1 SAMUELI 3 - BIBILLYA Mareiyo Meele a Iruva

Nndumi Iruva Asheya Samweli

¹ Nawe mwana ulya Samweli karundya Nndumi Iruva eekee na Eli. Nawo vandu mmbeishi irero lya Nndumi Iruva nisha kyeeri kilya-fo, nta mmbensukuyo vakamanya nisha-fo.

² Naasa nkonu umwi kyeeri Eli eelele (na miso akwe mmbo empooka ifwa nalaidimi-se ilollya),

³ nalyo nkwemmiila-fo, lyo we Samweli enndelala kulya mmba ya Nndumi Iruva, kufii na isanduku llya mavavaso.

⁴ Nalyo Nndumi Iruva kavaanga Samweli, nawe kammbia, Ekakau shikee yaa,

⁵ Samweli kasora Eli kammbia, “Ekakau shansha.” Eli kammbia, “Nshalekuvaanga-fo, endelala.” Keenda kandelala.

⁶ Naasa Nndumi Iruva kammbaanga lya kavii, “Samweli, Samweli-ro!” Nawe kakupoo kandesora Eli lyingi, kammbia, “Ekakau shansha elyi kwashivaanga.” Nawe kammbia, “Nta nshi yeny shakuvaangafo mwanakwa, kweengye kwandelala.”

⁷ Nalyo kyeeri eki Samweli nnyemmanya Nndumi Iruva-fo nta irero lyakwe llyenkoora nawe-fo.

⁸ Naasa Nndumi Iruva kammbaanga lya kararu, nawe kakupoo kavesora Eli-da, kavemmbia, “Ekakau shansha elyi kwashivaanga.” Naasa llyo Eli alesukukyo neemanya yeto ni Nndumi Iruva ekevaanga mwana ulya.

⁹ Naasa llyo Eli alevia Samweli, “Endelala, na kwakooya akuvaanga lyingi kummbie, kwaambaye Nndumi Iruva, nsero wafo ekau eetye.” Naasa Samweli kandelala-se

¹⁰ Nalyo Nndumi Iruva kasha lyingi kammbaanga sha llya mbee, “Samweli, Samweli.” Llyo Samweli aleamba, “Kwaambaye Nndumi Iruva, nsero wafo ekau eetye.”

¹¹ Nalyo llyo Nndumi Iruva alevia Samweli, “Kwiishi, mmbo nkundye itana kitere kunu Israeli, neeto moose ashiitaa kya vayo navavyo.

¹² Llyo kyeeri nsheinutyaa filya fyoose shilerera kya mmba ya Eli, fyoose fiinukye.

¹³ Mashika shilemmbia mmbo nshekabaa mmba yeyo yakwe llung'anu, kyeendwo ni uravi lulya nawe muni alwiishi, mashika vasero vakwe mmbo valekweengye kidengo wo veni, lyo we nalakunde nta ivaikimba.

¹⁴ Neeny shallya mboo kya mba ya Eli, sheelyi nta firaso na fyeekora murony mfimaa isangya na yuuta uravi yelo-fo, fika llung'anu.”

¹⁵ Naasa Samweli kalala kukakya elyi lya ndesi, karua mmba ya Nndumi Iruva. Lyo Samweli nalakare ivia Eli mbony yeto alevyo.

¹⁶ Nalyo Eli kavaanga Samweli kammbia, “Samweli mwanakwa.” Nawe kammbia, “Ekakau shikee yaa.”

¹⁷ Kammbesa, “A mmbony-ki alekuvia? Mmbo shakutereva nnu na irina lya Iruva kulashisurumi nta irero lyimwi-fo lya yoo alerera neewe-fo.”

¹⁸ Naasa llyo Samweli alemmbia findo fyoose Nndumi Iruva alemmbia. Nawe Eli kaamba, “Nawe Nndumi Iruva, navekutanya shaasa kyammusenya.”

¹⁹ Samweli keengera itumaa eekayo ni Nndumi Iruva, nta nalare irero lyakwe lyimwi.

²⁰ Nawo Vaisraeli woose uka ndoo Dani fika Beer-sheba kulya sinde vakamanya sheelyi Samweli mmbo akee nkisuku wa Nndumi Iruva.

²¹ Nalyo kulya Shilo vandu vakapooka yiiryaa Nndumi Iruva mashika elyi Nndumi Iruva alekoora-fo na Samweli. Nawo Israeli vakaaranya Samweli nisha.