2 SAMUELI 10 - BIBILLYA Mareiyo Meele a Iruva

Davidi Avinga Vaamoni na Vaashuru

¹ Naasa elyi numa mangyi ya Vaamoni kawa, Hanuni mwana wakwa kashillya ando akwe.

² Davidi kaamba., “Mmbo shitanyaa Hamu ni mesha. Shaasa na ndeye aleshitannya mesha. Naasa Davidi karika varumi vakwe vandembiirya muu kimaruma kya ufu lwa ndeye.” Vasero va Davidi vakandefika urukeny lwa vana va Amon.

³ Lyo vasongoru wa vana va Amon vakavia Hanuni nndumi waawo, “Mmbo kwakusara Davidi mmbo atira wiindi kwa ndoo elyi akurumya veekuviirya muu? Davidi nshi aruma vandu yeva-se naambo vashelola muri naambo numa vasheulyamara?”

⁴ Nawe Hanuni eeta indo kawarya varumi valya va Davidi kawoota nguyo kyenga, karumbwa soori tawo tikava fyenga tikarwa yoo kisiny, kawoombuta vakeenda.

⁵ Kyeeri vandu valefitya Davidi mbony yeto, Davidi karuma vandu vandevaambya, mashika vandu yewo mmbo valesuka deny kya filya valetannyo. Mangyi kavavia, kaeny efo Yeriko kutani nguyo tany taorya lyingi, llyo muwuyeny na kunu.

⁶ Nawo vana va Amon veekilollya ekyo valetana kyamba kindo kikavaa kwa Davidi, vana va Amon vakanderuuya va Siria ya Betrehobu na Vashuri va Soba, vafirikye fiku makumi avii, na mangyi ya Maaka arye vasikari kiku, na vandu va Toba, fiku ikumi na fivii.

⁷ Davidi eekimanya karuma Yoabu, na vasikari vakwe vakaari.

⁸ Vana va Amon vakasomuka vakashekudeesya yoo kufii na ngiri ya muri, na Vashuri va Soba, na va Rehoba, na vandu va Toba, na va Maaka, vakakaa kyaandany,

⁹ Naasa Yoabu eekilollya vakiduva va fira mmbo vakee mbee na numa, kasauwa vandu vakari maata va Israeli, kavavika vakabani na Vashuri,

¹⁰ Na valya valesaau kavakaarisa kavarambikya Abishai, we mwanamaye wo vakohane na Vaamoni.

¹¹ Kaamba, “Kwakooya Vashuri vanyaasya nnu, llyo kusheshitarama, na kwakooya vana va Amon vanyaasya mmwasi neeny shikutarami.

¹² Lyo va nkaari, lukuvike ukaari kimaruma kya ikira vandu veru, na Iruva weeru, nawe Nndumi Iruva nalutanyi ekyo kyansenya.”

¹³ Naasa Yoabu na vandu vakwe vakaserikya ikabana na Vashuri, nawo vakafunwa vakarisha.

¹⁴ Llya vana va Amon valelollya Vashuri vanrisha, nawo vakarisha yoo mbee ya Abishai, varishya kulya muriny. Nalyo Yoabu kulya kwa vana va Amon keenda Yerusalemu.

¹⁵ Vasikari veekilollya vambingwa ni Israeli, vakakuumba lyingi-da.

¹⁶ Nawe Hadadezeri kandevaanga vasikaria valya vekee kwakulya ya mura, vakasha alya Helamu, na Shobake ekee nsongoru wa vasikari va Hadadezeri kavasongosya,

¹⁷ Kyeeri Davidi alefityo mbony yeto kasanyirya Israeli woose, karuuka Yordan kasha Helamu. Na vasiria vakakudeesya ikaba na Davidi, vakakabana nawe.

¹⁸ Vashuri vakarisha mbee ya Israeli, nawe Davidi kawaa vasikari va Vashuri va magari mayana mfungare, na vasaamye frasi fiku makumi aana, nawe kakaba Shobaki yeto ekee nsongoru wa vasikari vawo, kambwaa.

¹⁹ Nawo vamangyi woose yewo vekeekya Hadadezeri vekilollya Israeli vambavinga, vakakunda ufoo na Israeli, vakava mashinga awo. Naasa uka lyo Vashuri mmbalekikarya yeekya Vaamoni-fo.