1 SAMUELI 29 - BIBILLYA Mareiyo Meele a Iruva

Vafilisti Valema Davidi

¹ Naasa Vafilisti vakakusang'irya itorito kulya Afeki, Na Israeli nawo vakamannya ulale alya usokeny lwa Yezreeli.

² Nawo vashilyi varaanu va Vafilisti vakaira mbee, vekee mayana na fiku, numa yaawo kasha Davidi na vandu vakwe, na mangyi Akishi kafurumya.

³ Naasa vasongoru va Vafilisti vakaamba, “Vaebrania yeva nkyoki vakeetana yaa?” Nawe Akishi kavia vasongoru va Vafilisti, “A yeu nshiwe Davidi ekee nsero wa Sauli mangyi ya Israeli nawe mmbo akee neeny mikonu yei, yee myaaka, neeny nta nshilelollyaa ukasha lwakwefo, uka elyo asheshoolokya?”

⁴ Lyo vasongoru va Vafilisti vakasua na Akishi, vakaamba, “Mmbiire nanderunda ekyo kummbavasye, naleende neese-fo, mmbo ashevaa nsindara weru fireny, ive nnyo shia yakwe ya yiitana na Nndumi Iruva wakwe, na shia ingai? Ndesa ni shia ya mirwe yei?.”

⁵ A yen nshiwe Davidi ulya valemwiimbya neefina, vakaamba, Sauli mmbo alewaa fikufyakwe, Na Davidi kawaa fiku makumi akwe?

⁶ Nalyo Akishi kavaanga Davidi, kammbia, “Shaasa na Nndumi Iruva eeshi lyo yewe kukee nndu nsha, Na mashora afo kunu urundiny lwa askari mmbo luleshisenya nnu, nta nshilelollya ukasha lwafo uka nkonu ulya kulesha kwakwa fika inu-fo.” Lyoony, vasongoru yewo mmbakukundye-fo.

⁷ Naasa, ulaalu kuwuiye na ufoo, naambo vashilyi yewo va Vafilisti valasheisua.

⁸ Naasa Davidi kavia mangyi Akishi, “A yeny nkyoki shalyamara?” Kwakooya kulare kulellollya ukasha lwakwa uka llya shilesha kwafo, a nkyoki kishiimaa shileende neewe Nndumi Iruva wakwa mangyi shindekapa vakiduva wafo?

⁹ Akishi kammbia, “Shiishi shamanya yewe mmbo kuvakye nsu wa Iruva, kwakwa yeny,” lyo vasonguru yewo va Vafilisti mmbo vaamba, “Yeu naleende neese fireny-fo.”

¹⁰ Nkyo yewe kwiipoo ngama shuru ando amwi na vandu yewo kuriani nawo. “Nkyo yeni moose muleuka kwa Sauli wuyen ngama elyi kwiikyaa.”

¹¹ Nawe Davidi kakwiipoo elyi lya ngama shuru, we na vandu vakwe, vakeenda, vakawuya kulya urukeny lwa Vafilisti. Nawo Vafilisti vakarwa na Yesreeli.