1 SAMUELI 15 - BIBILLYA Mareiyo Meele a Iruva

Fira na Vaameleki

¹ Numa ya vayo Samweli kavia Sauli, “Nndumi Iruva mmbo aleshiruma shikwaambe mafura kuve mangyi ya vandu vakwe va Israeli.” Kyasia ulaalu aranyany unyanga lwa Nndumi Iruva.

² Nndumi Iruva muni matorito mmbo aamba indi, Mmbo shivikye findo fyoose nrimin shaasa Vaameleki valetannya vandu vakwa va Israeli, shaasa valekukikisa shia valeere, llya vekesaama wooka Misri.

³ Naasa ulaalu kwiipony kundekapa vaameleki kulyamare findo fyoose deny, efyo fyawo, muvawaa, nta mulavare-fo, womi na vaka fika na kimwana kishoongaa, ng'umbe, maanri, ngamula na mishungu.

⁴ Naasa Sauli kavaanga vandu kulya Telemu kaveekena mmbo vasikari vafrasi mayana avii, na vandu va Yuda fiku ikumi.

⁵ Nalyo Sauli kandefikya muri wa Vaameleki, vandu vakandeovya imungony.

⁶ Sauli kavia Vakeni, “Yeni ukeny-fo mukurauwe na Vaameleki yewo, shilasheemumamita ando amwi nawo, mashika yeni muletannya Israeli mesha llya valesaama wooka Misri.” Nalyo Vakeni vakakurauwa na Vaameleki.

⁷ Sauli kakapa Vaameleki uka Haufa fika Shuri kufii na Misri.

⁸ Katira na Agagi we mangyi ya Vaameleki akee na muu, kamamita vandu woose noosu.

⁹ Sauli na vandu vakwe vakasarya Agagi, na suva tilya shivanri na ng'umbe, findo fivanri fyoose vakafira nta valafilyamare. Lyo filya fifwafwa mfyo-da valefilyamara.

¹⁰ Naasa llyo Irero lya Nndumi Iruva lyilesheya Samweli lyikammbia,

¹¹ “Mmbo kishisukye elyi shilesauwa Sauli nave mangyi ya Israeli mashika elyi alakivandami neeny, nta nalalatyaa shaasa shilemmbavasya.” Samweli eeta indo kafulukywo, katereva Nndumi Iruva kio kyoose.

¹² Samweli kakwiipoo elyi lya ndesi nanderera na Sauli. Samweli kavio sheelyi Sauli mmbo aleenda kulya Karmeli, kandesaleesa-fo iwe lyeekumbura, naasa kandesoka na Gilgali.

¹³ Samweli kandesora Sauli, nawe Sauli kavia Samweli, “Nndumi Iruva nakuvikye mbora, shamminutya ivavaso lya Nndumi Iruva.”

¹⁴ Samweli kammbia, “A kyoorongye yekyo suva na ng'umbe tishaanaa nkyeeki ekyo shikiitye?”

¹⁵ Sauli kammbia, “Vandu mmbo valefyuuta kwa Vaameleki naambo vashefyuutya Nndumi Iruva firaso, nto ng'umbe shisha na suva shisha, neefyo fingi fyo lukafimamita deny,”

¹⁶ Samweli kavia Sauli, “Raany shikuvie kindo Nndumi Iruva aleshivia kio eki.” Nawe kammbia, “Nkyeamba.”

¹⁷ Samweli llyo alemmbia, “A llya kweelollye-da shaasa kwekee n-du wa vana va mau, lyo kwavikwa nniini wa vandu va Israeli woose.”

¹⁸ Nawe Nndumi Iruva kakuruma kakuvia, “Endamamita Vaameleki yewo va kiila deny, kuvakape vamamike deny,”

¹⁹ “A nkiki elyi kulore kuleiranya unyanga lwa Nndumi Iruva, lyo yewe kwalanga-fo findo fivanri, kwalyamarya Nndumi Iruva?”

²⁰ Sauli kavia Samweli, “Mmbo shilelatya ivavaso lya Nndumi Iruva deny, shatira mangyi Agagi shamweende, lyo wo Vaameleki shavamamita deny.”

²¹ Na vandu veru vakasauwa-fo findo fivanri, mburu na ng'umbe, naambo fisheniingyo Nndumi Iruva waawo kulya Gilgali.

²² Nalyo Samweli kaamba, A Nndumi Iruva mmbo asennyo mfiraso fyeekora na muro ngota yaaranya unyanga lwakwe? Lola, iindya Nndumi ntorya ngota firaso Na yaaranya ngota mafura a ndafu.

²³ Ilema yiita nkimwi sha ulyamari lwa usavi na itira ngoo shuumu nkimwi na itira maruva a wongo Kimmba kwallema irero lya Nndumi Iruva “Nawe ekato ankulema kulakivese mangyi.”

²⁴ Llyo Sauli alevia Samweli, “Mmbo shilelyamara elyi shilefuluta ivavaso lya Nndumi Iruva, na marero yoo afo nang'u, mashika lyo yeny mmbo shilesora ekyo kya vandu yewo.”

²⁵ Nkyo ulaalu mmbo shakutereva kushifwaaye kya ulyamari lwakwa. “Shiwarya lyingi kushiviire kwa Nndumi Iruva.”

²⁶ Samweli kammbia, “Nshishiidimaa ikuwarya-fo, mashika mmbo kulemina irero lya Nndumi Iruva, nawe Nndumi Iruva kakulema yewe, kulakive mangyi ya Israeli.”

²⁷ Na kyeeri Samweli aleinduka, Sauli katira ikedu lya isara lyakwe nalyo lyikaranduka.

²⁸ Naasa Samweli kammbia, Inu Nndumi Iruva mmbo arandwa umangyi lwafo lwa Israeli indo, nawe kaluniingya vamrasa wafo akwiilanyi na mesha.

²⁹ Nawe yeto akee finya ya Israeli nnyashaambaa wongo fo, nta nnyawuyaa numa-fo, mashika we nshi sha nndu wa vandu-fo kwaambe ashaalashikaafo.

³⁰ Sauli kaamba, “Shallyamara deny, lyo shakutereva kushoore wiindi mbee ya vamiku va vandu yeva vakwa na mbee ya Israeli.” Kusange neeny, naambo shiindye Nndumi Iruva wafo.

³¹ Naasa Samweli kairikya isanga nawe, Sauli kaindya Nndumi Iruva.

³² Naasa Samweli kaamba, sheengyeny Agagi na yaa. Naasa Agagi mangyi ya Vaameleki keenda nang'u ekee nkaari nriminy, Agagi kaamba, “Unyaasi lwa ufu lwammuutwa eefwa.”

³³ Lyo Samweli kammbia, kilya kulekitana vaka vakafiiyo mmbana vawo, niindo-da inu na mau ashefiyyoo sha vaka vengi. Naasa Samweli kanrumbwa fyenga yoo mbee ya Nndumi Iruva kulya Gilgali.

³⁴ Numa ya vayo Samweli keenda kulya Rama. Nawe Sauli karwa na kyeny kwakwe kulya Gibea ya Sauli.

³⁵ Nta Samweli nnyalekikwaananya na Sauli-fo fika ifwa lyakwe. Lyo Samweli kaiya kimaruma kya Sauli. Nndumi Iruva kalollya nkiki elyo alevika Sauli nave mangyi