1 SAMUELI 23 - BIBILLYA Mareiyo Meele a Iruva

Shaasa Davidi Aleauwa Muri wa Keila

¹ Nalyo Davidi kashefityo mbony kyeyaamba, “Vafilisti mmbo vakeekapana kulya Keila vakaipoo na nganu tikee muunguny.

² Llyo Davidi alevesa Nndumi Iruva, ‘Sheenda-ro mmbee shindekapa Vafilisti yewo?’ Nawe kammbia, ‘Yee, kweengye kundekapa Vafilisti yewo, kwaauwe muri wa Keila.’”

³ Lyo vandu va Davidi vakammbia, “Yese yaa Yuda mmbo lweereiye Keila.” A nshi kivaa kikasha mmwasi kwakooya lweenda-fo indekapana na Vafilisti?

⁴ Nawe Davidi kavesa Nndumi Iruva lya kavii, nawe Nndumi Iruva kammbia, “Kwiipoo kweenda Keila, mashika nshevikaa Vafilisti yewo maakony afo.”

⁵ Nalyo Davidi kakupoo na vandu vakwe vakeenda Keila, vakakapana na Vafilisti. Vakatira ng'umbe tawo, neewaa vandu veengi nnu deny. Niindo Davidi aleauwa vandu va Keila.

⁶ Llya Abiatari we mwana wa Ahimeleki alerishya kwa Davidi mmbo alesha eerye masara a kikohani.

⁷ Nalyo Sauli kandefityo mbony sheelyi Davidi nkulya Keila akai. Sauli kaamba, “Ulaalu Iruva mmbo ammuvika maakony akwa, kimmba ni efo mmbo akai, muriny ukee nraye ukaringityo riti ukarayo nisha.”

⁸ Sauli kavaanga vandu vakwe woose naambo vandesoka na Keila vankape, vandeshingillya na Davidi na vandu vakwe.

⁹ Davidi nawe kaveemanya-da, nkasha yeto Sauli akundye intannya, naasa kavia nkohani Abiatari, “Ende isara elyo lya nkohani na yaa.”

¹⁰ Naasa Davidi kaamba, “Woi Nndumi Iruva, Iruva wa Israeli mmbo shammiita deny sheelyi Sauli mmbo akundye ishekaapa Keila kimaruma kyakwa yeny nsero wafo.”

¹¹ A ndesa Nndumi Iruva vandu va Keila mmbo vashirambikyaa maakony akwe? Woi Nndumi Iruva wa Israeli shakutereva, rambuya ishinga lyafo lyimanyi. Nawe Nndumi Iruva kavia Davidi, “Yee n-dede Sauli akeesha.”

¹² Nalyo Davidi kaamba, “Ale Nndumi Iruva, vandu va Keila mmbo vasheshivikaa yeny na vandu vakwa maakony a Sauli?” Nawe Nndumi Iruva kammbia “Yee, niindo vashetanaa.”

¹³ Nalyo Davidi na vandu vakwe vakooka kulya Keila veeruuyaa kwa yeenda. Lyo Sauli alefityo mbony kavio? Davidi anrisha, nkyo nawe karafo yeenda Keila.

Davidi Urukeny lwa Mafumbu

¹⁴ Naasa Davidi kanderishya urukeny lwa fidooro fya Zifu kakaa mbangeny. Nawe Sauli kava annduyaa wo nkonu, lyo Nndumi Iruva nnyalemmbika maakony akwe-fo.

¹⁵ Davidi kalollya Sauli mmbo akeesomukya naambo namuute muu, lyo we kakukaya kulya kasa ka Zifu kulya Horeshi.

¹⁶ Nalyo mwana wa Sauli, Yonatan kandesora Davidi kulya Horeshi, kammbiirya muu na marero a Iruva

¹⁷ kammbia, “Kulairyae nta kinnywa-fo, mashika nde, Sauli nnyakukooyaa-fo Yewe mmbo kushevaa mangyi ya Israeli neeny shive wa kavii kwafo.” Naakwa ni nde Sauli niindo eeshi,

¹⁸ Nawo ve vavii vakavikyana kyaasa mbee ya Nndumi Iruva. Davidi keengera ikaa efo Horeshi, lyo Yonatan we kakuwuiya na kyeny.

¹⁹ Naasa vandu va Zifu vakarwa na kwa Sauli kulya Gibea, vakandemmbia, “A Davidi yeto kukenduuya nshi we ulya oovye kasa kweru kulya Horeshi, kidoorony kya Hakila, taari ya sinde ya Yeshimoni?

²⁰ Kyasian woi mangyi, sokaany nafo shaasa kukukundyaa kumuni, neese lushemmbikaa maakony a mangyi.”

²¹ Sauli eeta indo kasennywo kavavia, Nndumi Iruva namuvikye mbora, elyi mwasheekya.

²² Ulaalu nkye endeny shamutereva, mundesuma waarya mumanyi ando alalaa, llyo muwuye-se na kwakwa, neeny nshekupoo neeni.

²³ Mashika kyeeri kyoose elyi akee kunu urukeny elu mmbo nshesallwaa efo nkukeny wa vandu va Yuda shinnduuyaa.

²⁴ Nawo vakawuya na Sifu mbee ya Sauli. Lyo we Davidi na vandu vakwe vendekaa kulya kasa ka Maoni, mfo Araba taari ya sinde ya kasa eko.

²⁵ Nalyo Sauli na vandu vakwe vakannduuya. Kukava vandu vavia Davidi, kandekaa mbangeny efo Maoni. Sauli ekimanya indo kandellaya-fo efo kasa ka Maoni.

²⁶ Sauli keenda taari yei ya ifumbu na Davidi na vandu vakwe vakareveka na taari yeyo ingi, vakaangusya Deny yuuka efo kimaruma kya yiiryaa Sauli Mashika Sauli na vandu vakwe mmbo vekundye ishingillya Davidi na vandu vakwe naambo vavaware.

²⁷ Kikeeny indo kasha nrumi umwi kwa Sauli, kammbia, “Wuya, osho uviny, Vafilisti vammboya uruka.”

²⁸ Kyasia Sauli karafo isora Davidi, kawuya nandekapana na Vafilisti. Nkyo ando alya kukavaangwa “Selahamalekoti.”

²⁹ Naasa Davidi karwa ooka nafo kandekaa turuveny ya Engedi.