeyaiva kulya Betshani, llya Vafilisti valevavanika, llya valewaa Sauli kulya Gilboa.

¹³ Davidi keende-fo maffwa yoo a Sauli na a Yonatan, na alya engyi akasangirywa alya valevanikwa.

¹⁴ Vakanderika maffwa a Sauli na Yonatan kulya urukeny lwa Benyamen, kulya Sela kifuny kya ndeye Esopia, shaasa mangyi alevavasya. Kikasennya Iruva kavikya uruka elo mbora.

Fira na Masiingo a Vafilisti

¹⁵ Numa ya vayo kukashekwiipoo-se fira ya Vafilisti na Israeli. Nawe Davidi kandesoka na Gobu ando amwi na vasero vakwe, kandekabana na Vafilisti. Nalyo Davidi kaanguyo mfinya.

¹⁶ Naasa kweefo nndu umwi wa Varefai evaangwaa Ish-benobu na ifumu lyakwe lyeetiri kilo iinya indi, uroo lwa vayo, kaveraa na usu wiiya kisiny, kakunda iwaa Davidi.

¹⁷ Lyo Abishai mwana wa Seruya kamweekya iwaa mfilisti yeto. Nalyo vandu va Davidi vakalyiiya mboo vakammbia, “Ni dede nkukyendaa neese fireny-fo, naambo sa ya Israeli ilasheefwa.”

¹⁸ Numa ya vayo kukashekaa-fo fira ingyi ya Vafilisti na Israeli kulya Gobu, llyo Sibekai, Mhushati alewaa Safu, Mrefai.

¹⁹ Kukakaafo fira ingyi-da ya Vafilisti na Israeli efo Gobu, na Elhanan mwana wa Yairi nndu wa Betlehemu kawaa Goliati Mgiti, Kiri kya ifumu lyakwe mmbo kyeng'ani sha llo.

²⁰ Kukavekaa-fo-se fira ingyi-da kulya Gati, nafo kweefo nndu mwaasha deny, kavetira mini irindaru ya maako na irindaru ya marende, myoose mini makumi avii na iina, mmbwa ufyari lwa Varefai.

²¹ Eekyaarara Israeli, llyo Yonatan mwana wa Shaama, ulya mwanamaye wa Davidi, kammbwaa.

²² Yewo woose vaana mmbo veewonikye kwa Mrefai yeto wa Gati, vakawaawa ni Davidi na vandu vakwe.