1 SAMUELI 21 - BIBILLYA Mareiyo Meele a Iruva

Davidi arisha kooka kwa Sauli

¹ Davidi kookau keenda kwa nkohani Ahimeleki kulya Nobu. Nawe Ahimeleki kallollya kandemwaambya eereremaa, kammbia, “A nkiki elyi kukee kumuni kulariani nta na nndu mwikwiimya?”

² Davidi kavia nkohani Ahimeleki, “Mmbo kwiifo kindo mangyi ashivavasya,” kaamba, “Kulave nndu moose amanya, kya kindo eki nkeekuvavasya-fo.” Llyo neeny shavavasya vasero vakwa vanderunda ishora lyingi.

³ A nkyoki kutiri. Nkyeshiwonisya mikate iraanu ao shoonga ingi kukooyaa kutiri.

⁴ Nawe ukohani ulya kavia Davidi, “Nshitiri mikate yeelya kyen-fo, kuuta yeyo myeele myeni. Muiwonisaa lyo kwankooya vasero vafo valandesange na vaka.”

⁵ Nawe Davidi kavia nkohani, “Mikonu yei iraru lulandesange na vakafo.” Na findo fya vasoro yeva fyoose mmbo fyekee fyeeremutu, neese lukakaa kyaarony. A fiiya fyeru nshi fileva fyeeremutu mmwasi?

⁶ Naasa llyo nkohani alenniingya mikate ilya myeele, kimmba ileefo mikate ingi kuuta yeyo. Nayo ikootwa alya mbee ya Nndumi Iruva na ando a vayo ivikwau mikate miiya.

⁷ Naasa kweefo nndu umwi wa vasero va Sauli, ensaa yoo mbee ya Nndumi Iruva. Nndu yeto ni Doegi, nawe Mmwedomu, nawe ni nsongoru wa veesi va Sauli.

⁸ Naasa Davidi kavia Ahimeleki, “Yaa kukai kwiiyo usu ao ifumu? Mashika yeny nshirye usu nta fisha fyakwa-fo, mashika shaasa mangyi ashiruma mmbo shakupoo tiny.”

⁹ Nkohani kammbia “Usu llwa lwa Goliati ulya kulemmbwaa kulya imungon lya Ela, ekalu yaa, lukeewoososye soori yaa numa ya soori ya nkohani. Kwankunda ilwipoo, warya, mashika yaa nkwiyoo usu lungi kuuta elu-fo.” Naasa Davidi kammbia, “Shiniingya, mashika nkwifo lwiilanyi elu-fo.”

¹⁰ Naasa Davidi kookau kandoovya mashika a yiirya Sauli. Kaengya mangyi ya Gati avaangwaa Akishi.

¹¹ Vasero va Akishi vakammbia, “A yeu nshi Davidi akee mangyi ya uruka?” Muleeta kiimbo kyakwe-se kiimbwa kikaambawa, “Sauli alewaa fiku fyakwe.” Na Davidi kawa fiku makumi.

¹² Davidi kadollya marero yoo moose nrwen wakwe, kawuya yiirya mangyi ya Gatiwe Akishi.

¹³ Kakwaalasha vai nave sheelyi nrwe ukee nkasha, kaarwa-arwa myaango na ngyala, neesurutya maare efo nguyony.

¹⁴ Llyo Akishi alevia vandu vakwe, “Mulollye, yeu ni nndu wa ukwale.” A nkiki elyi mulemoora kwakwa?

¹⁵ A yeny mmbo shitiri mashora-ki na vandu va ukwale, na yeu mmbo asha kwakwa nasheoryau ukwale lwakwe? Yeu alalaa mmba kwakwa dede?