1 SAMUELI 10 - BIBILLYA Mareiyo Meele a Iruva

¹ Naasa Samweli kawara wombe lwa mafura kaletya Sauli nrony, kammiminda, kaamba, “A Nndumi Iruva nshi akwaamba mafura kuve mangyi ya vandu vakwe va Israeli?” Kushillye vandu va Nndumi Iruva, kuvaute efo maakony a vakiduva vawo. Neeki shakutannya nkyo kyoora sheelyi ni Nndumi Iruva akwaamba mafura kusalallye ding'u yakwe.

² Elyi kukeyuuka yaa kwakwa mmbo kukwaanannyaa na vandu vavii alya kufii na kifu kya Raheli, yoo nnyanuny wa Benyaminy kuvaangwaa Selsa. Yewo mmbo vashekuviaa mishungu ilya yaany kundo ilelollyo. Nawe ndoo ulaalu nta nnyakikee kusara kya mishungu-fo, mmbo akeekusara kyany, kaamba, “A shatana inda kya mwana yeu wakwa?”

³ Kwammuuka yaa endefika alya nriny wa Tabori, nang'u kushekooyaa vandu vararu, vakeerwa na mmba ya Iruva ya Beteli, umwi arye mburu isaru, neeto ungi arye mikate iraru, noongyi arye mboloko ya mfinyo.

⁴ Nawo mmbo vakwiidikiraa vakuniingye mikate ivii, kuiwarye.

⁵ Llyo kufike ando a yiindya Iruva kulya Gibea kufii na turuve ya Vafilisti, Neelyi kwiifo kushaafukyaa muriny llyo kushekwaananyaa na vakisuku veeshuukaa yiindya Iruva, veerye finanda na ngoma, na fivale. Nawo kukooyaa veeshaawuyaa fisuku.

⁶ Nato mumuyo wa Nndumi Iruva mmbo ushekusheyaa na finya kwaawuye fisuku ando amwi nawo, kwaalashike kuve nndu ungi deny.

⁷ Neewe tana shaasa kulollye kyeeri efyo fishetanyikaa, mashika ni Iruva akee neewe.

⁸ Neeny mmbo nshekusongoyaa kweende Gilgali, kuveningya kiraso kyeekora na muro, kuveshisha kiraso kya ufoo. Kwiirishe ando a mikonu mfungare kutani sharera neewe shikuvavasye kyeetana.

⁹ Nawe Kyeeri aleenduka neende, ngyende eto tikakoora nkonu ulya mweni.

¹⁰ Naasa llya valeafukya Gibea vakasheyo nironda lya vakisuku, nawe kasheyo mmumuyo wa Iruva na finya nnu kaawuya fisuku.

¹¹ Naasa valya veemwiishi elyi valelollya kive indo, eeshaawuyaa fisuku na vakisuku valya, vakaamba, “A nkyoki eki kyasheya mwana wa Kishi?” A Sauli nawe mmbo akee nkisuku?

¹² Nndu umwi Karouwa, kaamba, “A nde waawo ni vi?” Llyo kukakaafo sumu yeamba, “A Sauli ni nndu wa Vakisuku?”

¹³ Ekimaa yaawuya kandefika ando alya kwa yiinda Iruva.

¹⁴ Naasa mwanawo wa ndeye kavesa Sauli na nsoro ulya wakwe, kavavia, “Nkwi mwauka?” Kammbia, “Mmbo lwanderuuya mishungu, lwiikiitura lukasora nkisuku Samweli.”

¹⁵ Nawe kammbia, “Nkyeshivia kindo Samweli amuvia”

¹⁶ Llyo Sauli alemmbia, “Mmbo aleluvia mishungu ilya yankooywo” Lyo mbony ta iva mangyi shaasa alevio n'Samweli to nnyaletisenda-fo.

Samweli Avikwa Mangyi

¹⁷ Naasa Samweli kavaanga vandu woose kulya Mispa mbee ya Nndumi Iruva wa Israeli,

¹⁸ kaamba indi, “Mmbo shiloota vana va Israeli kulya Misri, shavawouwa maakony a Vamisri vandu veevalamyaa.

¹⁹ Kyeendi ulaalu mmbo wukeelema Iruva waany, lyo we mmbwe ashiidimaa imuuta efo ngatareny tany na makiva any, Neeni mukammbia, ‘Nshi indo-fo, luvikye mangyi.’ Kyasia ulaalu oshony mbee ya Nndumi Iruva, amuri vandu vany woose.”

²⁰ Naasa Samweli kasanyirya vandu woose va Israeli yoo akai

²¹ Ufyari lwa Benyaminy lukavikwa mbai yoo kufii nawe na va mmba ya Matri nawo vakeendwa yoo kufii nawe, wo umwi waao. Nawe Sauli mwana wa Kishi kavikwa mbai, valamanyi kundo akai.

²² Vakavesa Nndumi Iruva, vakammbia “Kwiifo nndu umwi nalakee yaa?” Nawe Nndumi Iruva kavavia, “Kwiifo ungi aovye ando.”

²³ Vakarisha vakamweende. Nawe llya alesalala alya vanduny, mmbo akee mwaasha ngota vandu vengi woose.

²⁴ Samweli kavia vandu, “Mulollye nndu yeu alesauwa ni Nndumi Iruva, nta nkwiyyo nndu akee nsha sha we-fo.” Vandu woose vakakapa ngaya vakaamba, “Ai Mangyi!”

²⁵ Nalyo Samweli kavia vandu mbony ta ushilyi lwa mangyi kareiya kyitabuny, kakivika yoo mbee ya Nndumi Iruva. Samweli ekimaa kasama vandu wo umwi keenda kyeny,

²⁶ Na Sauli nawe keenda Gibea na ironda kya vandu lyikamwiimya, mmbo yewo Iruva enrera nawo.

²⁷ Lyo vakakaafo vandu va tangalu vaamba, “A yeu mmbo ashelweekyaa-ki?” Vakammina valemweengye kindo kyeembia kwasha mangyi.