1 SAMUELI 5 - BIBILLYA Mareiyo Meele a Iruva

Isanduku lya Kyaasa kwa Vafilisti

¹ Naasa Vafilisti vakeepoo isanduku lya Iruva uka alya Ebenezeri vakandelyifita Ashdodi.

² Vakandelyivika mmba ya iruva lyawo lyivangwaa Dagoni lyikakaa yoo uvaany lwa Dagoni eto.

³ Kyeeri vandu va Ashdodi valekupoo elyi lya ndesi, ate Dagoni ammbwa yoo si kifulufulu yoo mbee ya isanduku llya lya Nndumi Iruva Vakeepoo ifwanu llya lya Dagoni vakalyisaleesa alya lyeekai.

⁴ Llya valekupoo lyingi elyi lya ndesi ya vayo vakavekooya-se, ate Dagoni ammbwasi kifulufulu alya mbee ya isanduku lya Nndumi Iruva, na nrwe wa Dagon na fidau fya maako fikarumbuka fikawa yoo mwaangony, Dagoni lyikasaau mwiili mweni.

⁵ Nkyo fika inu vakohani va Dagoni na yewo vashaangaa efo mmba yakwe mmbavaryaa yoo mwangony wa mmba ya Dagoni fika inu-fo.

⁶ Nawe Nndumi Iruva kakunda ikaba vandu va Ashdodi kavarovya nnu, kavatannya meesi, kavarikya moore, efo Ashdodi na minyanuny ya vayo.

⁷ Vandu va Ashdodi veekilollya kive indo vakaamba, “Llukundye isanduku lya Iruva wa Vaisraeli lyikae kweru-fo, mashika allutannya findo firoo nnu, yese na Dagoni weeru.”

⁸ Naasa vakaruma vandu vandesang'irya varundi na vakohani wa Vafilisti vakaamba, “Lukatana inda na isanduku elyi lya Iruva wa Israeli?” Nawo vakarouwa vakaamba, “Isanduku elyi lya Iruva wa Israeli lyirawa Kathi.” Vakalyisamisa.

⁹ Vekimaa ilyisamisa, woko lwa Iruva lukakapa muri yeto vandu vakasavaa nnu, vakakapwa mmoore woose vadu na vaniini.

¹⁰ Vakawuya vakeepoo isanduku lya Iruva fika Ekron. Kyeeri isanduku elyo lyilefitwa Ekron vandu va vayo vakakapa kyoorongye vakaamba, “Mmbo mulelweengye isanduku lya Iruva wa Israeli naambo valumamite loose.”

¹¹ Vakaruma vandu vandesang'irya makohani woose va Vafilisti, vakaamba, “Uteny isanduku lya Iruva wa Israeli kweru, lyeende kwa vayo, lyilasheeluwaa yese na vandu veru, Mashika vandu va muri woose mmbo valesavaa, woko lwa Iruva lukavarovya deny.”

¹² Valya kulore valefwa vakatirwa mmoore. Kiiyo kyawo kikang'ana nnu.