1 Vakorinto 6 - BIBILLYA Mareiyo Meele a Iruva

Vakristo na Yaanduyana

¹ A-kwakooya umwi waany akeeyaava ungyi sye, akaryaa inrwaa mbee ya vandu va masanga, nare-fo vandu veele?

² A mmbo mulaishi sheelyi veele mmbo vasheutyaa ulana uvingo? Na kwankooya ulana mmbo lusheutywaa uvingo ni yeni, mmbo mulasumani ulaalu irummbwa myaandu midu?

³ Mmbo mulaishi sheelyi mmbo lusheutyaa vasu uvingo, na nshi mmwasi deny kya mbony ta muu yeu!

⁴ Naasany, kwakooya mutiri ando musheanduyaa mbony ta muu yeu mmbo mwavika veerummbwa yewo vakee ruu kunu siriny?

⁵ Mmbo sharera indo kyikee kyeemuteenda. A mmbo kyaamba kwany nkwiifo nta nndu umwi atiri urango, ashiidimaa irummbwa mbony ta vandu vakwe?

⁶ Kyaindi mmbo mwakukumba muveni na veni nndu na uroye kwa vandu va masanga.

⁷ Naasany mmbo mukeevaanguye deny mukankuriingya muveni na veni. A nshi ng'waana kwaanguywa, ao isokwa findo fyany?

⁸ Indi kilasha neefyo yeni mmbo mwalammya vengyi neevasoka masaa awo; yee, naakwa ni vandu vany veni.

⁹ A mmbo mulaishi sheelyi varavi va ngata yeyo mmbawonaa umangyi lwa Iruva-fo? Mulasheelembika, vatuusi mmbashewonaa umangyi lwa Iruva-fo, nta veinndya maruva a wongo-fo, nta vaatuusi, na varavi va ngata eto,

¹⁰ manyinyi, nta velanga, nta vanangwa-fo, nta veyaarara, nta vasoki-fo.

¹¹ Na vengyi vany mmbo mwekee va ngata yeyo; lyo mukailyiswa, mukaekennywa usumanu na irina lya Nndumi Yesu Kristo, na lya Mumuyo wa Iruva weeru.

Miili yaany mfiiya fya Iruva

¹² Kwakwa yeny findo fyoose mfisha. Lyo nshi fyoose fivaa-fo. Kwakwa yeny findo fyoose mfisha. Lyo yeny nshisheshilywa nta nkindo kimwi-fo.

¹³ Shoonga nnya ndeu, na ndeu nnya shoonga. Lyo Iruva mmbo asheutaa-u fyoose, ndeu na shoonga. Indi mwiili nshi wa utuusi-fo, ni wa Nndumi, na Nndumi ni wa mwiili.

¹⁴ Na Iruva mmbo aleruta Nndumi weeru na lyingyi we mmbo ashelurutaa neese na wiidimi lwakwe.

¹⁵ A-mmbo mulaishi sheelyi miili yaany ni malungo a Kristo? A-mmbo nshuutaa fyuungo fya Kristo shifyaallwe five fya ntuusi? Oode!

¹⁶ A-mmbo mulaishi sheelyi yeto akee llunge na ntuusi mmbo akee mwiili umwi nawe? Mashika aamba, mmbo yewo vavii vashevaa mwiili umwi.

¹⁷ Lyo yeto akellunge na Nndumi ni nrima umwi nawe.

¹⁸ Risheny utuusi. Wo ulyamari nndu alutana mmbo lukee kipoo ya mwiili wakwe. Kyaindi mwituusa mmbo atannya mwiili wakwe muni ulyamari.

¹⁹ Ao ndesa mmbo mulaishi sheelyi mwiili wany ni mmba ya Mumuyo Mweele yeto akee nnang'ani yaany mukee vaniinge ni Iruva? Nta yeni mmukee vany muveni-fo.

²⁰ Mashika mmbo mukee woore na uuru. Kyikeeny indo naasa itikiseny Iruva efo miiliny yaany-te.