स्तोत्रसंहिता 94 - पवित्र शास्त्र RV (Re-edited) Bible (BSI)

दुर्जनाला शासन व्हावे म्हणून प्रार्थना

¹ हे पारिपत्य करणार्‍या देवा, परमेश्वरा, हे पारिपत्य करणार्‍या देवा, तू आपले तेज प्रकट कर.

² हे पृथ्वीच्या न्यायाधीशा, ऊठ; गर्विष्ठांना त्यांचे प्रतिफल दे.

³ हे परमेश्वरा, दुर्जन कोठवर ― दुर्जन कोठवर जयोत्सव करतील?

⁴ ते बडबड करतात, उद्धटपणे बोलतात, सर्व दुष्कर्मी फुशारकी मारतात;

⁵ हे परमेश्वरा, ते तुझ्या लोकांचा चुराडा करतात, तुझ्या वतनाला पिडतात.

⁶ ते विधवा व उपरे ह्यांचा जीव घेतात, अनाथांना ठार मारतात.

⁷ ते म्हणतात, “परमेश पाहत नाही, याकोबाचा देव लक्ष देत नाही.”

⁸ अहो पशुतुल्य लोकहो, लक्ष द्या; मूर्खांनो, तुम्ही कधी शहाणे व्हाल?

⁹ ज्याने कान घडवला तो ऐकणार नाही काय? ज्याने डोळा बनवला तो पाहणार नाही काय?

¹⁰ जो राष्ट्रांचा शास्ता, मानवांचा ज्ञानदाता, तो शासन करणार नाही काय?

¹¹ मानवाचे विचार वायफळ आहेत हे परमेश्वर जाणतो.

¹² हे परमेशा, ज्या मनुष्याला तू शिस्त लावतोस, ज्याला तू आपल्या नियमशास्त्रातून शिकवतोस तो धन्य;

¹³ त्याला तू विपत्काली आराम देशील, तोपर्यंत दुर्जनाकरिता खांच खणली जाईल.

¹⁴ कारण परमेश्वर आपल्या लोकांचा त्याग करणार नाही; तो आपले वतन सोडून देणार नाही.

¹⁵ न्याय नीतिमानाकडे वळेल आणि सरळ मनाचे सर्व जन तो अनुसरतील.

¹⁶ माझ्यासाठी दुष्कर्म्यांविरुद्ध कोण उठेल? अनीती करणार्‍यांविरुद्ध माझ्यासाठी कोण उभा राहील?

¹⁷ परमेश्वर मला साहाय्य झाला नसता तर माझ्या जिवाची वस्ती नि:शब्दस्थानी केव्हाच झाली असती.

¹⁸ “माझा पाय घसरला,” असे मी म्हणालो, तेव्हा हे परमेश्वरा, तुझ्या दयेने मला आधार दिला.

¹⁹ माझे मन अनेक चिंतांनी व्यग्र होते तेव्हा तुझ्यापासून लाभणारे सांत्वन माझ्या जिवाचे समाधान करते.

²⁰ न्याय करण्याच्या मिषाने, उपद्रव योजून अन्याय करणार्‍या न्यायासनाचा तुझ्याशी काही संबंध असेल काय?

²¹ ते नीतिमानाच्या जिवावर घाला घालतात, ते निर्दोष्यांस देहान्त शिक्षा देतात;

²² पण परमेश्वर मला उंच गडासारखा आहे; माझा देव मला आश्रयाचा दुर्ग आहे.

²³ तो त्यांची अनीती त्यांच्यावरच उलटवील; त्यांच्या दुष्टपणामुळे तो त्यांना नाहीसे करील; आमचा देव परमेश्वर त्यांना नाहीसे करील.