स्तोत्रसंहिता 83 - पवित्र शास्त्र RV (Re-edited) Bible (BSI)

इस्राएलाच्या शत्रूंच्या नाशासाठी प्रार्थना

एक गीत; आसाफाचे संगीतस्तोत्र.

¹ हे देवा, तू स्तब्ध राहू नकोस. हे देवा, मौन धरू नकोस, स्वस्थ राहू नकोस.

² कारण पाहा, तुझे शत्रू दंगल करीत आहेत; तुझ्या द्वेष्ट्यांनी डोके वर काढले आहे.

³ ते तुझ्या लोकांविरुद्ध कपटाची योजना करतात; तुझ्या आश्रितांविरुद्ध ते मसलत करतात.

⁴ ते म्हणतात, “चला, आपण त्यांचा असा विध्वंस करू की, ते राष्ट्र म्हणून राहणार नाहीत; म्हणजे इस्राएलाच्या नावाची आठवण पुढे राहणार नाही.”

⁵ कारण त्यांनी एकचित्ताने मसलत केली आहे, ते तुझ्याविरुद्ध कट करतात;

⁶ तंबूंत राहणारे अदोमी व इश्माएली, मवाबी व हगारी,

⁷ गबाल, अम्मोन व अमालेक, पलेशेथ व सोरकर हे ते आहेत;

⁸ अश्शूरही त्यांना सामील झाला आहे; त्यांनी लोटाच्या वंशजांना हात दिला आहे. (सेला)

⁹ मिद्यानाला आणि सीसरा व याबीन ह्यांना कीशोन नदीजवळ तू जसे केलेस, तसे त्यांना कर;

¹⁰ ते एन-दोर येथे नाश पावले; ते शेताला खत झाले.

¹¹ ओरेब व जेब ह्यांच्यासारखे त्यांच्या सरदारांना कर. जेबह व सलमुन्ना ह्यांच्यासारखे त्यांच्या सर्व अमिरांना कर.

¹² ते म्हणतात, “देवाची निवासस्थाने2 आपल्या ताब्यात घेऊ या.”

¹³ हे माझ्या देवा, वावटळीच्या धुरळ्यासारखे, वार्‍याने उडवलेल्या भुसासारखे त्यांना कर.

¹⁴ अग्नी वनाला भस्म करतो, ज्वाला डोंगराला आग लावते,

¹⁵ त्याप्रमाणे तू आपल्या वादळाने त्यांचा पाठलाग कर व आपल्या तुफानाने त्यांना घाबरून सोड.

¹⁶ हे परमेश्वरा, त्यांनी तुझ्या नावाचा शोध करावा म्हणून त्यांची मुखे अगदी लज्जित कर.

¹⁷ ते सदासर्वकाळ फजीत व भयभीत होवोत; ते लज्जित होवोत, ते नष्ट होवोत;

¹⁸ म्हणजे तू, केवळ तूच, परमेश्वर3 ह्या नावाने सर्व पृथ्वीवर परात्पर आहेस असे त्यांना कळू दे.