स्तोत्रसंहिता 76 - पवित्र शास्त्र RV (Re-edited) Bible (BSI)

विजयी व न्यायी देव

मुख्य गवयासाठी; तंतुवाद्यांच्या साथीने गायचे आसाफाचे संगीतस्तोत्र.

¹ यहूदात देव प्रकट झाला आहे; इस्राएलात त्याचे नाव थोर आहे.

² शालेमात त्याचा मंडप आहे; व सीयोनेत त्याचे निवासस्थान आहे.

³ तेथे धनुष्याचे बाण, ढाल, तरवार व युद्धसामग्री त्याने मोडून टाकली. (सेला)

⁴ तू प्रतापी आहेस, लुटीने भरलेल्या पर्वतावर तेजस्वी आहेस.

⁵ कणखर मनाच्या पुरुषांची लूटमार झाली आहे; ते झोपी गेले आहेत; त्यांतील कोणाही बलवानाचे हात चालेनात.

⁶ हे याकोबाच्या देवा, तुझ्या धमकीने रथ व घोडा ह्यांना गाढ निद्रा लागली आहे.

⁷ तुझे, केवळ तुझेच, भय धरले पाहिजे; तुला एकदा क्रोध आला म्हणजे तुझ्यापुढे कोण उभा राहील?

⁸ तू स्वर्गातून आपला निर्णय ऐकवला; तेव्हा पृथ्वी भ्याली व स्तब्ध झाली;

⁹ पृथ्वीवरील सर्व दीनांस तारण्यासाठी, न्यायनिवाडा करण्यासाठी देव उठला, तेव्हा असे झाले. (सेला)

¹⁰ कारण मनुष्याचा क्रोध तुझ्या स्तुतीचे साधन असा होतो; अवशिष्ट क्रोधाने तू आपली कंबर बांधतोस.

¹¹ परमेश्वर तुमचा देव ह्याला नवस करा व ते फेडा; ज्याचे भय धरले पाहिजे त्याला त्याच्या सभोवतालच्या सर्वांनी नजराणे आणावेत.

¹² अधिपतींची हिंमत तो नष्ट करतो; पृथ्वीवरील राजांना तो भयप्रद आहे.