1 SAMUELI 30 - BIBILLYA Mareiyo Meele a Iruva

Fira na Vaameleki

¹ Naasa Davidi na vandu vakwe vekifika Siklagi kummirau mikonu iraru, Vaameleki mmbo venkapa Negebu na Silagi Vakakapa Siklagi na yuukora na muro.

² Vakakamara vaka woose mifungwa, lyo mmbalevawaafo.

³ Naasa kyeeri Davidi na vandu vakwe valefikau, ate muri wankorwa na muro na vaka vawo vankamarwa, na vana woose va kyuumi na va kika,

⁴ Llyo Davidi na vandu valya veekee nawe vakakapa kiiyo kiniini, kutani vasiiyo mfinya deny, valakiidimaase iiya.

⁵ Naakwa ni vaka valya va Davidi Ahinoamu wa Yezreeli na Abikaili, ulya ekee nka wa Nabali wa Karmeli.

⁶ Davidi keereve nnu, mashika vandu maata mmbo veekundye nakapo na mawe, veetinnywo nnu n'kya vana vawo na vaka vawo. Lyo we Davidi kakukaarisa na ivika Nndumi Iruva nsia, we Iruva wakwe.

⁷ Nalyo Davidi kavia Abiatari, “Nkye sheengye isara llya lya nkohani-te.” Nawe Abiatari kamweengye.

⁸ Davidi kavesa Nndumi Iruva, “A ndesa shavingya vasikari yewo numa nshevakooyaa?” Nawe kammbia, “Yee vavingye kushevakooyaa, nalyo nkuti kuvasoke findo fyoose kuviire.”

⁹ Naasa Davidi keenda na vandu mayana arindaru ekee nawo fika alya mureny wa Besori, nang'u vandu maata vakasaau,

¹⁰ Lyo Davidi keengera yeenda na vandu mayana aana, mashika vandu mayana avii mmbo valelemwa kufii na yuuma, valaidimi iruuka mura yeto wa Besori.

¹¹ Elyi veefo vashendaa vakakooya nsoro umwi wa Kimisri, vakamweengye Davidi, vakaniinga nsoro eto shoonga na mura.

¹² Vakanniinga-se nkate na fivale fivii fya sabibu. Llya alemaa ilya kawuiyo mmuu, mashika mmbo emmaa mikonu iraru nalakomba kindo.

¹³ Naasa Davidi kammbesa, “Mmbo kukee wavi na nkwi kuukye?” Nawe kammbia, “Yeny ni Mmisri, shava ishinga lya nndu Mwameleki.” Nndumi wakwa mmbo aleshiisityou mashika elyi sheelwee mikonu yei iraru.

¹⁴ Yese mmbo lulendekapa kulya Negebu ya Vakereti ikee ya Yuda, na Negebu ya Kalebi, na muri yeto wa Siklagi lukaukora na muro.

¹⁵ Davidi kammbia, “A yewe kushiidimaa ishitetere kutani shandekooya vasikari yewo?” Nawe kammbia, “Lyo kushilyiiye mboo na irina lya Iruva sheelyi nkushiwaa nta ishiviira kwa nndumi yeto wakwa-fo, llyo shikutetereeny kundevakooya.”

¹⁶ Naasa eevateteree indo kandekooya vasikari yewo veenyanyakye koose veelyaa na ina, vakavika sikukuu mashika a findo fiingi valekamara mifungwa woota kwa Vafilisti na urukeny lwa Yuda.

¹⁷ Nawe Davidi kavakapa apookya ivishivishi lya nkwaany fika nkwaany wa elyi lya nrondo. Nkwiifo nta umwi waawo alekya-fo, kuuta vasero mayana aana nsi valesaama ngamula vakarisha.

¹⁸ Davidi kavasoka vandu woose valya venkamarwa ni Vaameleki, kaviira na vaka valya vakwe vavii.

¹⁹ Nta nkwiifo kindo kilereka-fo, nta nndu-fo. Kava n-du ao nniini. Vandu yewo mmbo valesokwa findo fyoose vemmiipoo. Davidi kaviira fyoose.

²⁰ Davidi keepoo moonri na ng'umbe fikasongoya efyo fingi, vakaamba, “Elu ni waavi lwa Davidi.”

²¹ Naasa veekiwuya vakashekooya vandu valya mayana avii valemwa yeenda na Davidi, vakarewa alya mureny wa Besori. Vandu yewo vakasomukya naambo vandevaambya, nawe Davidi kasha kufii nawo kaveedikira.

²² Naasa vandu vakasha, nnang'ani ya valya valeenda na Davidi, vakaamba, “Kimmba vandu yeva kulaore valeenda neese, lluvaniingaa nta kindo kimwifo. Nndu mmbo awaryaa nka wakwe na vana vakwe, naasa.”

²³ Naasa Davidi kaamba, “Oode nyira, indo nkivaa-fo, mulasheetana indo kya findo efyo Nndumi Iruva aleluwonisya-fo, mashika mmbwe aluwonisya kya isarya lyakwe, kavika vasikari yewo maakony eru.”

²⁴ A mmbi ashiirikyaa itana kindo kya ngata yeyo mwaamba? “Mashika waavi lwa nndu eenda fireny nkimwi na lwa yewo veeringa kyeny.”

²⁵ Nakyo kyikava indo nkonu yeto na numa ya vayo. Lyikava llyo ivavaso lya Israeli woose fika inu.

²⁶ Naasa Davidi eekifika Siklagi karwaaya vamiku va Israeli na vambuya vakwe waavi lwa findo efyo fileutwa fireny, kavavia, “Lolen-te findo fisha luleniingwa ni Nndumi Iruva,”

²⁷ mmbo valya vekee Beteli, na va Ramot-Negebu, neewo va Yatri,

²⁸ na va Aroeri na va Sifmothi na yewo va Eshtemoa,

²⁹ na va Rakali, neewo va miri ya Vayerameeli, na va miri ya Vakeni,

³⁰ na va Horma, na va Korashani, na va Ataki,

³¹ na va Hebron, na va wo ando Daudi eeshi vandu vakwe vakai.