स्तोत्रसंहिता 66 - पवित्र शास्त्र RV (Re-edited) Bible (BSI)

देवाच्या महत्कृत्यांबद्दल उपकारस्तुती

मुख्य गवयासाठी; संगीतस्तोत्र.

¹ अहो पृथ्वीवरील सर्व लोकहो, देवाचा जयजयकार करा.

² त्याच्या नावाचा महिमा गा, त्याची गौरवयुक्त स्तुती करा.

³ देवाला म्हणा, “तुझी कृत्ये किती भयप्रद आहेत, तुझ्या महाबळामुळे तुझे वैरी तुझ्या अधीन होतात.

⁴ सर्व पृथ्वीवरील लोक तुला नमतील व तुझी स्तोत्रे गातील; तुझ्या नावाची स्तोत्रे गातील.” (सेला)

⁵ अहो या, देवाची कृत्ये पाहा; तो आपल्या कृतींनी मानवजातीस धाक बसवतो.

⁶ त्याने समुद्राची कोरडी भूमी केली; ते नदीतून पायी पार गेले, तेव्हा आम्ही त्याच्या ठायी हर्ष पावलो.

⁷ तो आपल्या सामर्थ्याने सर्वकाळ सत्ता चालवतो, त्याचे नेत्र राष्ट्रांना निरखून पाहतात; बंडखोरांनी आपली मान ताठ करू नये. (सेला)

⁸ अहो लोकांनो, आमच्या देवाचा धन्यवाद करा, त्याच्या स्तुतीचा घोष ऐकू येईल असा करा;

⁹ त्यानेच आमच्या प्राणाचे रक्षण केले, त्याने आमचे पाय ढळू दिले नाहीत.

¹⁰ कारण हे देवा, तू आम्हांला पारखले आहेस; रुपे गाळतात तसे तू आम्हांला गाळून पाहिले आहेस.

¹¹ तू आम्हांला जाळ्यांत गुंतवले; तू आमच्या कंबरेला भारी ओझे बांधले.

¹² तू मनुष्यांना आमच्या डोक्यांवरून स्वारी करायला लावले; आम्ही अग्नीत व पाण्यात सापडलो, तरी तू आम्हांला बाहेर काढून समृद्ध स्थळी आणलेस.

¹³ मी होमार्पणे घेऊन तुझ्या मंदिरात येईन, तुला केलेले नवस फेडीन;

¹⁴ संकटात असता ते मी आपल्या ओठांनी उच्चारले; मी ते आपल्या तोंडाने केले.

¹⁵ मेंढ्यांच्या धूपासहित पुष्ट पशूंचे होम मी तुला अर्पण करीन; बोकडांसह मी गोर्‍हे अर्पण करीन. (सेला)

¹⁶ अहो देवाचे भय धरणारे सर्व जनहो, तुम्ही या, ऐका; त्याने माझ्या जिवासाठी जे केले आहे ते मी सांगतो.

¹⁷ मी आपल्या मुखाने त्याचा धावा केला, माझ्या जिभेवर त्याचे स्तवन होते.

¹⁸ माझ्या मनात दुष्कर्माचा विचार असता तर प्रभू माझे न ऐकता;

¹⁹ पण देवाने ऐकलेच आहे; माझ्या प्रार्थनेच्या वाणीकडे त्याने लक्ष दिले आहे.

²⁰ देवाचा धन्यवाद होवो, त्याने माझी प्रार्थना अवमानली नाही, त्याने आपली माझ्यावरची दया काढून घेतली नाही.