1 SAMUELI 24 - BIBILLYA Mareiyo Meele a Iruva

Davidi atirisha muu wa Sauli

¹ Kyeeri Sauli alewuya ooka irishisa Vafilisiti, mmbo alevyo, “Davidi akee kulya kasa ka Engedi.”

² Naasa Sauli kasauwa vandu va Israeli fiku firaru keenda nawo iruuya Davidi kulya mbangeny ta mburu ta ngoroshony.

³ Sauli kafika ando kutanywa mfiri wa moonri mbai ya shia kweiyo mbanga, kaanga mbangeny indekweekya. Davidi na vandu vakwe mmbo vekee mbangeny yeyo efo nsau deny.

⁴ Vandu valya va Davidi vakammbya, “Akau nkonu ulya Nndumi Iruva ekuvia, ‘Lola-te, mmbo shikurambikyaa nkinduva wafo maakony afo, neewe kuntanyi ekyo kukikundye.’” Davidi kakupoo kaivellye karummbwa ikedu lya soori ya Sauli.

⁵ Indi numa ya vayo Davidi kavavywa ni mmu elyi enrummbwa soori ya Sauli.

⁶ Davidi kavya vandu vakwe, “Nndumi Iruva ashiidimisye naambo shilatannyi mangyi yakwa mwaambe mafura ni Nndumi Iruva kindo kyeesi-fo, nta shilaoroye woko lwakwa nndu mwaambe mafura ni Nndumi Iruva tara-fo.”

⁷ Naasa Davidi kafwerisa vandu valya vakwe na marero yaa, nnyalevaniinga muumu wa ikapa Sauli-fo. Na Sauli kasalala kasomuka kulya mbangeny keenda kyakwe.

⁸ Numa nawe kasomuka kulya mbangeny, kavaanga Sauli kammbya; “Mangyi-akwa, nndumi wakwa!” Na Sauli kainduka kalla numa, Davidi kafiirya ndi ellaa sumbai kya iindya.

⁹ Naasa Davidi kavya Sauli, “a nkikyi kusharannya marero a vandu yewo vaamba, ‘lola deny Davidi mmbo akunndye ikumamita-se?’”

¹⁰ Lola ulaalu shaasa Nndumi Iruva akurambikya maakony akwa kulya mbangeny, na vandu vakwa maata vakashaaya naambo shikuwee fuku, kya-indi yeny shakulyillya. Shaamba, “Nshishooroyaa Mangyi mwaambe mafura ni Nndumi Iruva woko lwakwa-fo.”

¹¹ A-nkye lola-te ndeye wakwa, lola kirami kya soori yafo kunu wokony lwakwa, mmbo shilekirummbwa sooriny yafo kya indi nshilekuwaa-fo, kumanye kya dede sheelyi nshitiri ukasha loose na yewe-fo. Nshilekulyamarya-fo, lyo yewe mmbo kukee iruuya ishiwaa.

¹² “Nndumi Iruva arummbwe kyakwa na yewe, we muni akutaiye kiduva. Kya indi yeny nshishipoo woko lwakwa kimaruma kyafo tara-fo

¹³ Kummbwa kyaaso kya vakuu mmbo kyaamba indi, ‘Weesi mmbo lutawaa ni vandu veesi.’ Kya indi yeny nshikutannya kindo kyeesi tara-fo.

¹⁴ Ulaalu-le mangyi ya Israeli, lola nndu yeu kukunndye imuuta muu. A mmbovi kukee inruuya ngata yei? Mmbo kukee-iruuya ikite ifu? Mmbo kukee-iruuya kitamango?

¹⁵ Naasa Nndumi Iruva arummbwe muni nnang'ani yakwa na yewe. Alole mbony yei ashikapannye na ishikira maakony afo.”

¹⁶ Kyeeri Davidi alemaa irera, Sauli kaonisa unyanga kammbya, “Mwana-akwa Davidi, yelu ni unyanga lwafo?” Sauli kaonisa unyanga kaiya.

¹⁷ Kavia Davidi, “mmbo kukee nsumanu ngota yeny, mashika mmbo kwashitannya mesha, indi yeny shakutannya meesi.

¹⁸ Neewe inu kwammamba paa shaasa kulera ishiwaa llya Nndumi Iruva aleshirambikya maakony afo.

¹⁹ Mashika-le; nndu kaarama nkiduva wakwe mmbo anraa neende kippwa? Nkyony Nndumi Iruva akuvikye mbora kya ekyo kwashitannya nkonu yeu.

²⁰ Ulaalu shammanya kya dede deny sheelyi mmbo kushevaa mangyi ya Israeli na umangyi lwa Israeli lushenangaa tapu wokony lwafo.

²¹ Kya indi shilyiyya mboo na irina lya Nndumi Iruva sheelyi nkushemamitaa ngyeeri yakwa, nkushereveesa irina lyakwa nta iisitywa kwaasha mmba ya nde wakwa-fo.”

²² Davidi kalyisya Sauli mboo. Naasa Sauli keenda kyeny, indi Davidi na vandu vakwe vakawuya kulya mbangeny.