1 Vakorinto 11 - BIBILLYA Mareiyo Meele a Iruva

¹ Shilatyeny yeny shaasa na yeny shikeelatya Kristo.

Isika Nrwe Kyeeri kya Mwiindye

² Naasany nkemwitikisa, mashika elyi mukeshikummbwa kya findo fyoose, neeni mukatira mikaaye ilya ya mbee shaasa shilemuningya.

³ Kyaindi shikundye mumanyi sheelyi nrwe wa wo nndumi ni Kristo, na nrwe wa nka ni mmi wakwe, na nrwe wa Kristo ni Iruva.

⁴ Wo nndu nndumi kyeeri akeetereva, ao eereryaa vandu, kwakooya asikye nrwe, mmbo akeesuta nrwe wakwe.

⁵ Kyaindi nndu nka we eeterevaa, ao eereryaa vandu, kara nalasikya nrwe wakwe, mmbo akusuta we muni, mashika mmbo avaa sha ulya akee nkure nrwe.

⁶ Mashika nka nalasikyaa nrwe nkuti nautwa fii. Ao kwankooya nsony yuutwa nrwe, naasany, asikye,

⁷ Mashika lyo nkisumani nndumi nasikywe nrwe-fo, we ni kyaaso na itumbe lya Iruva. Kyaindi nka we ni itumbe lya nndu nndumi.

⁸ Mashika nndumi nnyaleuka kwa nka-fo, ni nka aleuka kwa nndumi.

⁹ Nta nndumi nnyaleumbwa kimaruma kya nka-fo, ni nka kimaruma kya nndumi.

¹⁰ Kyikeeny indo nkuti nka noore ngata ya ishillyo ooka nrweny kimaruma kya vasu.

¹¹ Nta nka nshi kindo kulaiyo nndumi-fo, nta nndumi nshi kindo kulaiyo nka-fo, kimaruma kya Nndumi.

¹² Mashika kwakooya nka aleutwa kwa nndumi, na nndumi nawe mmbo eerwaa ni nka. Na findo fyoose kimayeny kya vayo nkwa Iruva. Rummbweny yeni muveni efo miriminy yaany.

¹³ A kivaany nka natereve Iruva nalasikkye nrwe?

¹⁴ A-myuumbye yeyo myeni yoorye-se sheelyi nndumi katira fii shaasha ni usutu kwakwe?

¹⁵ Kyaindi nka we katira fii shaasha ni itumbe kwakwe. Mashika mmbo akee nninge fii yeto nakusikye nato ando a soori.

¹⁶ Lyo nndu moose kakunda yeende uriingyi, yese llutiri mikaaye ya ngata yeyo-fo, nta siri ta Iruva ntitiri-fo.

Kilaayo Kyeele

¹⁷ Lyo kyeeri nkeemuvia indi nshikemurumisha-fo, mashika elyi mukesanga amwi nshi kya mbusha-fo, nkya ukasha.

¹⁸ Mashika mmbo shiitye kyeeri mwakwanannya efo mmba ya Iruva mmbo muraukani, neeny nta nshilemaa-fo.

¹⁹ Mashika lyo kwany nkuti kukae-fo urere, naambo valya vesha vamanyike paa kwany.

²⁰ Naasa kyeeri mukekwaanannya nkivaa mulye shoonga ya Nndumi-fo.

²¹ Mashika wo umwi mmbo arangya iwarya, yeu mmbo atirwa nshaa neeto ungyi mmbo annangwa.

²² A mmbo mulatiri mmba tany telyiiya na teniiya? A mmbo mukeemina mmba ya Iruva, na isaveesa yewo valatiri kindo? Shamuviany, shamurumisha? Oode, kya efyo nshimurumishaa-fo.

²³ Mashika yeny filya shilewarya kwa Nndumi mfyo shilemoora, kyeyaamba, Nndumi weeru Yesu Kristo kio kilya aleriingyo mmbo aleipoo nkate,

²⁴ nawe eekimaa yaana Iruva kaufisha-fisha, kaamba, “Eu nto mwiili wakwa ukee kimaruma kyany, veny veetana indi kya ishikumbwa.”

²⁵ Naaindo veekimaa ilya kaipoo upata (lwa ina) kaamba, “Upata elu ni mma shiiya ya samu yakwa, taniny indi wo kyeeri mwiina, kive kya ishikumbwa.”

²⁶ Mashika wo kyeeri mulyaa neeniya upata elo mmbo mukeevambisa ufu lwa Nndumi kutani elyi ashewuyaa-se.

²⁷ Naasany nndu yeto ashelyaa nkate yeto ao iniiya upata elo lwa Nndumi kilasumani mmbo ankuwonisya nsindara kya mwiili wa Nndumi na samu yakwe.

²⁸ Naasa nndu nakusununde we muni, llyo nalyeny nkate neeniya upata elo.

²⁹ Mashika yeto alya na ina, mmbo alya na ina kya uvingo lwakwe muni, elyi ara nalaitumuso kya mwiili yeto.

³⁰ Kimmba niindo efo kwany veefo veengyi valoe na vafwafwa, na vengyi valellala.

³¹ Kyaindi kukooye lukumannyaa luveni shaasa lukai, llweshutyoo uvingo-fo.

³² Lyo lwishutyoo uvingo ni Nndumi akeelukapa, naambo numa lulasheutyo uvingo ando amwi na ulana.

³³ Naasany vanavama vakwa, kyeeri mukekwaanannya vereny vengyi.

³⁴ Kwakooya nndu atirwa nshaa, nalye mbele kyeny; naambo mulashekwaanannya kive kya uvingo. Efyo fyasaa-fo nshesongosiaa elyi nshaa kwany.