1 Vakorinto 16 - BIBILLYA Mareiyo Meele a Iruva

Ngarami ya findo fyeekya vengyi

¹ Kya mbony teesang'irya findo kimaruma kya veele, shaasa llya shilevavasya siri ta Galatia, neeni kevetaniny indo.

² Wo nkonu wa mbee wa mfungare wo nndu nadeesye kindo kyakwe, kiinani na ivesyo lyakwe; naambo isanyirya lyilasheeva nkonu yeto nshaa.

³ Neeny kyeeri nshaa mmbo nshevarikaa na barrwa yewo muvasauwaa, veepoo isarya lyany fika Yerusalemu.

⁴ Kwakooya kivaa neeny sheende.

Uramba lwa Paulo

⁵ Kyaindi nshaa kwany shammaa iira Makedonia; mashika lyo nshiraa Makedonia mbele.

⁶ Kweenda nshesindaa kwany, yee, kweenda kyeeri kyoose kya mbeo; mushirwaa koose efo nsheendaa.

⁷ Mashika nshikunndye ikwaanya neeni ulaalu-fo, nshishiraa-da, mashika mmbo shivikye nsia wekaa neeni kyaangu, kwakooya Nndumi ashiidimisya.

⁸ Lyo mmbo nkaa Efeso fika Pentekoste.

⁹ Mashika kulya mmbo shileruyo mwaango nniini nsha nnu, nafo veefo veengyi vakeshikapa fira.

¹⁰ Kyaindi, Timoteo kansha, loleny nakae kwany noofoo, elyi akeerunda ishora lya Nndumi kimwi sheeny shimuni.

¹¹ Naasa kulave nndu moose amwiila, lyo nrikeny na ufoo, naambo nashe kwakwa, mashika mmbo shimbereye amwi na vanavamaye veru.

¹² Kyaindi kya mbony ta mwanamaye weeru Apolo, mmbo shilemwikima nnu nashe kwany ando amwi na vanavamaye veru, lyo we nnyekunndye isha ulaalu-fo; lyo mmbo ashaa elyi awonisaa mwaanya.

Marero eesamana

¹³ Laleny shoovi. Salaleny shumu efo kikusiryony. Rundeny kyuumi muve vatakusu.

¹⁴ Findo fyany fyoose fitanyike na ikunda.

¹⁵ Na lyingyi vanavama shamutereva; mwiishi vandu va kyeny kwa Stefana, sheelyi wo mfimu fya mbee fya Akaya, nawo mmbo valekwaata ishoreny lya ifurukannya veele.

¹⁶ Vandu sha yeva veendyeny na wo nndu narunde ando amwi nawo neekuvinisa nnu.

¹⁷ Neeny mmbo shilefura nnu kyaisha lya Stefana na Fortunata na Akaiko; mashika yeva mmbo valeshilyillya nnu kya filya fyenshaanguya yoo kwany.

¹⁸ Mashika mmbo valeviirya nrima wakwa muu nnu, na mirima yaany-da. Naasa manyiny nnu vandu sha yewo.

¹⁹ Siri ta Asia tamwiidikira. Akila na Priska vamwiidikira nnu na irina lya Nndumi, ando amwi na siri yeyo ikee efo mmba kwawo.

²⁰ Vakristo woose vamwiidikira. Kwiidikireny na kimimindo kyeele.

²¹ Ekyi nkyo kiidikiro kyakwa shakireiya na woko lwakwa shimuni.

²² Nndu moose yeto nalakunndye Nndumi, nave n-denge. Maranatha (Nndumi weeru nkufii nashe).

²³ Isarya lya Nndumi Yesu lyikae neeni.

²⁴ Ukundi lwakwa lumukaye yeni moose mukee na Kristo Yesu.