1 Vakorinto 10 - BIBILLYA Mareiyo Meele a Iruva

Wiikimbi lwa maruva

¹ Mashika-le vanavama vakwa, yeny nshikundye mure mulamanya sheelyi vande valya veru mmbo valeira woose kwasi ya ifishi, woose vakaira kulya yeeveny,

² woose vakabatiswa naambo vave va Mose kulya ifishiny, na yeeveny ilya.

³ Woose vakalya shoonga ilya sheni ya nrima.

⁴ Woose vakana kyeena kilya kyeni kya nrima, mashika mmbo valeniiya yoo iweny elyo lyikavakaniswa na Kristo.

⁵ Kyaindi veengyi vawo Iruva nnyalesennywa mmbo-fo, nkyo vakamamityo kulya kasa.

⁶ Naasa mbony yeto tikava nta fyaaso kweru, naambo yese lulasheeva vandu velanga maravi, shaasa na valya valelanga.

⁷ Nta mulave veindya maruva a wongo, shaasa vengyi vawo valetana; shaasa kyikee kyireiye. Vandu ewo mmbo valekaa rembo naambo valye neena, numa vakakwiipoo vafini mbasa.

⁸ Nta lulatani fya utuusi, shaasa vengyi valevetana, vakafwa vandu fiku makumi avii na varaanu nkonu umwi.

⁹ Nta lulaese Nndumi shaasa valya vengyi valetana vakalyamarwa ni shoka.

¹⁰ Nta mulakunung'uni, shaasa valya valekunung'una vakaretwa ni nreti ulya.

¹¹ Naasa findo efyo mmbo filevakooya wo fikee fyaaso fikareiyo fyelwiikimba yese va fyeeri efi.

¹² Kimmba niindo yeto akulollye sheelyi mmbo aselelyi nalole nalasheewa.

¹³ Nkwiifo kyeeso kilemusheya yeni kuuta ekyo kiinani na nndu wa vandu-fo. Kyaindi Iruva ni nsha, nalaraa mweeswa kiilanyi wiidimi lwany, na lyingyi ando amwi na kyeeso ekyo kavika-u na mwaango weesomuka-u, naambo mwiidimi isisirya.

¹⁴ Kimaruma kya efyo, vakunde vakwa, kwiiseny iindya maruva a wongo.

¹⁵ Mmbo shikeerera na vandu vatiri urango nkyekusareny nisha ekyi nkemuvia.

¹⁶ A upata lulya lwa mbora luvikyaa mbora, nshi utarannyo lwa mwiili umwi, mashika yese loose mmbo lwawarya kipereshu kya nkate yeto umwi.

¹⁷ Mashika nkate ni umwi neese lukee veengyi ni mwiili umwi, mashika yese loose mmbo lwawarya kipereshu kya nkate yeto umwi.

¹⁸ Kummbweny Vaisraeli yewo shaasa veekai kya mwiili, valya velyaa firaso, mmbo valatiri ukulungo na kitara kyerasya?

¹⁹ A shaambany-ki? Shaambany sheelyi kilya kileutwa firaso kwa mafwanu nkindo kya dede? Ao ifwanu nalyo nkindo?

²⁰ Nta kinnywa-fo mashika findo filya vafyuuta sha firaso mmbo vafiniingya varumu, nta nshi vaniingya Iruva-fo. Neeny nshikundye yeni mwaakaniswa na varumu-fo.

²¹ Mmushidimaa iniiya upateny lwa Nndumi musande na iniiya upateny lwa varumu-fo. Nta mmushidimaa ilyiiya yoo meseny a-Nndumi muvenda ilyiiya meseny a-varumu-fo.

²² Mmbo lweengye Nndumi kififi ndesa? A-mmbo lutiri finya ngota we?

Findo fyoose mfya Iruva

²³ Findo fyoose mfisha, lyo nshi fyoose fivaa-fo. Findo fyoose mfisha, llyo nshi fyoose fivangisaa-fo.

²⁴ Kulave nndu aruuya mbusha yakwe muni-fo, naruuye mbele ya vengyi.

²⁵ Wo kindo kyakumbwa singireny kulyiiyeny mulavesa-vesaa mwitirwa nnyinyira.

²⁶ Mashika ulana loose mmasaa a Nndumi amwi na fyoose fiishwe-fo.

²⁷ Naakwa nndu nalakusirye-u amwaambya kwakwe, neeni mukalanga ikaa kwakwe, kulyiiyeny wo kindo kisheendwaa mbee yaany, mulavesa-vesa nta itirwa nnyinyira.

²⁸ Lyo kwakooya nndu amuvia kindo ekyi mmbo kileutwa kiraso mulakilye-fo, nkimaruma kya yeto aleniingya na nyinyira iveu.

²⁹ Mmbo shaamba nnyinyira, nshi yafo yewe-fo, ni ya yeto ungyi. Mashika nkyiki-lyo elyi uleke lwakwa lushillywa nnyinyira ya nndu ungyi?

³⁰ Kwakooya yeny shawarya filya shaavyo shiitiri kyaanu kwa Iruva, mmbo kivaa inda shaararwa neeny shammaa yaana?

³¹ Naasany, mukalya, ao mukana, ao mukatana kindo kyoose, taniny fyoose mwing'anisaa Iruva.

³² Loleny mulasheteva Vayuda ao Vagriki nta siri ya Iruva,

³³ shaasa yeny nkesennya vandu woose findony fyoose, shilasiaa mbusha yakwa shimuni, kuuta mbusha ya yewo veengyi naambo vakooye ikirwa.