1 VAMANGYI 19 - BIBILLYA Mareiyo Meele a Iruva

Elia Ifumbuun lya Sinai

¹ Nalyo Ahabu kashevia Yesebeli mbony shoose tilya Elia aletana na ngata alewaa vakisuku woose na upanga.

² Llyo Yesebeli erumya Elia nrumi, kammbia, maruva yoo nashitannyi indi na kilanya, kulle kindo shikutannya, ndesi kyeeri sha ekyi; kwa ewo vashetanaa indo.

³ Nawe ekilollya indo, kakwiipo, kaenda ikira muu wakwe, kulya Been-sheba, muri wa Yuda, kundo alera nndundi wakwe.

⁴ Indi we muni keenda na mbee kulya kasa koomu kyaaro kya nkonu umwi sele, kandefika sinden ya nretemu kandekaa-u rembo. Katerevia muu wakwe kaamba; ulaalu kifye, Woi Nndumi Iruva shuuta muu wakwa, mashhik yeny nshi shikee nsaari shairya vandeye vakwa-fo.

⁵ Nawe kashekoorrwa kalala-si ya nretemu; nalyo yeni nsu kampaana kammbia, “Kwiipo kwalya.”

⁶ Kalola, ate, kweiyo nkate nkaare uwe ya makaa, na ndivi ya mura kufii nawe. Kalya, kana kalalase lyingyi.

⁷ Nsu wa Iruva kansheya lya kavii, kampaana, kammbia, kwiipo, kwalya mashika kyaaro ekyi ni kiroo kwafo.

⁸ Kakwiipo, kalya, kana keenda etiri finya ya shoonga ando a mikonu makumi aana kio na nsanyiny kutani a fika Horebu ifumbu lya Iruva.

⁹ Kandefika ando kutiri mbanga kaangafo kalala, irero lya Nndumi Iruva lyi kammbesa, Elia nkyokyi kuketana yaandi,

¹⁰ Kaamba, mmbo shatirwa nkififi kiniini, kimaruma kya Nndumi Iruva, Iruva wa matorito, elyi vana va Israeli valleimmbwa mavavaso afo, na ivaa vakisuku vafo na upanga; ni yeny shimuni shilesaa-u, na ulaalu mmbo vakeruuya muu wakwa vashuute-u.

¹¹ Kaamba, Enda kwandesalala ifumbuu mbee ya Nndumi Iruva, Nalyo Nndumi Iruva keera, uraato wiingi lwa finya lukapara mafumbu, lukafishafisha mawe akwaallye-si mbee ya Nndumi Iruva, indi Nndumi Iruva nnyeifo kulya uraaton lulya-fo; numa ya urato, kidina-si; indilyo Nndumi Iruva nnyeifo kulya kidine-siny kilya-fo;

¹² numa ya kidina-si kukava-fo muro, indilyo, Nndumi Iruva nnyeifo kulya murony ulya-fo, na numa yavayo, unyanga usiise.

¹³ Elia, ekiita unyanga lulya kakusikya kisangu kyakwe na soori, kasomuka kasalala alya mwaangony wa mbanga ilya. Nalyo unyanga lukansheya, kaamba, Nkyokyi Elia kuketana yaandi?

¹⁴ Kamba, mmbo shatirwa ni kififi kiniini nnu, kimaruma kya Nndumi Iruva, Iruva wa matorito, elyi vana va Israeli valerau mavavaso afo vakafisha fitara fyafo fya irasya, na iwaa vakisuku vafo na upanga, ni yeny shimuni shilesaa-u, na ulaalu mmbo vakeruuya muu wakwa vashuute-u.

¹⁵ Nndumi Iruva kammbia, Enda, wuya kundefika, kulya Demaski kasa koomu; kwamfika-fo kundeamba Hazaeli mafura nave mangyi ya Shamu.

¹⁶ Na Yehu mwana wa Nimshi mwaambe mafura, nave mangyi ya Israeli; na Elisha mwana wa Shafati wa Abeli-mehola, mwaambe mafura nave Nkisuku ando afo.

¹⁷ Na mmbo kishevaa yeto asheturunyaa upanga lwa Hazaeli, Yehu mmbwe ashemmbwaa, yeto asheturunya upanga lwa Yehu, Elisha mmbwe ashemmbwaa.

¹⁸ Naakwaa kyava indo, kunu Israeli mmbo shisheraa-fo vandu fiku mfungare, vandu kulare valemfiirya-ndi mbee ya Baali nta imiminda ifwanu lyakwe.

Uvaango lwa Elisha

¹⁹ Naasa kandekwiipo kulya, kandekooya Elisha mwana wa Shafati, eremaa na ng'umbe tisheengyaa mapaleny ikumi na ivii, nawe muni mmbo eke na tilya ta ikumi na ivii. Elia kandeira kufii nawe, kamweerya soori yakwe uwe yakwe.

²⁰ Nawe kaisityo-u ng'umbe, karishya Elia numa yakwe, kaamba, Shakutereva shiniinga muumuu, sheende imiminda nde-yaakwa na maye-akwa, naasa shiidimi ikulatya. Kammbia Enda, kuwuye, ankyokyi shakutannya?

²¹ Kawuya kara-fo ilatya Elia, kandeshisha mbele ng'umbe, katikora kaniinga vandu vakalya. Numa kakwiipo kalatya Elia, kava mwimfurukannya.