1 SAMUELI 1 - BIBILLYA Mareiyo Meele a Iruva

Elikana na Mmba Yakwe Kulya Shilo

¹ Kweifo nndu wa kulya Rama, wa ufyari lwa Sufi, mfo urukeny lwa mafumbu lwa Efraimu, evaangwa Elikana wa Yerohamu, mwana wa Elihu wa Tohu wa Sufu wa ufyari lwa Efraimu.

² Nawe Elikana mmbo etiri vaka vavii, wa mbee ni; Ana na wa kavii ni Penina. Penina eetiri vana lyo Ana we ekee kyuumba.

³ Elikana kava mwiirwa na mmba ya Iruva indeindyafo Iruva wo mwaka kava mwiyuntya Nndumi Iruva firaso kulya Shilo. Na vana valya vavii va Eli wo Hofni na Finehasi vekee vakohani va Nndumi Iruva kulya Shilo.

⁴ Nkonu ukamfika wa Elikana iniingya firaso, mmbo aniingyaa nkaakwe Penina waavi na vana vakwe kiwo, va kyuumi na va kika.

⁵ Lyo we Ana mmbo anniinga waavi kavi mashika elyi eenkundye mmwasi, llya elyi kulore eetiri mwana.

⁶ Lyo nka yeto ungyi mmbo emiinaa deny kambavisa nriminy, mashika elyi Nndumi Iruva emwiimye.

⁷ Naasa mmi waawo katana indo wo mwaka kyeeri eerwa indeendya Nndumi Iruva yeto ungyi kava mwimmina, nawe kaiya neelemwa ilya shoonga.

⁸ Naasa mmi wakwe Elikana kammbia, Ana, nkyoki kukeiya kwalemwa neelya shoonga? Ekyi kyakurovya indo nkyoki? A lyeny kwafo yewe shiilanyi vana ikumi-se?

Hana na Eli

⁹ Naasa kakupoo kyeeri valemaa ilya shoonga na ina, keenda mmba ya Iruva kakooya nkohani Eli yoo mwaangony.

¹⁰ Nawe nka ulya Ana mmbo eerovyo deny efo nriminy wakwe, katereva Nndumi Iruva kaiya nawe nnu.

¹¹ Kavika kyaasa kyakwe kaamba, “Woi Nndumi Iruva muni matorito, kwakooya kwalola ukiva lwa kishinga kyafo, kushikumbwe, kure kulashirekyo, kushiniinge kimwana kya kyuumi, llyo neeny nsheningaa Nndumi Iruva mwana yeto nave wakwe muu wakwe moose, nta weembe llusheiraa nrweny wakwe-fo.”

¹² Naasa elyi eefo aterevaa indo kulya mmba ya Nndumi Iruva Eli kallola yoo kaniny.

¹³ Ana mmbo ekeerera efo nriminy kweni lyo firomu fikapaayapaaya, nawe Eli kakusara mmbo anangyo mmbwari.

¹⁴ Naasa Eli kammbia, “A mmbo kunangwaa indi fika indi? Lakana na mfinyu eto wafo.”

¹⁵ Nalyo Ana karouwa kammbia, “Oode-te yeny mmbo shirovyo nriminy, nshiniiye nta kindo kinangaa-fo, mmbo sharambuya Nndumi Iruva nrima wakwa.

¹⁶ Kulasheekusara yeny kishinga-fo ni wa tangalu, mashika kimaruma kya ngatara yakwa neerovyo lyakwa ni indo shekeerera fika ulaalu.”

¹⁷ Llyo nkohani Eli alembia, “Kweengye na ufoo, nawe Iruva wa Israeli nakulyimye ekyo kwatereva,”

¹⁸ Nawe kammbia, “Naasany kulashilolle kikasha,” Nawe Ana kakweengya kalya shoonga nisha na kisangu kyakwe kikeela.

Ivonika lya Samwelyi na Kyaasa

¹⁹ Elyi nraasi vakakupoo, Elikana na va mmba yakwe vakandetereva Nndumi Iruva vakawuyany nakyeny kulya Rama Elikana kakaa na nka wakwe nawe Nndumi Iruva kankumbwa.

²⁰ Kyeeri kyakwe kikiinana kakufinga kaira mwana wa womi, kambaanga Samueli, nkyo kyaamba, “Nnyeli shilentereva kwa Nndumi Iruva.”

²¹ Naasa llyo Elikana na va mmba yakwe woose vakarwa na kulya Shilo indeutya Ndumi Iruva firaso, na yiinutya kyaasa kyakwe.

²² Lyo we Ana nnyalerwa mbele-fo, we mmbo alevia mmi indi, “Yeny nshikeerwa mbele-fo, mmbo shiveraa kutani shaota mwana, llyo nsherwaa nave kwa Nndumi Iruva nandekaa-fo deny,”

²³ Naasa Elikana we mmi wakwe kammbia, “Kyasia, tanany shaasa kwalollya, kutani mwana ara yoonga, nawe Nndumi Iruva nakweekye yiinutya kyaasa ekyo.” Naasa koota mwana wakwe fika kyeeri aletorika.

²⁴ Eekimaa intora kamwiipoo ando amwi na shau ya myakaa iraru, vakarwa na Shilo, ando amwi na kilo ikumi ta nswa na shupa ya mfinyo, fika mmba ya Nndumi Iruva na mwana ulya ekee n-ndu.

²⁵ Veekimaa ishisha shau yeyo llyo vakeende mwana kwa nkohani Eli.

²⁶ Kaamba, “Kwiishi le mbee, yeny mmbwe nka ulya alesalala kufii neewe eetereva Nndumi Iruva.

²⁷ Mmbo shiletereva mwana yeu kwa Nndumi Iruva, nawe kaaranya fiterewo fyakwa.

²⁸ Nkyo neeny shaniinga Nndumi Iruva mwana yeu kyeeri kyoose kya muu wakwe.” Naasany vakeendyany Nndumi Iruva.