2 SAMUELI 11 - BIBILLYA Mareiyo Meele a Iruva

Davidi na Batsheba

¹ Kyeeri kya mwaaka mwiiya vamangyi vashendaa fireny. Davidi karuma Yoabu na vasongoru vengyi, na Israeli woose veende vandemamita vana va Amon neetira muri wawo wa Raba. Lyo Davidi we kasaa kyeny, Yerusalemu

² Kyeeri kya nkwaany Davidi kooka kitareny elyi eelele, kasaama kulya uwe ya mmba ya mangyi. Eefo kulya vidi na uwekalollya nka akeekusangya koose. Nka yeu mmbo ekee nsha nnu deny.

³ Nawe Davidi kandevesa mbony takwe. Nalyo nndu umwikammbia, “Yeu nshi Batsheba, mfu wa Eliamu, nka wa Uria, Mhiti?”

⁴ Nalyo Davidi karuma vandu vakandemweende, kamwaata kwakwe, kakaa nawe (kimmba emmiita). Naasa nka ulya kawuya na kyeny.

⁵ Nawe nka ulya kakufinga, karuma nrumi kavia Davidi, “shikufingye.”

⁶ Naasa llyo Davidi aleruma nrumi kwa Yoabu, kammbia, “Nkyeruma Uria, Mhiti nashe yaa.” Nawe Yoabu karuma Uria kwa Davidi.

⁷ Kyeeri Uria aleenda kwa Davidi kambesa mbony ta Yoabu na ta vandu vengyi na ta fira,

⁸ Nalyo Davidi kavia Uria, “Kweengye mbele kyeny, kundekusangya, nawe Uria kooka alya kwa mangyi, kanrikya shoonga.”

⁹ Lyo we Uria kalala alya mwaangony wa mmba ya mangyi ando amwi na vasero vengyi va mangyi, nalakunde yeenda kyeny.

¹⁰ Llya vandu valevia Davidi sheelyi Uria nnyaleenda kyeny, Davidi kavaanga Uria kammbia, “Kulooka kyaaro-se? Nki kilekwiima yeenda kyeny?”

¹¹ Nawe Uria kavia Davidi, “Isanduku lya mavavaso na Israeli woose, na Yuda woose, na Yuda woose nkulya ulaneny vakai, na nsongoru wakwa na vasikari nkulya imungony vamannyi ulale, vai neeny sheende kyeny shindelya na ina neekukaya na nka wakwa? Woi mangyi wakwa nshishiidimaa itana kindo kya ngata yeyo-fo.”

¹² Naasa Davidi kammbia, “Irisha yaa inu na ndesi, llyo shikusameeny kukweengye.” Nalyo Uria kakaa alya nkonu ulya neelyi lya ndesi.

¹³ Nawe Davidi kambaanga nalye nawe shoonga, kalya, neena kanangwa. Kyeeri kya nkwaany kakupoo kandelala na vasero va nndumi wakwe, nta naleende kyeny.

¹⁴ Elyi lya ngama Davidi kareiya Yoabu barrwa, kairika Uria nanrwaaye.

¹⁵ Efo barweny yeyo kareiya-fo indi, “Vikeny Uria yoo fira ikee shinyaasi deny, muuke-u, munreeye naambo nawaawa.”

¹⁶ Nkyo kyeeri Yoabu ekeengya muri ulya nandeukaba, kavika Uria alya alemanya vakiduva vakaarye deny.

¹⁷ Vakiduva vakasha na finya vakakabana na vasikari va Yoabu, vandu va Davidi maata vakawaawa, Uria ekee umwi waawo.

¹⁸ Llyo Yoabu alerumya Davidi mbony eembyaa mbony tafira shaasa tava,

¹⁹ Eerumaa nndu kammbia, “Kyeeri kumaa ivia mangyi mbony eti toose ta fira,

²⁰ na kwakooya mangyi arooyo nngoo na yaamba, ‘A nkiki elyi mwaanga muriny yeto indo, a mmbo kulore mwamanya sheelyi vashaasaa mife neefo isimambeny?

²¹ A mmbi alewaa Abimeleki mwana wa Yeru-besheti? Nshi nka ulya alemweerya songoro ya isewe yuuka na isimambeny? Nawe kafiiya alya Tebesi? Nkiki elyi mweenda kufii na isimamba indo?’” Llyo kumbie, “Naako ni nsero wafo Uria amfwa-da.”

²² Nawe nrumi ulya keenda kandevia mbony toose shaasa arumwa ni Yoabu.

²³ Nrumi ulya kavia Davidi. “Vandu yewo mmbo valelulyimba finya, mashika mmbo valelusora fika kyaandaany lukawaana nawo fika ngiriny ya muri.

²⁴ Absalomo kasheya mangyi kammbia, ‘Mmbo shakuvaanga mbee, yeny ishinga lyafo mashika shambika sukukuu na veesema moonri mafwaa.’”

²⁵ Nawemangyi kammbia. “Nkivaa indo-fo mmbo lushekurovyaa mwasi. Absalomo kalelemba mangyi deny, lyo we kalema fushu, lyo kankundya mesha.”

²⁶ Nka wa Uria ekiita mmi wakwe amfwa, kaiiya-nnu kya mmi wakwe.

²⁷ Ekimaa kiiyo, Davidi karuma nrumi nandeondowa, neendwa kyeny kwakwe kava nka wakwe; kammbonnya mwana wa kyuumi. Lyo mbony yei Davidi etana nnyesennya Nndumi Iruva-fo.