1 VAMANGYI 7 - BIBILLYA Mareiyo Meele a Iruva

Solomon atana mmba ya Kimangyi

¹ Solomon katana mmba ya kimangyi, myaaka ikumi na uraru kaimarisya.

² Lyingi-se katara mmba yevaangwa mmba ya miri ya Lebanoni waasha lwa 44 ivari lya mita 22 na mita 13.5 isaama na uwe. Yetiri misafwa iraru ya ngo ta mieresi, ngo eto tikasiikwa na fisingiti taari ya uwe.

³ Wo safu yetiri ngo teesiika

⁴ Wo isimamba lyetiri safu isaru ta matirisha.

⁵ Myaango myoose na matirisha mmbo etiri fyeeko amwi na fisingiti ekee mavike safu isaru wo taari.

⁶ Katana ngiri itiri waasha lwa mita 22, ivari lyitiri mita 13.5 kimangya kyikasiikwa ni ngo.

⁷ Solomon katana kiria kyingyi kya umangyi ikawaangwa mmba ya ileta vandu mmbo yetano na mbau ta mieresi tikeshiseleese kupookya-si kufike marerony uwe.

⁸ Solomn katana mmba yakwe kufii na mmba ya ileta vandu. Katana mmba lingyi sha ilya yakwe sheni ikawa ya nka wakwe mfu ulya wa mangyi ya Misri.

⁹ Mmba eti shoose mmbo tekeshitani na mawe kupookya nsuka wa vayo kundefika uwe. Mawe mmbo ekee marummbwe na nsiminu na ipashwa akavovya taari shoose mmba na kipoo.

¹⁰ Nsuka mmbo wekee ntani na mawe maniini madesye nisha, mawe a mita 3.5 fika mita 4 waasha lwa vayo.

¹¹ Kulya uwe kukavikwa-fo mawe akee marummbwe akairana amwi na mbau ta mieresi.

¹² Mmba ilya ya kimangyi, na ngiri ya mmba ya Iruva amwi na mwaango ulya weyaanga efo mmba ya Iruva mmbo tekeshitani na mbau ta mieresi tikasoryo ngamba isaru ta mawe mapashe.

Ishora lya Hiramu

¹³ Mangyi kuruma nrumi kwa nndu umwi avaangwa Hirimu. Nndu mfuru eeshi mashora a ipasha arera wa kulya Tiro.

¹⁴ Ndeye wa nndu yeu nawe ekee mfuru mwipashaareera, nndu wa efo Tiro, indi ulaalu alemfwa. Maye mmbwa ufyari lwa Naftali. Nndu yeu kairikya uvaango lwa mangyi Solomon kya mashora yaa.

Ngo Ivii ta Arera

¹⁵ Hirimu kasongosya ngo ivii, wo imwi itiri mita 4 yeenda uwe, ikatira mita 5.5 ifumba lya vayo efo nnang'ani tikava na mooro wa mini ivii ya woko.

¹⁶ Naasany kandesongosya ngyureto ivii ta arera lumwi lutiri mita 2.25 yeenda uwe kativika uwe ya ngo tilya.

¹⁷ Uwe ya ngo tilya kandevika-u ngyureto shoooke nisha nnu ngyureto ta arera.

¹⁸ Keengera-se isongosya ndunda ta ngata ya makomnnga karingitya ngyureto tilya safu ivii ya uwe ya ngo tilya.

¹⁹ Ngyureto tilya tekee uwe ya ngo tilya ivii yoo mbee ya kiri kilya keimuya tikashopwa na fivaro fya nyungiyungi fya waasha lwa yeenda mita 1.75.

²⁰ Ngyureto eto mmbo tekee uwe ya ngo tilya tiringitye. Kweiyo na mafwanu mayana aana a ndunda ta nkomamanga safu ivii tikaringitya ngyureto tilya.

²¹ Hirimu kavika ngo tilya efo kirieny kya mmba ya Iruva, ngo aleisumya taari ya sinde yevaangwa Yakini, na ilya aleisumya taari ya ndoo ikavaangwa Boasi,

²² Yoo uwe ya tilya kukashopwa-u na fivaro fya myungiyungi. Mashora alya a isongosya ngo tilya akasya.

Itangyi lya arera

²³ Hiramu kasongosya yoondi lya mura lyikuringitye lyitiri ivari lya mita 4.5 ukya mbai kufike mbai; lyikatira mita 2.25 waasha kuleringitya ni mita 13.5.

²⁴ Sumbai yoondi elyo lyikaringityo na ndivi ta arera safu ivii wo imwi itiri mita 13.5 nato ndivi eto mmbo tilesongosyo ando amwi na yoondi llya.

²⁵ Nalyo yoondi mmbo lyekee ivikee ya mafwanu a shau shiniini ikumi na ivii; isaru tilolye na taari ya ndoo, isaru tikalala taari ya nkwaany na taari ya sinde na tingyi isaru tiilollye taari ya ngama. Yoondi elyo lyikaekyerwa uwe ya shau eto lyikakyikyiswa yoondo kyisi nnang'ani.

²⁶ Nkukufa va vayo wekee mini iraru, (sentimita 7.5) nato weevekye nkukufa wa kikombe au sha kivaro kya nyunguyungi. Nalyo lyeshidima yiishwa lita fiku makumiaana ta mura.

Makari A Arera

²⁷ Na lyingyi Hiramu kasongosya mitika ikumi ya arera; wo lyimwi litiri mita 1.75 waasha, mita 1.75 ivari na waasha lwa yeenda uwe mita 1.25

²⁸ Makari yaa mmbo ekee matani indi: Teifo minya shipala teyaala-si tikafingyo-fo na minya ta mitarimbo uwe ya vayo.

²⁹ Kavika-fo mafwanu a miiso, shau na mafisi engyi atiri maaru ando amwi na mburumburu ta minya tikatuulyo.

³⁰ Wo ikari mmbo lyetiri fireto fiina fya arera nafyo fyoose fikavikwa nsumari nniini wa arera. Wo ndumba ya ikari elyo kukavikwau minya ya arera yesiika ando kwevika birika tikeeshishope nisha, amwi na mburumburu ta minya tikatullyo.

³¹ Kukavikwau mfiniko wa kiringitya uwe ya birika ilya, utiri kisooro kya sentimita 45 enda na uwe na sentimita 18 yooloka-si kikava kiringitye na malomilomi.

³² Fireto fya sentimita 66 fikavikwa nsumari nniini fikafingyo efo ikariny nafyo fikanangya-fo fikava kindo kimwi.

³³ Fireto efyo fikavaka fireto fya ikari lya ng'umbe. Nafyo fikava mmbo fikefisongosye na minya ya arera koose.

³⁴ Ndumba shoose yiinya ta ikari elyo, tikavikwa kisiiko kwasi ya vayo fyoose fikava kindo kimwi.

³⁵ Uwe lyikaringityo na ngomita itiri sentimita 22 amwi na fisiiko na fyoose fikava kindo kimwi.

³⁶ Lyikavikwa minya shipala efo mbai, lyikashopwa-fo na mafisi atiri maaru, miiso, na miri ya maangashi, lyikaringityo riti na mburumburu ta minya.

³⁷ Ni indo mitika yeyo ilesongosyo, na myoose ikava ya ngata imwi nsi.

³⁸ Hiramu kaengera-se kasongosya mideeva ikumi, wo umwi utiri kana katiri mita 1.8. Na wo umwi ushiidima itira lita 800 ta mura.

³⁹ Taari ya sinde ya iterevya kasimbita-fo mitika iraanu na taari ya ndoo kasimbita-fo mitika iraanu. Ndumba imwi ya taari ya ngama ya sinde kandesimbitau yoondi lyilya.

Findo fya imarisya mmba ya Iruva

⁴⁰ Hiramu kasongosya-se nungu, mabeleshi na kideeva. Kamarisya mashora moose a mangyi Solomoni a itana mmba ya Nndumi Iruva.

⁴¹ Findo alesongosya ni efi: Ngo ivii fideeva fivii fikefivikye ureto uwe yavayo Soori yitiri finya shooke nisha ikaekyeryo uwe ya ngo yeto titiri ureto.

⁴² Mafwanu mayana aana a makomamanga akee maale mabala avii ayeekyerya uwe ya ngyureto eto tikeeshivike uwe ya ngo.

⁴³ Kaengera kasongosya-se mitika ikumi amwi na ndima ta-vayo ikumi.

⁴⁴ Kasongosya yoondi iniini, lyikaekyeryo uwe ya mafwanu a shau shiniini ikumi na ivii.

⁴⁵ Findo efi fyoose ni Hiramu alesongosya mangyi Solomoni five fya mmba ya Iruva. Na fyoose fyekee fya arera shisangye ikamamya nnu. Nafyo ni ndima, mabeleshi na kideeva.

⁴⁶ Mmbo mangyi alesongosya findo efyi kulya imungony lya Yordan, nnang'ani ya Sukothi na Sarethani.

⁴⁷ Yaa ekee ni masaa meengyi nta mangyi Solomoni nalaidimi imanya yeekyena lya vayo.

⁴⁸ Fyeifo na findo fingyi fya saabu mangyi Solomoni etiri fya mmba ya Iruva fikee ni masabahu na mesa ya iutya mikate ya kiraso.

⁴⁹ Ando kwa yeekyerya taa ikumi alya kweele ya kweele, isaanu tikavikwa taari ya kwasinde na tingyi isaanu taari ya kwandoo fivaro amwi na taa tikeyaaka.

⁵⁰ Findo fingyi fyoose filya fya iyuutya ndumwa alya ando kweele ya kweele, fyoose ni saabu. Malungo la myango myoose ya kimmba na kulya kundo kweele mmwasi mmbo ekee masongosye na saabu.

⁵¹ Naasa mangyi Solomoni kamarisya mashora moose akwaani na mmba ya Iruva-Munifinya. Kaumbya masaa moose a mangyi Davidi we ndeye kaavika efo mmba ya iruwa. Akava ni masaa a efo mmba ya Iruva-Munifinya.