1 VAMANGYI 13 - BIBILLYA Mareiyo Meele a Iruva

¹ Kashekwipoo nndu wa Iruva ooka kulya Yuda kwi irero lya Nndumi Iruva, kafika kulya Betheli. Nawe Yeroboamu eifo eniingya kiraso kyekora.

² Naasa nndu eto kakapa kyoorongye uwe ya kitara kya irasya, kwa irero lya Nndumi Iruva, kaamba, “Woi kitarakya irasya, kitara kya irasya, Nndumi Iruva aamba indi, kunu ufyariny lwa Davidi ashewonikafo mwana irina lyakwe Yosia; we mmbwe ashemamita vakohani ewo vekora firaso fya ikwindya yewe, na maffwa nang'u ushemamitwa kimaruma kyafo.”

³ Na nkonu ulya muni, kaora wende, kyaamba, “Elu llo wende Nndumi Iruva aleamba, kitara kya irasya mmbo kisheparika nnang'ani na ifu lyikee uwe ya vayo lyishepusuka.”

⁴ Naasa llya mangyi Yeroboamu aleeta marero alya a nndu ulya wa Iruva, aleamba kimaruma kya kitara kilya kya irasya kulya Betheli, mmbo aleorwa woko lwakwe alya kitareny kya irasya kaamba, Ntireny. Naasa woko lulya aleloorrwa lukauma pony nta nalakiidimi-se ilulema lyingyi.

⁵ Nakyo kitara kyeerasya kikaparika, na ifu lya vayo lyikapusuka ndesa llya nndu wa Iruva emmaa yoora wende kyeendwa ni irero lya Nndumi Iruva.

⁶ Manyi kavia nndu ulya wa Iruva, ulaalu Tereva, Nndumi Iruva, Iruva wafo, kusheekye intereva naambo shiwonise-se woko lwakwa lyingyi. Nndu ulya wa Iruva, katereva Nndumi Iruva, na woko lwa mangyi ilya lukawuya iva sha llya lwekai mapookyony.

⁷ Mangyi kavia nndu ulya wa Iruva, Ndifo kyeny kwakwa kundeimuya-u na yeny shishekuniinga aika.

⁸ Nndu ulya wa Iruva, kavia mangyi ilya, Nakwashiniinga kyenga kya mmba yei yafo, nshishaanga mmba kwafo-fo, nta nshilyaa shoonga ao mura wa ina ando yaa-fo.

⁹ Mashika ni indo shilevavaswa ni irero lya Nndumi Iruva, lyikaamba, kulalye shoonga nta imwi-fo nta ina mura-fo, nta kulashewuya na shia ilya kulesha nayo-fo.

¹⁰ Naasa keenda kyakwe kwa shia ingyi nta nalawuye na shia ilya alesha nayo Betheli.

Nkisuku Nkuu wa Beteli

¹¹ Naasa kweifo nkisuku umwi nkuu ekee kulya Betheli, na umwi wa vana vakwe kanderera nawe, na immbya wo kindo nndu ulya wa Iruva aletana; kulya urukeny lwa Betheli, na marero moose alya valerera na mangyi vakavia ndeye waawo.

¹² Ndeye vaawo kavavia, A ni shiakyi eenda nayo? Mashika vana valya vellolya shia ilya nndu ulya wa Iruva elatya kyeeri kilya alooka kulya Yuda.

¹³ Kavia vana valya vakwe, shaallyen nshungu. Wakamwaallya nshungu, nawe kepoo kyaaro.

¹⁴ Kalatya nndu wa Iruva, kandenkooya ekee rembo sindeny ya Mwaloni, kammbesa ndesa ni yewe nndu ulya alooka kulya Yuda? Kammbia, “Mmbwe yeny,”

¹⁵ Kammbia, “Osho kwakwa anga mmba kwalya shoonga.

¹⁶ Nawe kammbia, nshiidimaa iwuya ando amwi neewefo, nta nshilyaa shoonga nta ina mura ando amwi na yewe yaa-fo.

¹⁷ Mashika mmbo alevio kwa irero lya Nndumi Iruva, kulalye shoonga, nta ina mura efo-fo. Nta kulashewuya na shia ilya kulesha nayo-fo.”

¹⁸ Kammbia, Naakwa ni yeny mmbo shikee nkisuku sha yewe, na nsu kashivia kwa irero lya Nndumi Iruva, kaamba wuya nawe kyen kwafo, nandelya shoonga, ani mura. Lyo mmbo aleamba wongo.

¹⁹ Naasa nndu ulya kawuya aryani nawe, kalya shoonga, nakwaa ni mura kulya kyeny kwakwe.

²⁰ Nalyo vekee rembo meseny, irero lya Nndumi Iruva lyikasheya nkisuku ulya alemmbiira,

²¹ Kafuuya nndu ulya wa Iruva alesha ooka Yuda eshambaa, Nndumi Iruva aamba indi; Kimmba kulefisha ivavaso lya Nndumi Iruva, nta kulakunde yiindya ndesa Nndumi Iruva wafo alekuvavasya,

²² indi kwawuya ilya shoonga, na ina mura, llya enkuvia kulalye shoonga nta ina mura, nnying'a wafo mmbushaarwa kifuny kya vando-fo.

²³ Naasa ekimaa ilya shoonga na ina mura we nkisuku ulya alemmbiira kamwaallya nshungu.

²⁴ Llya afo ashendaa kyakwe kakwaanannya na miiso shia ikammbwaa. Nnying'a wakwe ukeerwa yoo shia; na nshungu ulya ukandesalala kufii nawe, na miiso ilya kiwo.

²⁵ Naasa vandu veshiiraa vakalollya nnying'a wikee mweere shia na miiso yiiselelyi kufii na nnying'a, vakakwiipoo indeamba mbony eti kulya muriny ulya nkisuku yeu nkuu ekaa.

²⁶ Nawe nkisuku ulya embiirya shia ekiita mbony kaamba; Ni nndu ulya wa Iruva, alemina uvavaso lwa Nndumi Iruva, nkyo kimaruma Nndumi Iruva kammutya miiso nayo miiso ikanratwa ikammbwaa nalyo irero llya Nndumi Iruva alemmbia lyikainukya.

²⁷ Kavia vana vakwe, kaamba shaallyeny nshungu vakamwaallya.

²⁸ Keenda kalollya nnying'a wikee mweere shia na nshungu na miiso fiiselelyi kufii na nnying'a, ulya miiso ilya nnyilelya nnying'a-fo, nta nnyileratwa-ratwa nshungu-fo.

²⁹ Nkisuku ulya kepoo nnying'a ulya wa nndu wa Iruva, kawekyera uwe ya nshungu wakwe, kaviira nkisuku ulya nkuu kulya muriny mmbwakwe kandemwaara-fo na yiiya-fo.

³⁰ Kandeara nnying'a ulya efo kifuny kyakwe muni. Vakamwiiya vashambaa, Woshi, mwanama!

³¹ Nawe ekimaa inndika kavia vana vakwe, Nkonu shifwaa, shiriken kunu kifuny ekyi alerikwa nndu yeu wa Iruva; muvike mafua akwe yoo mbai ya mafua akwa.

³² Mashika irero llya aleamba alya kitareny kya irasya kulya Betheli kwa irero lya Nndumi Iruva, na mmba shoose ta ando kwa uwe tikee kunu miriny ya Samaria ni kya dede kuti lyitanyike.

³³ Numa ya mbony eto, Yeroboamu nnyalekunda nta irau shia takwe shiravi-fo indi we kandeengera-se makoani a mmba ta uuwe kasanda vandu mpulupulu.

³⁴ Kaekyerya vandu maako ndesa alekunda we muni, naambo vakooye iva-fo vakohani va ando kwa uwe. Mbony eyo ikava ulyamari uniini kwa mmba ya Yeroboamu, ikalyamarwa deny na imamitwa kunu ulaniny.