1 VAMANGYI 15 - BIBILLYA Mareiyo Meele a Iruva

Mangyi Abiya va Yuda

¹ Mwaaka wa ikumi na nyanya wa mangyi Yeroboamu mwana wa Nebati, llyo Abiya epooka ishillya uruka lwa Yuda.

² Myaaka iraru mmbo eshillya Yerusalemu, na maye evaangwa Maaka mfu wa Absalomo

³ Katana ngyulyamari toose tilya ndeakwe etana kulare we ammba mangyi, nrima wakwe mmbwekee nsongovisi mbee ya Nndumi Iruva, Iruva wakwe sha wa ndeye mangyi Davidi-fo.

⁴ Indi lyo, kimaruma kya Davidi; Nndumi Iruva, Iruva wakwe, kanniinga taa kulya Yerusalemu naambo asaleese nsero wakwe ando akwe, na ivambisa Yerusalemu ive na finya.

⁵ Mashika Davidi mmbo etana fya usumanu mbee ya usangu lwa Nndumi Iruva, nta nnyetana ulyamari nnang'ani ya filya fyoose evavaswa-fo, mikonu myoose ya muu wakwe, kulare ni fyeeri filya fye Uria, Mhiti.

⁶ Nalyo kweifo fira nnang'ani a Rehoboamu na Yeroboamu fyeeri fya muu wakwe.

⁷ A mbony ta shoose alerunda, ta Abiya telesaau, na tilya shoose alerunda, ntikee shireiye efo kyitabun kya-mikonu-kya mikonu ya vamangyi va Yuda?

⁸ Abiya kafwa na vandeye vakwe vakamwaara kulya muriny wa Davidi. Asa mwana wa Abiya kashillya ando akwe.

Mangyi Asa Va Yuda

⁹ Asa kasheshillya uruka lwa Yuda, kwiikee mwaaka wa makumi avii wa Yerooamu manyi wa Israeli.

¹⁰ Kashillya Yerusalemu myaaka makumi aana na umwi; na maye irina lyakwe evaanwa Maaka, mfu wa Absalomo.

¹¹ Naasa Davidi,

¹² Kashefuna-fo vafiri woose kulya urukeny lulya, kootafo mafwanu myoose alya alesongosyo mmbandeeye.

¹³ Naakwa ni Maaka ve maye kanlemya nalasesheva mwiishillya, kyeendwa ni llya ensongosya Ashera mafwanu; naasa Asa kashemanya ifwanu llya kashelyimamitya kulya kimureny kya Kidroni.

¹⁴ Indilyo ando alya kwauwe nkuleutwa-u-fo lyo nrima wa Asa mbee ya Nndumi Iruva mmbo wekee nsongovisi mikonu yakwe myoose.

¹⁵ Findo filya ndeye alefyeeremuta kandefyeende, na filya alefyeeremuta we muni, kulya mmba ya Nndumi Iruva, fesa, saabu na fyoombo.

¹⁶ Kweifo fira nnang'ani ya Asa na Baasha mangyi wa Israeli mikonu myoose.

¹⁷ Naasa Baasha mangyi ya Israeli kashekapana na Yuda, katana Rama, naambo kulave-fo nndu ashangaa ao isomuka efo kwa Asa mangyi ya Yuda.

¹⁸ Naasa Asa kandepoo fesa shoose na saabu t ilya tekee efo mmba ya Nndumi Iruva na ilya ya mangyi kaniingya varundi vakwe mangyi Asa kavaruma kwa Ben-hadadi, mwana wa Tabrimoni, mwana wa Herironi, mangyi ya Shamu ulya eke Demaski, kaamba;

¹⁹ Lwiirikyani yeny na yewe, na ndeye akwa na ndeye afo, llate mmbo shakweengye findo fya pya, fesa na saabu, naasa kweendeny kundefisha iirikyano lyafo na Baasha mangyi ya Israeli naambo nashuuke.

²⁰ Nawe Ben-hadadi kairikyana na mangyi Asa karuma vaniini wa fira va miri ya Israeli, kandekapa lyoni, na Dani na Abel-beth-Maaka na Kinerothi uta shoose uruka lwa Naftali.

²¹ Naasa Baasha ekiita mbony eto, keenda kandekaa Tirza karafo itana Rama.

²² Llyo mangyi Asa kaamba, Yuda kulasaafo nndu-fo, nawo vakashekamara mawe a Raman na mboshiki ta vayo, tilya etana nato Baasha; nawe mangyi Asa kashetana nafyo muri wa Geba ya Benyaminy na Mispa.

²³ Na mbony shoose ta Asa tilesaafo, na finya takwe shoose, llya fyose endunda, na miri ilya entana mfyereiywa efo kyitabun-kya mikonu ya vamangyi va Yuda? Indi kyeeri kya ukuu lwakwe kashelwaa ndwari ya marende.

²⁴ Asa kalala na vandeye vakwe, karikwa ando amwi na vandeye vakwe muriny wa Davidi we ndeye. Nawe nsero wakwe Yehoshafati kashillya ando akwe.

Mangyi Nadadu va Israeli

²⁵ Nadabu mwana wa Yeroboamu mmbo epooka ishillya Israeli mwaaka wa kavii wa Asa mangyi ya Yuda, kashillya Israeli myaaka ivii.

²⁶ Kashetana ulyamari mbee ya usangu lwa Nndumi Iruva. Kashetana filya ndeye etana na ulyamari lwakwe lukashetuula Israei Ulyamariny.

²⁷ Naasa, Baasha mwana wa Ahiya wa mmba ya Iskari kanriingya, Baasha kashenkapa kulya Gibethoni, ya Wafilisti, mashika Nadabu na Israeli woose mmbo vekelaaya Gibethoni.

²⁸ Naasa Baasha mwaaka wa kararu, kawaa Asa mangyi ya Yuda nawe kashillya ando akwe.

²⁹ Nalyo yeni ekitira uruka kakapa mmba ya Yeroboamu shoose. Kutani awakomba kombi kutani irero lya Nndumi Iruva lyainukya llya alerera na kana ka ishinga lyakwe ahiya Mshilom;

³⁰ Kimaruma kya makasha a Yeroboamu alya alelya mara, akasheengye Israeli ulyamari kweekyo Nndumi Iruva, Iruva wa Israeli karooyo nngoo

³¹ Naasany mbony shoose ta Nadabu tiseeifo, na shoose alerunda, nkyo ntilereiyo efo kyitabun-kya mikonu ya vamangyi va Israeli?

³² Mmbo kweifo fira kyeeri kyoose nnang'ani ya Asa na Baasha mangyi ya Israeli.

Mangyi Baasha va Israeli

³³ Kwikee mwaaka wa kararu wa Asa mangyi ya Yuda, Baasha mwana wa Ahiya kapooka ishillya Israeli shoose efo Tirza, kashillya myaaka makumi avii na yiina.

³⁴ Kashetana ulyamari mbee ya usangu lwa Nndumi Iruva, kalatya ngyayo ta Yeroboamu, na mitannye yakwe ikashetuula Israeli.