1 SAMUELI 6 - BIBILLYA Mareiyo Meele a Iruva

Isanduku lya Kyaasa Lyaviirwa

¹ Isanduku elyo lya Nndumi Iruva mmbo lyilekaa kwa Vafilisti ando a miiri mfungare,

² Vafilisti vakavaanga vakohani vawo na vasavi vawo vakaamba, “Alukatana inda na isanduku elyi lya Nndumi Iruva?” Luvieny shaasa lulyiviiraa kwa vayo.

³ Nawo vakaamba, Mukammbiira isanduku elyo lya Iruva wa Israeli mulalyiviire ruu-fo. Nkuti musandeu na firaso fya urekwa, llyo mukyaa mumanyi na kimaruma woko lwa Iruva lukamurovya.

⁴ Nawo vakavesa, “A firaso efyo fya urekwa lurwaa mfya ngataki?” Nawo vakaamba, “Lusongosye mafwanu a moore a sahabu araanu, na makokoi a sahabu araanu, sha yeekyena lya vakohani Vakifilisti, mashika llya saka ya makokoi ilemusheya moose.”

⁵ Nkyo songosieny mafwanu yoo a moore na a makokoi fya filelyamara uruka, indo llyo musheng'anisaa Iruva yeto wa Israeli, nawe kive llyo asheelelisaa ngapo yeyo ya woko lwakwe, kive kyeni kweru na kwa maruva eru na uruka lweru.

⁶ A nkiki elyi mukeyuumisa mirima yaany sha Vamisri na Farao waawo, llya valemaa isisya Vaisraeli lyo nta valakunde ivara veende?

⁷ Kyasia ulaalu songosien yikari, mwiipoo na ng'umbe ivii ta malela tilandeomwe ikumbi lyeerema, to ngashe ta vayo mutire-fo,

⁸ llyo mukamareny ikari elyo lya Nndumi Iruva mulyivike efo ikariny ando amwi na findo efyo fya sahabu efyo fya kiraso kya urekwa, murwaa ando amwi na isanduku elyo, lyiluuke-te.

⁹ Na kwakooya ikari lyarwa na shia ya nnyanuny yeenda Betshemeshi, naasa lumanyi mmbwe Iruva wa Israeli yeto alelutannya uravi yelo uniini, lyo kyanra kilava indo, llyo lumanyaa nshi woko lwakwe-fo, ekyo mmbo kyekee nkindo kya nrenga-da.

¹⁰ Naasa vandu valya vakatana indo. Vakeepoo ng'umbe ivii tikeekamwa, ngashe tikarewa mmba. Vakafingya ng'umbe tilya ikariny.

¹¹ Vakavika isanduku llya ikariny ando amwi na mafwanu alya a moore na makokoi.

¹² Nato ng'unde yeto tikasora shia ya Bethshemeshi to sheni, tikasora shia shoorotu tiishaanaa kulore tosangya taari yei ao yei na makohani va Vafilisti vakavasora numa fika alya Beth-shemeshi.

¹³ Na vandu va Beth-shemeshi veevyaa nganu kulya imungony llya valelollya isanduku llya vakafura nnu.

¹⁴ Nalyo ikari llya lyikafika ireminy lya Yosua wa Beth-shemeshi, lyikasalalau kweni iweny iniini. Vakababara firi fya ikari llya, vakaipoo ng'umbe tilya tikava kiraso kyeekora na muro kwa Nndumi Iruva.

¹⁵ Naasa Valevi vakasota isanduku lya Nndumi Iruva ando amwi na findo filya fya sahabu fyeekee nalyo, fyo vakafivika yoo uwe ya iwe llya iniini, nalyo vandu va Beth-shemeshi vakoota firaso fyeekora na muro, vakashishya Nndumi Iruva kiraso nkonu yeto mweni.

¹⁶ Nawo vashilyi yewo varaanu va Vafilisti veekilollya efyo, vakawuya na Ekron nkonu yeto mweni.

¹⁷ Elyi llyo yeekyena lya mafwanu alya a moore Vafilisti valoota ave kiraso kya urekwa. Ashdoni vakarwaafo lyimwi, Gaza lyimwi, Ashikeloni lyimwi, Gati lyimwi, na kwa Ekron lyimwi.

¹⁸ Na makokoi alya na sahabu kimwi na yeekyena lya miri ya Vafilisti ya vashilyi valya varaanu: Nayo yekee miri itiri turuve. Na iwe elyo iniini yoo valevika isanduku lya Nndumi Iruva nng'u lyikai fika inu alya ireminy lya Yosua wa Beth-shemeshi.

¹⁹ Naasa Nndumi Iruva kawaa vandu va Beth-shemeshi, mashika elyi valelola kulya isandukuny lya Nndumi Iruva vakafwa vandu makumi mfungare. Na vandu va Beth-shemeshi vakakapa kiiyokimaruma kya elyi Nndumi Iruva alevarumata king'ani indo.

Isanduku lya Mavavaso kulya Kiriath Jearim

²⁰ Vakaamba, “Ni vi ashidimaa isalala mbee ya Nndumi Iruva yeu akee Iruva mweele? A mmbi arumwaa namuute kweru?”

²¹ Naasa vakaruma varumi veende kwa vandu va Kiriath-yearimu, vavavie, “Vafilisti valya vammbiira isanduku llya lya Nndumi Iruva, kyasia sokeny mushelyoondwa.”