1 Vakorinto 2 - BIBILLYA Mareiyo Meele a Iruva

Mbony ta Kristo nkapye nsalebeny

¹ Kyasiany vanavama, kyeeri shilesha kwany nshilesha shishemoongoya kyama kya Iruva na moososo wa marero nta na urango-fo.

² Mashika mmbo shilefisha shila nriminy wakwa shilamanyi kindo kyoose efo kwany kuuta Yesu Kristo ulya alekapyo nsalabeny.

³ Neeny mmbo shekee na ufwafwa efo kwany na weerei na irerema nnu.

⁴ Na irero lyakwa na yaamba Nrumi ya Nsia nkyekee kya marero a urango-fo, atiri yoomwa vandu-fo, ni kwa finya na ngata ya Mumuyo.

⁵ Naambo kyikusiryo kyany kilave nkya ngata ya urango lwa nndu, indi kive kya finya ya Iruva.

Urango lwa Iruva

⁶ Kyaindi kwiifo urango lwa vandu yewo vasalalyi nisha, nta nshi waarya lwa ulana elu-fo. Nta lwa yewo veshillya, ulana elu vakava ruu-fo.

⁷ Mmbo lwarerya mbony ta waarya lwa kyama kya Iruva. Llo waarya lukee usurumi, llo Iruva aleluvika-fo uka elyo mbee kimaruma kya itumbe lyeru.

⁸ Nalo yewo veeshillya ulana elu mmbalwiishi nta umwi-fo. Mashika kukooye velyishi, mmbekapyaa Nndumi wa itumbe nsalebeny-fo.

⁹ Lyo shaasa kyikee kyireiye. Findo filya kulaore iriso lyilefilollya nta kuri ifiita, (Nta mfileanga nriminy wa nndu-fo,) mfyo Iruva aledeesya valya venkunda.

¹⁰ Lyo Iruva mmbo alelusukuya yese na Mumuyo Mweele. Mashika Mumuyo we mmbo aishi fyoose, naakwa ni fyama fya Iruva.

¹¹ Mashika efo vanduny mmbi aishi mbony ta vandu kulaore ni ngoo ya nndu yeyo ikee efo nnang'ani yakwe? Ni indo-da na mbony ta Iruva nkwiifo mwitimanya-fo kuuta Mumuyo wa Iruva.

¹² Kyaindi yese llulewarya mumuyo wa ulana elu fo, ni Mumuyo wuukye kwa Iruva, naambo lwiidimi imanya filya lukee valyimyi ni Iruva.

¹³ Neefyo lukafivera, nshi na marero akeeloshwa ni urango lwa kinndu-fo ni marero akeeloshwa ni Mumuyo, lwitambashwaa findo fya nriminy na marero a nriminy.

¹⁴ Naasany nndu yeto akee wa mbuka ya llya kipooka nnyashiidimaa iwarya mbony ta Mumuyo wa Iruva-fo; mashika kwa yeto ni kindo urung'ani, nta nnyashidimaa itimanya-fo, mashika mmbo tishidimaa imanyika kwa ngata ya nriminy sheni.

¹⁵ Kyaindi nndu wa ngata ya nriminy mmbo amanyaa fyoose, naakwa kulaore vengyi vamanya.

¹⁶ Mashika, Ni vi alemmanya makusaro a Nndumi, nanniinge makusaro? Kyaindi yese lutiri makusaro a Kristo.