1 SAMUELI 8 - BIBILLYA Mareiyo Meele a Iruva

Vandu Vatereva Iniingwa Mangyi

¹ Samweli ekikwa mmbo alevika vana valya vakwe vavii vave valeti va Israeli.

² Wa mbee ni Yoeli, na wa kavii ni Abiya. Nawo vakakaa Beer-sheba.

³ Lyo vana yeva mmbaletana sha ndeye-fo, vakailashika, llya valelanga iwuura neeniingwa findo filasumani, vakeeveta usumanu.

⁴ Llyo vamiku woose va Israeli valevika shila, vakallatya Samweli kulya Rama,

⁵ vakammbia, “Ulaalu yewe mmbo kwammmikwa, na vana vafo mmbakeetana shaasa kulevalosha-fo. Kyasia luvikyeny mangyi sha vandu vengi naambo nalushillye.”

⁶ Lyo irero elyo llyilesenya Samweli-fo, elyi valeamba, “luvikye mangyi.” Naasa Samweli katereva Nndumi Iruva.

⁷ Naasa Nndumi Iruva kavia Samweli, “Vaniingye wo kindo vakundye. Mashika nshi yewe vakeekulema-fo, ni yeny naambo shilave mangyi waawo.”

⁸ Shaasa valeshitannya yen uka llya shilewoota. Misri vakava veerundya maruva engi, niindo ulaalu vakeekutanya yewe.

⁹ Naasa vaaranyi ninsha, lyo kuvaikimbe nnu deny, kuvavie na mikaaye ya vamangyi yewo vashevashillyaa.

¹⁰ Nalyo Samweli kavia vandu yewo marero yoo moose a Nndumi Iruva.

¹¹ Kavavia, “Nndu mangyi yeto ashillya mmbo akee indi, mmbo ashiipoo vana vany vandekaa kwakwe, valole mitika akwe, vaveva veekallya farasi takwe, na isongosya mitika akwe.”

¹² Mmbo ashevavikaa vasalallye vandu fiku five, ao makumi mave, vengi vareme nrema takwe, na yuulula fimu fyakwe, vasongosye na fisha fyakwe fya fira, na fiiya fya mitika akwe.

¹³ Na vefu vany navevaipoo vandesongosya findo fifwaamaa nng'u marashi, vaveva vekora shoonga na mikate.

¹⁴ Na marema any, na minda ya misababu, na ya miri ya mafura yoo asenyi mmwasi naniinge mashinga akwe.

¹⁵ Nookefo nawarye kodi ya fimu kwany na ya misabibu noote-fo kyeeniinga veesalallya vakwe na varundi vakwe.

¹⁶ Mmbo ashiipoo vasero vany na fishinga fyany, na ng'umbe tany eto shisha nnu, na mishungu yaany navarwaa mashoreny akwe muni.

¹⁷ Efo marondeny any a makumi mmbo ashemutosaa usanu, muve sha mashinga akwe.

¹⁸ Neeni mmbo musheiyaa kyeendo mmangyi yaany mulensauwa. “Nawe Nndumi Iruva nta nnyashemwaauwaa-fo.”

¹⁹ Llyo nta vandu yewo mmbaleiranya Samweli-fo, vakaamba, “Nshi indofo-te, yese mmbo lukundye itira mangyi tupu,

²⁰ naambo neese luve sha vandu va masanga engi, na lyingi naambo mangyi yeeru nalusalallye neeluleta neekapana fira teru.”

²¹ Samweli kaaranya marero moose yoo a vandu yewo kandearuuya Nndumi Iruva.

²² Nndumi Iruva kavia Samweli “Aranya unyanga lwawo kwavavikya mangyi.” Llyo Samweli evia vandu va Israeli, “Wo nndu neende kyeny kwakwe ulaalu.”