2 SAMUELI 13 - BIBILLYA Mareiyo Meele a Iruva

Mbony ta Amnoni na Tamari

¹ Mwana wa Davidi Absalomo mmbo eetiri mfwamaye nsha nnu, evaangwaa Tamari. Nawe Amoni mwana wa Davidi kallanga.

² Amnoni kalanga Tamari kutani kyallweesa nawe Tamari nta nnyeishi nndumi-fo, mashika nnyeesomukya-fo.

³ Nawe Amnoni mmbo eetiri mbuya yakwe irina lyakwe ni Yonadabu wa shama eekee mwanamaye wa Davidi. Yonadabu yeu mmbo ekee nndu nnrango deny.

⁴ Naasa kavia Amnoni, “A nkikyi elyi kulatiri ifura ewe nsoro wa mangyi? Nkyeshivia-te” Amnoni kammbia, “Mmbo shikundye Tamari wa mwanama Absalomo nnu.”

⁵ Yonadabu kammbia, “Lala kitareny kukunang'are sheelyi kuloe, nawe ndoo kyeeri ashekusaiyaa, kuntereve Tamari, kummbie Nasheshisongosia nkate, na shoonga nakore nashiniinge.”

⁶ Naasa Amnoni katana indo, kakunang'ara sheelyi mmbo allwaa, na kyeeri mangyi aleshensaiya kammbia, “Vavasya Tamari nasheshisongosiya nkate neeshikorya shoonga nashiniinge.”

⁷ Nalyo Davidi karuma nndu kwa Tamari nammbie, “Enda kulya kwa Amnoni mwanamau, kundenkorya shoonga.”

⁸ Nalyo Tamari keenda kwa Amnoni, kankooya eelele. Koondwa nswa kansongosya kakaara mikate.

⁹ Kanrwaaya na nndeeva wa vayo, lyo kalema ilya. Amnoni kaamba, “Somuteny mbele vandu woose wooke yaa. Vandu woose vakasomuka.

¹⁰ Amnoni kavia Tamari, Nkyesheengye shoonga na kunu kiryeny kyeelala.” Tamari keepoo mikate ilya keengye Amnoni kulya mmba.

¹¹ Eekimaa yeende, Amnoni kantira, kammbia, “Osho lala neeny, mfwamaye akwa.”

¹² Tamari kammbia, “Oode, nkivaa-fo mwanama, ra kulashitire na finya-fo, mashika kindo kya ngata yei nkivaa kitanyike kunu Israeli-fo. Mmbo kivaa kindo kya utondo deny kwatana indo. A mmbo ntanaa inda na sony yeyo?

¹³ Neewe mmbo kuvaa umwi wa vandu varung'ani kunu Israeli. Naasa enderera mbele na mangyi, nnyakwiimaa kulashoore-fo.

¹⁴ Lyo we nnyaleirikya kilya ekeemmbia-fo, nalyo kallyimba finya kalala nawe.

¹⁵ Amnoni amaa itana indo kasukyo ni Tamari kamuswa nnu deny, mmbo alemuswa indo kyeelanya lango ilya alellanga. Naasa Amnoni kamumbuta kammbia, ‘Kweete, nka kwakwa.’”

¹⁶ Nawe Tamari kammbia, “Nkyikivaa-fo, mashika ukasha elu lweeshuumbuta mmbo lwang'ana ngota ukasha elo kwashitannya.” Lyo Amnoni nnyalemwaarannya-fo

¹⁷ Amnoni kavaanga mwiirundya efo kwakwe kammbia, “Nkyensomute nooke kwakwa nka yeu, kuraye na mwaango.”

¹⁸ Nawe Tamari mmbo eree soori shaasha sha kansu, mashika nto soori vana va kika va kimangyi veraa, valya valaishi womi. Nndundi ulya kansomuta, karaya mwaango.

¹⁹ Tamari kakoolya ifu nrony, kookafo karandwa soori yeyo yakwe shaasha, keekera maako nrony keenda effwa.

²⁰ Naasa Absalomo Kammbia, “Amnoni mmbo alelala neewe? Naasa kusye-do kularovyo nnu nriminy-fo.” Nalyo Tamari kakaa kwa mwanamaye Absalomo eesokyo mfyoova nnu.

²¹ Kyeeri mangyi Davidi aleeta mbony yeto mmbo alesswa nnu deny.

²² Lyo we Absalomo nnyalerera na Amnoni nta kindo kyimwi-fo, kive kya usha ao kya ukasha, kimmba Amnoni aleafinya mfwamaye Tamari nawe kamusua deny.

Absalomo Atayya Kiduva

²³ Kwiikirau myaaka sele, Absalomo ekee veesema moonri mafwaa kulya Baal-hasori ukee muri wa Efraimu, kavaanga nafo vana va kimangyi woose ifureny.

²⁴ Absalomo kasheya mangyi kammbia, “Mmbo shakuvaanga mbee, yeny ishinga lyafo mashika shambika sukukuu na veesama moonri mafwaa.”

²⁵ Nawe mangyi kammbia. “Nkivaa indo-fo mwanakwa mmbo lushekurovyaa mmwasi.” Absalomo kalelemba mangyi deny, lyo we kalema fushu, lyo kankunndya mesha.

²⁶ Naasa Absalomo kavia mangyi, “Kyasia kwakooya kulashaa yewe, lyo shakutereva Amnoni nashe.”

²⁷ Mangyi kammbia, “A nkyiki we elyi ashaa?” Absalomo kallelemba deny, nawe mangyi keeleleka keerikya Amnoni neende.

²⁸ Absalomo kavavasya varundi vakwe kavavia, “Kyeeri Amnoni anangwaa, neeny shimuvie kapeny Amnoni, llyo mumbwae, mulairyae-fo, mashika nnyeny shamuvavasya indo. Lyo veny vakaari mukaarye deny.”

²⁹ Nalyo varundi va Absalomo vakatana shaasa Absalomo alevavia. Naasa vana vakimangyi vakasaama wo umwi nshungu wakwe vakarisha.

³⁰ Elyi veefo vare shia mbony tilya tikafikya Davidi, kyeaamba, “Absalomo mmbo ambwaa vana valya vakimangyi woose, kulasae-u nta umwi.”

³¹ Mangyi llyo kakupoo karandwa soori takwe kafulukyo, kakwaala-la si, vasero vakwe vakashekuumbya yoo akai na soori tawo vammaa itirandwa.

³² Yonadabu wa Shaama akee mwanamaye wa Davidi kaamba, “Mangyi nalasheekusara vana va kimangyi woose vamfwa dede, woode ni Amnoni muni afwa. Nakyo ni Absalomo alekitana kyeendo ni llya aleafinya mfwamaye Tamari.

³³ Kyasia mangyi nalasheawukwa nnu-fo, eekusaraa vai vana va kimangyi woose mmbo vamfwa, ni Amnoni muni.”

³⁴ Naasa Absalomo karisha kandoovya, na nsero ulya mwinringa kalollya vandu vakeesha na kulya akai.

³⁵ Llyo Yonadabu kandevia mangyi, “Akavalya vana va kimangyi vansha, shaasa shilekuvia, mangyi.”

³⁶ Amaa irera nawe indo nawo vakaafukya, vakapooka iffwa, na mangyi na kasanga nawo kyikava kiiyo kiniini nnu ando amwi na vasero va mangyi woose.

³⁷ Lyo Absalomo enrisha kandefika kwa Talmai mwana wa Amihuri akee mangyi ya Geshuri. Mangyi Davidi kaiya kya mwana wakwe Amnoni wo nkonu.

³⁸ Naasa Absalomo karisha fika Geshuri kakaa-fo myaaka iraru.

³⁹ Mangyi Davidi kalanga isora Absalomo mashika elyi emeenda irekywa kya ufu lwa Amnoni.