1 VAMANGYI 21 - BIBILLYA Mareiyo Meele a Iruva

Nrema ya Naftali ya Msabibu

¹ Numa ya mbony eti, Napoth Myezreeli etiri irema lyakwe lya misabibu kulya Yezreeli, kufii na mmba ya kimangyi, ya Ahabu mangyi ya Samaria.

² Ahabu karera na Naboti, kammbia, Shininga nrema yei yafo ya misabibu ive yakwa ya mboka kimmba ikee kufii na mmba yakwa, na ando avayo shikuniinge nrema ingyi ya misabibu shisha mmwasi, ao kwankunda shikuniinge fesa tiinani na wuuru lwa nrema yei yafo.

³ Naboti kavia Ahabu, Nndumi Iruva neete kwaasha shilasheikuniinga ding'u ya vandeyeakwa.

⁴ Nawe Ahabu keenda kyeny kwakwe etirwa nngoo na nrima nrovye; kyeendwa ni irero llya alevyo ni Naboti Myezreeli, sheelyi nshiidima ikuniingya ding'u ya vandeyaakwa-fo. Kakwaara yoo kitareny kyakwe kalema ilya shoonga.

⁵ Indi Yezebeli we nka wakwe kanlatya kammbia, Nkyikyi elyi nrima wafo ukeenrovye, kutani kwalemwa ilya shoonga?

⁶ Kammbia, Kimaruma ni elyi sharera na naboti Myezreeli, Shammbia, Shiniinga nrema yafo ya misabibu, shikuniinga fesa ao kwankunda shikuniinga nrema ingyi ya misabibu ando a yeyo yafo. Karouwa, kaamba nshikuniinga nrema yakwa ya misabibu-fo.

⁷ Yesebeli eke mmbwe nka wakwe kammbia, ulaalu yewe mmbwe kutiri umangyi lwa Israeli? Kwiipoo kwalya shoonga, kwiite ufoo, yeny shikuniinga nrema ya misabibu ya Naboti Myezreeli.

⁸ Naasa, kareiya barrwa kwa irina lya Ahabu, kativika muuri wakwe, karika barrwa tilya kwa vamiku na masiingo a vandu va muriny ulya wa kufii na Naboti.

⁹ Kareuya kaamba, kapeny wombe lwa yuumbya vandu woose, mundevika Naboti mbee ya vandu;

¹⁰ Murumye vandu vavii valang'a, vashiidimaa ivika ukureki vaambe sheelyi, Naboti mmbo aarara Iruva na Mangyi. Nalyo yeni muntire munsomute poo munkape na mawe kutani afwa.

¹¹ Vamiku valya va muriny mbwakwe na masiingo a vandu valya va kulya muriny mbwakwe, vakatana ndesa Yesebeli alevavasya, ndesa kyekee kireiye kulya barweny tilya alevarikya.

¹² Vakakapa wombe lwevaanga vandu, vakashekuumbya ando amwi, vakashevika Naboti kiriny kya uwe mbee ya vandu.

¹³ Na vandu vavii ngata vemma ideesyo vakaanga vakashekaa rembo mbee yakwe, vakapooka inkureekya fya wongo, veyaamba, Naboti mmbo alearara Iruva na mangyi. Nalyo vakankamara neefo poo ya muri vakankapa na mawe kutani afwa.

¹⁴ Vakashefitya Yesebeli mbony vakaamba, Naboti ankapwa na mawe kafwa.

¹⁵ Naasa Yesebeli ekiita sheelyi Naboti ankapwa na mawe kutani afwa, Yesebeli kavia Ahabu, kwipoo kwandetira nrema ilya ya misabibu ilya ya Naboti Myezreeli, ilya alelema ikukummbya, mashika Naboti nnakiifo na muu-fo ammeefwa.

¹⁶ Nalyo Ahabu ekiita sheelyi Naboti amfwa, kakwiipoo kalatya nrema ilya ya misabibu ya Naboti Myesreeli, ashekooya yiitira naambo ive yakwe.

¹⁷ Irero lya Nndumi Iruva lyikasheya Elia Mtishbi, lyikaamba,

¹⁸ Kwiipo kundekwanannya na Ahabu mangyi ya Israeli ulya akee kulya Samaria akee kulya nremin ya Naboti ya misabibu, mfo kundo akai naambo ashekooya ilyitira.

¹⁹ Endammbie, Nndumi Iruva aamba indi, A mmbo kulewaa naambo kwiidimi itira? Neewe kummbie, Nndumi Iruva aamba indi, ando alya fite filekomba samu ya Naboti, nng'u ando fite fishekombaa samu yafo, ee samu yafo.

²⁰ Ahabu kavia Elia, Ewe! Nkiduva wakwa, kwamanya kindo shakuvia? Kammbia shammamya mashika mmbo kulekukumba naambo kusheshitannya makasha usanguny lwa Nndumi Iruva.

²¹ Kwiise shishekweengye ngapo uwe yafo, na yeny shishekurumata deny, wo nsero eefo, na akee kifingyony kunu Israeli nshemmbika kwaasha na Ahabu.

²² Mafurumyony mmba yafo mmbo ishevakaa mmba ya Yeroboamu mwana wa Nebati, na mmba ya Baasha mwana wa Ahiya, kimaruma kya elyi kulesheengye usuvanu na nyashi kutani vana va Israeli vateere,

²³ Na lyingyi Nndumi Iruva kaamba, mbony ta Yesebeli, sheelyi mmbo Yesebeli ashelyiwa mfite kulya kyaambeny kya Yesreeli.

²⁴ Nndu wa mmba ya Ahabu eto ashefiyya muriny, mmbo alyiwaa mfite, na eto ashefiyya efo mbateny alyiwa ni ndeye ta nginii-u.

²⁵ Nkwiifo nndu ungyi alekulumba kya itana makasha mbee ya Nndumi Iruva sha Ahabu, eto alevikyo ngaya ni nka wakwe Yesebeli-fo.

²⁶ Katana makasha nnu, na yiindya mafwanu alya moose alesongosyo ni Vaamori, valya valeantwa ni Nndumi Iruva na vana va Israeli vakalollya.

²⁷ Ahabu ekiita mbony yeto, kakuuta soori takwe karaa makunnya, mwiiliny wakwe, kakootoya, kalaaya makunnya, keenda ekunyiisye.

²⁸ Irero lya Nndumi Iruva, lyikasha kwa Elia Mtishbi, lyikaamba,

²⁹ “Kulollye ndesa Ahabu alekunyiisa mbee yakwa? Naasany kimmba antana indo, nshikyendee-se makasha alya kyeeri kya muu wakwe-fo, indi-lyo kyeeri mikonu ya mwana wakwe mmbo nshendee makasha yoo efo mmba yakwe.”