1 Vakorinto 5 - BIBILLYA Mareiyo Meele a Iruva

Yaanguywa lya Varundi siriny

¹ Ni dede mmbo kyikee irerwa efo kwany mbony tikakwaana riti, sheelyi kwiifo utuusi lulakee nta kwa vandu va masanga, sheelye nndu nakae na nka wa ndeye.

² Neeni mukarumana, nta mmusukaa-fo, kwakooya ashuuka kwany nndu mwiitana kindo kya ngata efo.

³ Mashika lyo dede, kwakooya shilaiyoo na mwiili, lyo shakaa-u kinrima, yeny shimuni mmbo shamma yuutya yeto aletana kindo ekyo uvingo, kimwi sheelyi sheiyo.

⁴ Kyeeri mukusanyirye na irina lya Nndumi weeru Yesu, neeny shikee neeni kwi mumuyo ando amwi na wiidimi lwa Nndumi weeru Yesu.

⁵ Shirambikkye mmbishwa nndu yeto, naambo mwiili ukapwa, indi to nrima ukirwa nkonu yeto wa Nndumi Yesu.

⁶ Irumana lyany nshi isha-fo. Mmbo mulaishi sheelyi ntarang'o munnywa mmbo ushashwa mbumba moose?

⁷ Kyasia, kwiilyiseny, mundeutaa-fo ntarang'o eto wa kasha, muvake mbumba mwiiya, mukae-fo mulatiri ntarang'o. Mashika Pasaka yeeru ilemmaa yuuto ive kiraso, mmbwe Kristo;

⁸ naasany luvike nkonu nnini, nshi wa ntarang'o ulya wa kasha-fo, ao nta nshi na ntarang'o wa uravi na ukasha-fo, kyaindi nkya filya filataran'gaa, llo waa lwa nrima na dede.

⁹ Mmbo shilemureiya kulya barrweny ilya yakwa, kyeyaamba mulasasange na vatuusi-fo.

¹⁰ Nnshi shikeamba mulasange deny na vatuusi va ulana elu-fo, ao na velanga, ao na vasoki, ao na veindya maruva a wongo-fo; mashika mmbo kyevaa kuti muke-u kunu ulaniny yelu.

¹¹ Kyaindi shaasa kyikai, mmbo shilemureiya mulatarannyi na nndu moose akee umwi weeru, akee ntuusi ao mwiilanga ao mwiindya maruva a wongo ao mwiyarara, ao nnangwa ao nsoki-fo. Vandu va ngata yeto mulakunde nta ilya nawo-fo.

¹² A nkikyi elyi yeny nshuutyaa valya vakee poo uvingo? Yeni mmbo mulakeyuutya uvingo yewo vakee neese?

¹³ Yewo vakee poo ni Iruva ashevautyaa uvingo. Yeto akee nravi muuteny efo nnang'ani yaany.