1 Petro 5 - BIBILLYA Mareiyo Meele a Iruva

Ironda lya Iruva

¹ Kya vamiku yewo vakee efo kwany, yeny shikee mmiku uroyeawo, na nkureekyi wa makiva a Kristo na mwakana itumbe llya lyishesukuwaa paa elyi numa; mmbo shamoolokya,

² mwiise na isalallya nisha ironda elyo lya Iruva lyikee kwany, nta mulavaa sheelyi mwaitikywa, kyaindi mutani indo kyikee kya ikunda shaasa Iruva akundye; nta nshi kya fesa ya ntambo-fo, lyo kive kya nrima.

³ Nta mulasheeva sha vekwaallwa vanndumi efo fyuungony fyawo-fo, mashika mmbo mukundywa muve kyaaso kisha efo irondeny lyany.

⁴ Na elyi Mwiisi yeto nniini ashelollywaa paa, mmbo mushewaryaa ureto lwa itumbe llwa lulanaa.

⁵ Kiwo-da na yeni mukee vakoo, irikyeny vamiku. Yee, yeni moose raeny ngata ya ikunyiisa, llyo mushidimaa irundyana nisha, mashika Iruva mmbo alema yewo vekung'anisa, lyo yewo vekunyiisa kavasimba isarya lyakwe.

⁶ Kyasia kunyiisyen yoo wokony lwa Iruva lukee ulyimbi, naambo namwipoo elyi kyeeri kifikaa.

⁷ Mukeeny indo muvenrika we mario any moose, ni elyi we akee ikuvinisa nnu kyany yeni.

⁸ Veny na mwiiyanu muvelala shoovi; mashika nkumbi yeto waany we mmbishwa, mmbo avakye miiso idinaa, itivaa-tivaa efo na efo iiruyaa nndu inratwe-ratwe.

⁹ Lyo yeni kaaryeny, munlemi na kyikusiryo, manyiny ukiva elo lyo weni lukee ilollyo kwa vanavamaye vany yaa ulaniny.

¹⁰ Na Iruva yeto muni isarya lyoose, yeto alemuvaanga naambo mwaange itumbeny lyakwe lya llung'anu kwi Kristo, mwammaa ilyiso ukiva kyaangu, we muni mmbo ashemuselevendee, na imuvika kiringisyo, na imusimba finya.

¹¹ Wiidimi llwakwe llung'anu kufike llung'anu. Amen.

Kya ifurumya

¹² Barrwa yei mmbo shamureiya na woko lwa Silvanu, mwanamaye weeru akee nsaari, nng'u marero yoo maangu, naambo shiikyimbe na ikureeka-u sheelyi yelyi llyo isarya lya dede lya Iruva. Na yeni salaleny mukusirye-u.

¹³ Siri shisauwe ni Iruva ya kunu Babilony yamwiidikira, na nsero wakwa, we Marko kiwo.

¹⁴ Kwiidikireny na kimimindo kya ukundi. Unapwe lukae kwany yeni moose mukee nnang'ani ya Kristo. Amen.