जखर्‍या 5 - पवित्र शास्त्र RV (Re-edited) Bible (BSI)

उडता पट

¹ मी पुन्हा डोळे वर करून पाहिले तेव्हा पाहा, एक उडता पट दृष्टीस पडला.

² त्याने मला विचारले, “तुला काय दिसते?” मी म्हणालो, “मला एक उडता पट दिसतो, त्याची लांबी वीस हात व रुंदी दहा हात आहे.”

³ तो मला म्हणाला, “ह्या सर्व देशाला प्राप्त होणारा शाप तो हा पट आहे; चोरी करणार्‍या सर्वांना ह्या लेखानुसार एका बाजूने घालवतील व खोटी शपथ वाहणार्‍या सर्वांना ह्या लेखानुसार दुसर्‍या बाजूने घालवतील.

⁴ सेनाधीश परमेश्वर म्हणतो, मी हा पट चालवला आहे, तो चोराच्या घरात व माझ्या नामाची खोटी शपथ घेणार्‍याच्या घरात शिरेल; तो त्याच्या घरात बिर्‍हाड करून राहील आणि त्याच्या तुळयांचे व चिर्‍यांचे भस्म करील.”

एफातली स्त्री

⁵ मग माझ्याबरोबर भाषण करणारा दिव्यदूत पुढे येऊन मला म्हणाला, “आता आपले डोळे वर करून काय जात आहे ते पाहा.”

⁶ मी विचारले, “हे काय आहे?” तो म्हणाला, “ही चालली आहे ती एक एफा1 आहे.” आणखी त्याने म्हटले की, “ही सर्व देशभर त्यांचे प्रतिरूप आहे.”2

⁷ मी आणखी पाहिले तेव्हा शिशाचे वाटोळे झाकण काढले असून एफामध्ये एक स्त्री बसलेली आहे असे माझ्या दृष्टीस पडले.

⁸ मग तो म्हणाला, “ही स्त्री दुष्टता आहे.” तेव्हा त्याने तिला एफामध्ये कोंबून तोंडावर शिशाचे वाटोळे झाकण बसवले.

⁹ मग मी डोळे वर करून पाहिले तेव्हा पाहा, दोन स्त्रिया निघाल्या, त्यांच्या पंखांत वारा भरला होता; त्यांचे पंख करकोच्याच्या पंखांसारखे होते; त्यांनी ती एफा उचलून आकाश व पृथ्वी ह्यांच्या मधल्या मार्गाने नेली.

¹⁰ मग माझ्याबरोबर भाषण करणार्‍या दिव्यदूताला मी विचारले, “ते ती एफा घेऊन कोठे जात आहेत?”

¹¹ तो मला म्हणाला, “शिनार देशात तिच्यासाठी घर बांधावे म्हणून ती एफा ते नेत आहेत; ते तयार झाले म्हणजे ती तेथे तिच्या स्थानी स्थापतील.”