1 Vatesalonike 3 - BIBILLYA Mareiyo Meele a Iruva

¹ Naasa kyikeeny indo, lwiikyilemwa isisirya mmwasi, lukalollya nkyeni lurewa Atene yese luveni.

² Lukaruma mwanamaye weeru Timoteo akee nndundi wa Iruva mwiirundya Nrumi ya Nsia ya Kristo, naambo namuvangise neemuviiryaa muu kikusiryony kyany;

³ kulave nndu asavaa kimaruma kya ngatara eti, mashika lyo yeni muveni mwiishi sheelyi mmbo tiluvereye.

⁴ Mashika kyeeri lweekee kwany mmbo lwesongwa imuvia sheelyi ngatara tisheshaa, nakyo kikaveva indo, mukamanya.

⁵ Nkyo kimaruma kyeeri shilelemwa isisirya mmwasi, shileruma nndu nashemusaiya nalole kyikusiryo kyany, kulakooye nkumbi ashemweesa, yeni na usisiryo lwany luve ruu.

⁶ Kyaindi kyeeri Timoteo alesha auka kwany, mmbo alelweengye mbony shisha ta kyikusiryo kyany, na ta ukundi lwany, kaveluvia shaasa mukee ilukumbwa nisha nkonu simu, na ilanga nnu ilulollya shaasa neese lulangye imulollya.

⁷ Kyimmba ni indo vanavama, kya mbony yeto tany mmbo lulewuiyo nnu mmuu, lla elyi lweetirwa nngatara shiroo, kyikusiryo kyany kyikafweera fyoose.

⁸ Yese mmbo lukee na muu kwankooya neeni muselelyi kwa Nndumi.

⁹ A ndesa nkyoki lushidimaa itaa Iruva kive kyaanu kimaruma kya kyikusiryo kyany mashika a ifura lyilutiri mbee ya Iruva weeru?

¹⁰ Kio na nsanyiny mmbo lukeetereva Iruva naambo lwiidimi imulollya, na iishurya-u fyilya fyaanguye-u efo iirikyony lyany.

¹¹ Naasany we Iruva Nde weeru muni, na Nndumi weeru Yesu namusongoye shia naambo lushe kwany.

¹² Nndumi namuvangise na imwengerya ikunda muveni na veni na kwa vengyi woose, shaasa neese lumukundye;

¹³ naambo navangise mirima yaany ikae ikee mivaramise ilatiri kyiteve mbee ya Iruva, Nde weeru, ivereye isha lya Nndumi weeru Yesu ando amwi na veele vakwe woose.