स्तोत्रसंहिता 81 - पवित्र शास्त्र RV (Re-edited) Bible (BSI)

देवाचा चांगुलपणा व इस्राएलाचा बंडखोरपणा

मुख्य गवयासाठी; गित्ती चालीवर गायचे आसाफाचे स्तोत्र.

¹ देव जो आमचे सामर्थ्य, त्याचे मोठ्याने गुणगान करा; याकोबाच्या देवाचा जयजयकार करा.

² सुरावर गीत म्हणा, आणि खंजिरी वाजवा; मंजुळ वीणा व सतार वाजवा.

³ शुक्ल प्रतिपदेस, पौर्णिमेस, आमच्या सणाच्या दिवशी कर्णा वाजवा.

⁴ कारण हा इस्राएलासाठी नियम आहे; हा याकोबाच्या देवाचा निर्बंध आहे.

⁵ तो मिसर देशावरून गेला, तेव्हा त्याने योसेफवंशात हाच निर्बंध साक्षीसाठी नेमला; ज्याला मी ओळखले नव्हते त्याचे भाषण मी ऐकले; ते असे की,

⁶ “मी त्याच्या खांद्यावरील भार काढला आहे; त्याच्या हातांतला हारा दूर केला आहे.

⁷ तू संकटात असता आरोळी केली तेव्हा मी तुला सोडवले; मी तुला मेघगर्जनेच्या गुप्त स्थलातून उत्तर दिले; मरीबाच्या जलांजवळ मी तुला पारखले. (सेला)

⁸ अहो माझ्या लोकांनो, ऐका, मी तुम्हांला बोध करतो; हे इस्राएला, तू माझे ऐकशील तर बरे होईल!

⁹ तुला अन्य देव नसावा, तू परक्या देवाच्या पाया पडू नये.

¹⁰ मीच तुझा देव परमेश्वर आहे, मीच तुला मिसर देशातून बाहेर काढले, तू आपले तोंड चांगले उघड म्हणजे मी ते भरीन;

¹¹ परंतु माझ्या लोकांनी माझी वाणी ऐकली नाही; इस्राएलाने माझे ऐकले नाही.

¹² ह्यामुळे मी त्यांना त्यांच्या हृदयाच्या दुराग्रहाप्रमाणे वागू दिले; ते आपल्याच संकल्पाप्रमाणे चालले.

¹³ माझे लोक माझे ऐकतील, इस्राएल माझ्या मार्गांनी चालेल, तर बरे होईल!

¹⁴ मी तेव्हाच त्यांच्या वैर्‍यांचा मोड करीन, त्यांच्या शत्रूंवर मी आपला हात चालवीन;

¹⁵ परमेश्वराचे द्वेष्टे त्याला वश होतील, आणि ते सतत धाकात राहतील2

¹⁶ मी त्याला गव्हाचे सत्त्व खाऊ घालीन आणि पहाडातल्या मधाने मी तुला तृप्त करीन.”