1 SAMUELI 27 - BIBILLYA Mareiyo Meele a Iruva

Davidi Akee kwa Vafilisti

¹ Numa ya yeefyo fyoose, Davidi kaamba, “Sauli asheshiwoo nkonu umwi.” Kisha kyakwa ulaalu niinderishya urukeny lwa Vafilisti, naambo noote-u pa deny yeeshikooya elyi ashiruuyaa kunu Israeli koose nashiture, shikkye iwaawa mmbwe.

² Nalyo Davidi kakupoo na vandu yewo vakwe mayana arindaru, kandefika kwa Akishi mwana wa Maoki ekee mangyi ya Gati.

³ Davidi kakaa efo Gati na Akishi, we na vandu vakwe. Nawe Davidi eeriani na vaka valya vakwe vavii, Ahinoamu wa Yezreeli na Abikaili wa Karmeli, ulya ekee nka wa Nabali.

⁴ Nawe Sauli kashefityo mbony kavio Davidi mmbo anrishya kulya Gati, nta we nalakinsore-fo.

⁵ Davidi kavia Akishi, “Kwakooya kwanshiwarya mmbo shakutereva kushiniinge ando kwekaa, muriny umwi wa kunu mareminy, shikae-fo, mashika nkivaa yeny nsero wafo shikae muriny wa kimangyi ando amwi na mangyi-fo.”

⁶ Llyo Akishi enniinga muri uvaangwa Fiklagi. Nkyo kimaruma muri wa fiklagi ukee muri wa vamangyi va Yuda fika inu.

⁷ Nafyo fyeeri Davidi alekaa kulya urukeny lwa Vafilisti fyeefikye mwaaka umwi na miiri yiina.

⁸ Veekee kulya vandu va Davidi vakavesoka indekapa Vageshuri na Vagirisi, na Vaameleki mmbo vekee vandu va uruka elo, uka Telemu fika Shuri na kundefika Misri.

⁹ Nawe Davidi kakapa uruka elo, nalare-fo nta nndu, kava nndumi ao nka. Keepoofo findo fyawo ng'umbe na mburu na mishungu ngamula na masara eeraa, kawuyany kwa Akishi.

¹⁰ Nawe elyi awuyaa Akishi mmbo avembesaa, “Inu nkwi mwandekapa-se?” Nawe Davidi kammbia, “Nkulya taari ya Negebu Yuda na Negebu ya Vayerameeli, ao Negebu ya Vakeni.”

¹¹ Davidi nnyekiva nndu-fo, vengi mmbo ekeveende kulya Gati kaamba valasheende uriingi, vaambe, “Niindo Davidi aletana, shaasa eeshivye itana llya alekaa kulya urukeny lwa Vafilisti.”

¹² Nawe Akishi kasennywa n'Davidi, kaamba, “Mmbo ansukya vandu va Israeli deny, nkyo Davidi mmbo asheshirundyaa llung'anu.”