2 SAMUELI 2 - BIBILLYA Mareiyo Meele a Iruva

Davidi Avikwa Mangyi ya Yuda

¹ Kiikiva indo Davidi kovesa Nndumi Iruva, “A sheenda muriny umwi wa Yuda?” Nawe Nndumi Iruva kammbia, “A ni ungau mmbee?” Kammbia, “Hebroni”.

² Naasa Dvidi kakupoo na vaka vakwe vavii, Ahinoamu wa Yezreeli, na Abikaili, ulya eekee nka wa Nabali wa kulya Karmeli.

³ Nawe Davidi mmbo alerwa nafo na vandu valya vakwe ekee nawo, nawo vekee na vandu va kyeny kwawo, vakandekaa Hebron.

⁴ Nalyo vandu va Yuda vakasora-fo Davidi vakandemwaamba mafura nave mangyi ya Yuda. Vakawuya vakavia Davidi, Ni vandu va Yabesh-gileadi valerika Sauli.

⁵ Naasa Davidi karika varumi kwa vandu va Yabesh-gileadi vandevavia, “Nndumi Iruva namuvikye mbora yeni vandu vakwe, kimmba muletannya mangyi yaany we Sauli kya wiindi mukamwaara.

⁶ Nawe Nndumi Iruva namuvikye mbora. Na yeny mmbo nshevemutannyaa mesha indo mashika elyi muletana fya usha.

⁷ Wareny finya, muveva vakaari mashika mangyi yaany Sauli alefwa, na Vayuda vakashaamba yeny mafura shive mangyi waawo.”

Ishboshet Avikwa Mangyi ya Israeli

⁸ Naasany Abineeri wa Neri ekee mwisalallya itorito va Sauli, mmbo embika Ishbosheti mwana wa Sauli nave mangyi ya Israeli, kanduuta neende Mahanaimu,

⁹ nandeshillya Vagileadi na Aseri na Yezreeli, Efraimu na Benjamen, na Israeli woose.

¹⁰ (Ishboshet kyeeri ekyi ekee wa myaaka makumi aana, kashillya ando a myaaka ivii nsi). Lyo Yuda wo vakalanga ishillyo Davidi.

¹¹ Na Davidi mmbo aleshillya kulya Hebron ando a myaaka mfungare na kyenga.

Israeli na Yuda Vakabana Fira

¹² Naasa Abineeri mwana wa Neri na Varundi va Ishboshet wa Sauli, vakooka mahanaimu veende Gibeon.

¹³ Nawe Yoabu wa Seruya na Varundi wa Davidi vakakupoo vakandekwaanannya alya iruveny lya Gibeoni yeva taari yei na yeva taari yei ya iruva llya.

¹⁴ Naasa Abineeri kavia Yoabu, “Lweekeye vana-te lulole shaasa vatavaa.” Yoabu kammbia, “Nkisha.”

¹⁵ Naasa vakakupoo vakaeenda taari ilya ingyi yeekyena lyifye sha llya vandu ikumi na vavii va Benyaminy mmbo va Ishboshet mwana wa Sauli, na vandu ikumi na vavii va varundi va Davidi.

¹⁶ Vakakutira wo nndu kawara urooye nrwe neekapa usu yoo uvariny marama, nawo vakawa si woose. Ando alya akavaangwa ni “Ando a Ngyusu,” Helkat-hasurimu nafo Gibeon.

¹⁷ Fira yeyo mmbo ilenyaasya nnu nkonu yeto. Abineeri kavingwa we na vandu va Israeli, vakavingwa varundi va Davidi.

¹⁸ Nawo vana Vararu va Seruya mmbo veefo, nawo, ni Yoabu na Abishai na Aseheli. Aseli yeu ekee nndu eerishaa sha sarya.

¹⁹ Naasa kasora Abineeri kulore aleangya kunu ao kulya.

²⁰ Abineeri kainduka kallola elyi efo ansoraa, kammbia, “Nnyewe-ro woko usha ao woko umuso, kundesoka nsoro umwi yoo fisha fyakwe.”

²¹ Lyo Asaheli nnyaleirikya ira insorafo.

²² Abineeri kammbia lya kavii, “Kulashisore-fo, indukya kulya. Nkimaruma-kyi shikuwaa? A mmbo shekarya inda iwaa mwanamau Yoabu?”

²³ Lyo we Asaheli kalema yiinduka, llyo Abineeri alenkaba n kitota kya ifumu yoo ndeu, kikandefuma neefo mungo, kafiiya-u kweni. Na wo nndu ekeefika yoo Asaheli alefiyya kasalalau mbele.

²⁴ Naasa Yoabu na Abishai vakasora Abineeri, veefikaa ifumbuu, lya Ama kukeela, mfo taari ya Gia kuleenda na Gibeon.

²⁵ Na vana va Benyaminy vakakusang'irya veeteterwaa ni Abineeri, vakava ironda lyimwi, veeselelyi uwe ya kidooro.

²⁶ Llyo Abineeri alevaanga Yoabu, kammbia, “A usu mmbo lulyaa vandu wo nkonu? Kwiishi nkindo kivavaa-se? A niinda kulashiidimaa yiima vandu ikabana na vana vamaye vawo?”

²⁷ Na Yoabu kammbia, “Kya dede ya Iruva akee na muu, kure kularera vandu vakwa mmbo veevingyaa yewo vafo fika ndesi.”

²⁸ Llyo Yoabu alekaba iranda, vandu vakwe vakasalala, valakilatye-se Israeli, nta valakikabana-se.

²⁹ Abineeri na vandu vakwe vakakupoo kio kilya vakeenda nnang'ani ya Araba vakakyilya Yordan vakeera yoo nnang'ani ya Bitron vakandefika Mahannaimu.

³⁰ Yoabu nawe kara ilatya Abineeri kawuya. Eekimaa isang'irirya vandu woose, varundi valya va Davidi vandu ikumi na keenda sanda na Asaheli.

³¹ Vandu va Davidi mmbo venkaba vandu va Benyaminy na va Abineeri vakafwau vandu mayana araru na makumi arindaru.

³² Asaheli kanderikwa mbangeny ya ndeye kulya Bethlehemu. Yoabu na vandu vakwe vakeenda kio kyoose kukandekya vekee Hebron.