1 VAMANGYI 3 - BIBILLYA Mareiyo Meele a Iruva

Solomon Atereva Urango Usha

¹ Solomon eruuya umbuya na Farao mangyi ya Misri, naambo naalyike mfu wakwe. Keende mfu wa Farao kammbika efo muriny wa Davidi, kutani amaa itana mmba yakwe muni, mmba ya Iruva-Muni finya, na isimamba lyikaringitya muri wa Yerusalemu.

² Efo kwa mbee vandu mmbo vekeyuutya Iruva firaso fyawo efo mafumbuu kulore mmba ya Iruva yamma itanwa.

³ Solomon kakunda Iruva-Muni finya efo, ushilyiny lwakwe kavaka ndeye Davidi, kava mwiyuutya Iruva firaso fya ikora efo kitaren kya irasya.

⁴ Kyeeri kimwi Solomon keenda indeutya kiraso kulya Gibeoni, mashika mfo kundo kwekee kusauwe kwa mwiindye. Kyekee miishivire ya Solomon ya iniingya firaso fiku fya indekora.

⁵ Solomon ekee kulya Gibeoni; Iruva-Munifinya kansheya na yoorya elyi kio, kammbia, “Tereva kindo kukundye kyoose na yeny nshekuniinga.”

⁶ Solomon kammbia, ndeye wakwa Davidi, ishinga lyafo, mmbo “kwemoora ikunda iniini kimaruma kya ikurundya mashora mesha, kava nndu nrilali na mwiitana fya dede. Na yewe kweengera-se inkunda kutani kwashemmbonisya mwana kashekaya kiri kyakwe kya ushilyi.

⁷ Woi Iruva-Munifinya, Iruva wakwa, yeny ishinga lyafo mmbo kuleshiniinga umangyi ando a ndeye wakwa Davidi, naakwa nnyeli shikee mwana n-ndu, nta shileeshi ngata ya ishillya.

⁸ Na yaandi kwashivika nnang'ani ya vandu vafo kuvasauye yewe kumuni, vandu veengyi valavaa nta imanyika yeekyena lyawo.

⁹ Kweekyoo mmbo, Shakutereva kushiniinge yeny ishinga lyafo nrima wa urongo naambo shiidimi ileta vandu vafo, shiidimi imanya mesha na makasha, mashika mbwovi ashiidimaa ileta vandu vafo eva vafye indi?”

¹⁰ Iruva Muni finya kasennyo ni kiterewo ekyi kya Solomon.

¹¹ Nawe kammbia “Kimmba kwatereva usumanu lwa ishillya, nta nkwatereva kya muu mwasha ao umasi nta nkwatereva urumato lwa vakiduva vafo, indi kwatereva ileta vandu na iwatannya dede

¹² nasaany, kiterewo kyafo kyamma yiirikyo. Shakuniinga urilalyi na urango kuleefo nndu ungyi alemmbonisa mbee yafo, nta nalakaa ashe numa yafo akuvakye yewe.

¹³ Na lyingyi mmbo shikuniinga filya kulaa kwatereva; mmbo kuvaa isimba na yiindyo, kwiilanyi mangyi tingyi shoose kyeeri kya ushilyi lwafo.

¹⁴ Na lyingyi kwallatya shia na mavavaso akwa ndesa ndeye-afo Davidi etana mmbo shikuniinga muu mwasha.”

¹⁵ Nalyo Solomony kamaarukkya rony, lola ni yoorya. Llyo kaveesha na Yerusalemu, kasalala mbee ya isanduku lya kyaasa lya Nndumi Iruva, kaningya firaso fya ikora na muro, na firaso fya unapwe, kavika ifura na mashinga akwe moose.

Solomon aleta mwaandu muumuu

¹⁶ Nkonu umwi vaka vavii va sshya vakeenda kwa mangyi Solomon.

¹⁷ Umwi wawo kaamba “Nndumi wakwa, yeny na nka yeu ungyi mmbo lukaa mmba imwi, yeny shaona mwana na nka yeu eifo.

¹⁸ Kwikyisya mikonu iraru nawe kaona mwana. Nkweefo nndu ungyi efo mmba eyo kuuta yeny nawe-fo.

¹⁹ Naasa nkonu umwi kio kalaaya mwana wakwe kafwa.

²⁰ Naasa kakwiipo kio kya nnang'ani yeny shiirekye rony keepo mwana ulya wakwa kandemwaara kitareny kyakwe. Nawe kandeipoo mwana ulya wakwe afiyye kashemmbika yoo kitareny kyakwa.

²¹ Ngama shikwiipo shikundye yoota mwana wakwa, shakooya mmbo afiyye. Shasoongya mmwasi, shalollya nshi mwana wakwa-fo.”

²² Indi nka ulya ungyi kaamba, “Oode! Wakwa mmbwe yetoo eefo na muu, na wafo mmbwe yeto afiyye.” Nawe nka ulya wa mbee kaamba, “Oode! Mwana wafo mmbwe afiiye, wakwa ni yeu eefo na muu!” Naasa, vakaengera ivakyana indo mmbe ya mangyi.

²³ Naasa mangyi Solomon kaamba, “Wo umwi waany mmbo akeyaamba sheelyi mwana wakwe mmbwe eefo na muu na eto afiyye nshi wakwe-fo.”

²⁴ Llyo, mangyi aamba, “Sheengyeny upanga.” Vakamweengye upanga.

²⁵ Mangyi kaamba, “Pareny mwana yeu eefo na muu, nnang'ani kavii muniingye vaka eva wo umwi kiparwe kimwi.”

²⁶ Nka ulya ekee maye ya mwana ulya eefo na muu, kavavyo nriiminy kya mwana wakwe, kavia mangyi, “Shakutereva mangyi, mulawae mwana yeu-fo. Kuniingye nka eto mwana yeu eefo na muu nave vakwe.” Indi nka ulya ungyi kaamba, “Oonde! Mwana nalave wakwa nta wakwe-fo. Arumbuwa fyenga fivii.”

²⁷ Mangyi Solomon kaamba, “Kulawae mwana-fo! Niingya nka ulya mbe namwiipoo, mashika mmbwe maye.”

²⁸ Vandu woose va Israeli vekiita ndesa mangyi alerummbwa mwaandu, vakamwereya, vakamanya urilalyi na urango lluukye kwa Iruva mmbwe yeto alemwiidimisya ileta mwaandu eto.