1 SAMUELI 17 - BIBILLYA Mareiyo Meele a Iruva

Goliati Aruuya Vaisraeli Mwaandu

¹ Naasa kyeeri eki Vafilisti vakakuumba kufii na muri wa Soko wa Yuda, yoo nnang'ani ya Soko na Azeka muri wa Efes-damimu vandekabana na Israeli.

² Nawe Sauli na Israeli vakakuumba kulya imungony lya Ela vandekapana na Vafilisti.

³ Vafilisti vakasalala uwe ya ifumbu taari imwi na Vaisraeli vakakaa ifumbuu taari yeyo ingi.

⁴ Nalyo nndu mbafu wa Vafilisti avaangwa Goliati wa Gati kava mwaasha kufii meta isaru.

⁵ Karaa kofia ya minya na findo fyeeraa firoo nnu fikavetira wuuru uniini nnu.

⁶ Mmbo eeree findo fya minya fika efo marendeny, na ifumu lyakwe likava iroo, lya minya.

⁷ Na munyi wa ifumu lyakwe mmbo weewakkye kyiri kya mwiifuma soori, nrwe wa ifumu lyakwe mmbeefye shekeli mayana arindaru a minya na mwiintirya ngao mbee.

⁸ Na Goliati kasalala kakoomya itorito va Israeli kaamba, “Mmbo mwasomukya mwushekapana-ro.” Yeny mmbo shikee Mfilisti neeni mukava mashinga a Sauli. Nkyesauweny nndu umwi nashekwaananya neeny,

⁹ Kwakooya eedima ikapana neeny neeshiwaa, llyo yese loose lushevaa mashinga any. Lyo kwakooya yeny shammbinga neemmbwaa, yeni muve mashinga eru, mulurundye.

¹⁰ Mfilisti ulya kawuya kaamba, “Inu mmbo shamina itorito lya Israeli deny, sauweny nndu-te, shikapani nawe.”

¹¹ Naasan Sauli na Israeli woose veekiita marero yoo a Mfilisti yeto vakasavaa na yiiryaa nnu deny.

Davidi Kambiny kwa Sauli

¹² Nalyo Davidi we mwana wa nndu wa kulya Efrata nkyo kyuungo kya Betlehemu ya Yuda, eevaangwaa Yese, we mmbo eetiri vana va kyuumi nyanya, nawe Yese kyeeri eki kya mangyi Sauli mmbo emmikwa deny.

¹³ Na vana valya vakwe vaniini va kyuumi mmbo vemmeenda na Sauli fireny. Na marina awo ni, Eliabu, mmbwe wa mmbee, wa kavii ni Abinadabu, wa kararu ni Shama.

¹⁴ Davidi we mmbo ekee n-du wa yewo vengi woose. Yewo vasongoye iwonika mmbo valeenda na Sauli fireny.

¹⁵ Nalyo Davidi kava ashendaa kwa Sauli neewuya-wuya indelola moonri a ndeye kulya Betlehemu.

¹⁶ Nawe Mfilisti ulya kava asomukyaa mbateny wo nkonu ngama na nkwaany ando a mikonu makumi aana.

¹⁷ Nalyo Yese kavia mwana wakwe Davidi, “Enda rwaaya vana va mau bakuri yei ya piisi na mikate yei ikumi kulya vakai ulaleny.”

¹⁸ Na nsongoru yeto waawo kunrwaaye mafura yaa moomu. Endevalole shaasa veefo kusheshivia.

¹⁹ Nawe Sauli na vandu woose va Israeli mmbo veekee kulya imungony lya Ela veekapanaa na Vafilisti.

²⁰ Kyasia Davidi kakuboony elyi lya ngama shuru, kareeya mwiisa moonri mburu eto tawo, keepoo findo efyo keenda shaasa ndeye emmbavasya. Keenda kakwaananya na mitika yawo veendekapanaa, veekabaa ukoru lwa fira.

²¹ Veesreli na Vafilisti vakakuumba vakapani yeva kunu na valya kulya.

²² Davidi kara findo fyakwe kwa nringyi va findo, kavingya itorito lyilya numa, kavakooya, kaidikira vanavamaye.

²³ Elyi eefo areraa na vanavamaye mbafu ilya ya Vafilisti ikasomukya, mmbwe Goliati wa muri wa Gati, nawe ni wa itorito va Vafilisti, karera marero alya meni eeshivye irera a imina Vaisraeli, nawe Davidi keeta kilya arera.

²⁴ Llya vandu va Israeli valelollya mbafu yeyo woose vakarisha veereremaa.

²⁵ Vakaamba, “Nyira, mwalollya nndu ulya? We mmbo asha nashearara Israeli. Kyasiany, nndu yeto ashiidimaa immbwaa mangyi mmbo anniingaa usimba lwiilanyi-dwa, namwoorise mfu wakwe, na vandu va mmba ya ndeye vakweengye urerwa kunu Israeli.”

²⁶ Naasa Davidi karera na vandu valya vekee kufii nawe kaamba, “A nndu ashiidima iwaa Mfilisti yeu nkyoki aniingwaa elyi oota Israeli fyaararony efyo fyakwe? Mfilisti yeu naleeshi Iruva nkyoki deny kutani eedima yaarara vandu va Iruva akee na muu?”

²⁷ Na vandu yewo vakavemmbia sha valya vengi-da kya nndu ashewaa mbafu yeyo.

²⁸ Nawe mwanamaye Eliabu keeta llya Davidi ekeerera na vandu valya. Karooywo n'ngoo kimaruma kya mwanawo Davidi kammbia, “Nkyoki kyakusota na kunu-ro? A moonri mmbi kwanreeya kulya kasa? Yeny mmbo shiishi ukushobi lwafo, na nrima yeto wafo shaasa ukai, mashika kyakweende vai ni ishelola fira.”

²⁹ Davidi kammbia, “A ekyo shauta-u kikasha nkyoki?” Shalola fira mmbo kikee kindo kikasha?

³⁰ Nawe Davidi keendukya nndu ungi kammbesa sha valya vengi, nawo vakavendouwa indo-da.

³¹ Marero alya Davidi alerera eekimanyika vandu vakandevia Sauli, karuma nndu Davidi nandevaangwa.

³² Davidi kavia Sauli, “Kulave nta nndu umwi eeryaa kimaruma kya mbafu yeyo-fo. Yeny nsero wafo mmbo nkundye yeenda shindekapana na Mfilisti yeu.”

³³ Sauli kammbia, “Ra, yewe nkushiidimaa nta kinnywo indekabana na mbafu yeyofo.” Mmbo kukee n-du nnu, indi nndu yeto mmbo akee nndu wa fira uka udu lwakwe.

³⁴ Davidi kavia Sauli, Kishinga kyafo kyeeri kyeeshisaa moonri a ndeeye mmbo kyesheyo nngare, ikatira yoonri lyakwe.

³⁵ Mmbo sheilatya, shaikapa neeisoka yoonri efo kaniny kya vayo. Kwakooya yashikillya yeny shaitira masauru yoo a vayo shaikapa kutani yafwa.

³⁶ Nsero wafo mmbo alemmbwaa miiso na ngare-da, nawe Mfilisti yeu nalaishi Iruva mmbo ashevaa sha mafisi yoo shilewaa, kimmba alearara vandu va Iruva yeu akee muni muu.

³⁷ Nndumi Iruva yeto aleshikira shilasheeranduwa mmiiso na ngare yeto, mmbwe asheshaauwaa maakony a Mfilisti yeu. Sauli kavia Davidi, “Nkye kweengyeny, nawe Nndumi Iruva nakusongoye.”

³⁸ Llyony Sauli alevika Davidi masara akwe a fira na kofia ya minya.

³⁹ Davidi karaa usu lwakwe, kakwiishivira yeenda, mashika llyo alepooka ifiraa. Davidi kavia Sauli, “Nshishidimaa yeenda shiree indi-fo, mashika nshilenkwiishivira ifiraa lyingi-fo.” Davidi kakuuta fyoose.

⁴⁰ Davidi keepoo nsengye wakwe, kasauwa na songoro isaanu ta mureny, kativika mbolokony yakwe ya yiisa mburu kasandau na ukova lwa yeera iwe. Nalyo kasorany Mfilisti ulya.

Davidi Avinga Goliati

⁴¹ Naasa Goliati kasembeya kufii na Davidi nndu ulya eekurikye ngawo yakwe kansongoya.

⁴² Kyeeri Goliati alelola efo neefo kalollya Davidi, kammina deny, mashika illya aleva mwana nkoo-da, adodorye kasenya kisangu.

⁴³ Mfilisti yeto kammbia, “A mmbo shava kite elyi kwashisheya na nsengye?” Mfilisti yeu kadenga Davidi na irina lya maruva akwe.

⁴⁴ Goliati kavia Davidi, “Osho shisora, nyama yafo inu mmbo ilyiwaa nndeye-ta nginiiu na mafisi a ngoroshony.”

⁴⁵ Davidi nawe kavia Mfilisti yeto, “Yewe mmbo kwashisheya na usu na ifumu kya indi yeny mmbo nkeekusheyaa na irina lya Nndumi Iruva muni matorito akee Iruva wa Israeli yeto kulemwaarara.

⁴⁶ Inu Nndumi Iruva mmbo akeekuvika maakony akwa, shikukape neekurummbwa nrwe, neenu yeni shiniinge ndeye na mafisi a uruka minying'a ya Vafilisti yewo vafo, llyon ulana loose lushemanyaa sheelyi kwiifo Iruva va dede kunu Israeli.

⁴⁷ Na vandu woose va ulana llyo vashemanyaa sheelyi Iruva nnyakira na usu na ifumu-fo, mashika we ni Nndumi Iruva wa fira namuvike yeni maakony eru.”

⁴⁸ Nalyo llya Mfilisti yeu alekwiipoo kasembeya nasore Davidi, llyo na Davidi nawe aleangusya isora Vafilisti naambo nakooye Goliati.

⁴⁹ Davidi koota songoro mbolokony, kaivika ukoveny kalyeera, kakapa nalyo Mfilisti ulya yoo kisanguny, lyikaanga nawe kawa si na kisangu.;

⁵⁰ Niindo Davidi alevinga Mfilisti ulya na iwe lyeero na ukova, kankapa kammbwaa. Nta Davidi nnyerie usu wokony lwakwe-fo.

⁵¹ Davidi karisha kandesaama yoo uwe ya Mfilisti yeto, kasomwa usu, kammarisya kookafo kanrumbwa nrwe. Vafilisti veekilollya mwaafinya waawo antuulwa vakarisha.

⁵² Nawo vandu va Israeli na Yuda veekilollya indo vakakapa ukoru, vakavingya Vafilisti yewo fika muriny wa Gati na fika ngiriny ya Ekron. Na Vafilisti valya valekapwa vakawa efo shieny ya Shaarimu, na Gati na Ekron.

⁵³ Vana va Israeli vakawuya wooka yuumbuta Vafilisti, vakashetira findo na uraa.

⁵⁴ Davidi kaipoo nrwe wa Mfilisti yeto fika Yerusalemu lyo fisha fyakwe kafirwaa kyeny.

Davidi eendwa kwa Sauli

⁵⁵ Naasa llya Sauli alelollya Davidi eshendaa ilatya Goliati kavia nniini wa itorito we Abineeri, “Ale Abineeri, mwana yeu Davidi ni wa vi?” Abineeri kammbia, “Nshimanyaa-fo, woi mangyi.”

⁵⁶ Mangyi kammbia, “Enda vesany kumanyi mmbwa vi.”

⁵⁷ Nawe Davidi llya alewuya ooka iwaa Mfilisti ulya, Abineeri kammbwarya, kanrwaa kwa Sauli, nawe eerye nrwe wa Mfilisti ulya efo wokony.

⁵⁸ Naasa Sauli kammbesa, “Ale mwana, kukee wa vi-ro?” Nawe Davidi kammbia, “Yeny mmbo shikee mwana wa nsero wafo Yese, nndu wa Betlehemu.”