स्तोत्रसंहिता 8 - पवित्र शास्त्र RV (Re-edited) Bible (BSI)

देवाचा गौरव आणि मानवाची थोरवी

मुख्य गवयासाठी; गित्ती चालीवर गायचे दाविदाचे स्तोत्र.

¹ हे परमेश्वरा, आमच्या प्रभो, सर्व पृथ्वीवर तुझे नाव किती थोर आहे! तू आपले वैभव आकाशभर पसरले आहेस.

² तू बाळके व तान्हुली ह्यांच्या मुखाने सामर्थ्य स्थापित केले आहे; तुला विरोधी आहेत म्हणून आणि वैरी व सूड घेणारा ह्यांना कुंठित करावे म्हणून तू असे केले आहेस.

³ आकाश जे तुझे अंगुलीकार्य, व त्यात तू नेमलेले चंद्र व तारे ह्यांच्याकडे पाहावे तर ―

⁴ मर्त्य मनुष्य तो काय की तू त्याची आठवण करावी? मानव तो काय की तू त्याला दर्शन द्यावे?

⁵ तू त्याला देवापेक्षा1 किंचित कमी असे केले आहेस; त्याला गौरव व थोरवी ह्यांनी मुकुटमंडित केले आहेस.

⁶ तू त्याला आपल्या हातच्या कृत्यांवरचे प्रभुत्व दिले आहेस, तू सर्वकाही त्याच्या पायांखाली ठेवले आहेस.

⁷ शेरडेमेंढरे, गुरेढोरे ही सारी, तसेच वनपशू;

⁸ आकाशातील पाखरे, समुद्रातील मासे व जलात संचार करणारे सर्व प्राणी.

⁹ हे परमेश्वरा, आमच्या प्रभो, सर्व पृथ्वीवर तुझे नाव किती थोर आहे!