स्तोत्रसंहिता 64 - पवित्र शास्त्र RV (Re-edited) Bible (BSI)

गुप्त शत्रूंपासून बचाव व्हावा म्हणून प्रार्थना

मुख्य गवयासाठी; दाविदाचे स्तोत्र.

¹ हे देवा, माझी काकुळतीची वाणी ऐक; वैर्‍याच्या भयापासून माझ्या जिवाचे रक्षण कर.

² दुष्टांच्या कटापासून, दुष्कर्म्यांच्या गुप्त मसलतीपासून मला लपव.

³ त्यांनी आपली जीभ तलवारीसारखी पाजळली आहे; सात्त्विकाला एकान्तात मारावे म्हणून त्यांनी तीरासारखा आपल्या कटु शब्दांचा नेम धरला आहे.

⁴ ते त्याच्यावर अकस्मात मारा करतात; ते भीत नाहीत.

⁵ ते आपला दुष्ट संकल्प दृढ करतात; पाश गुप्तपणे मांडण्याविषयी ते कुजबुज करतात; “आम्हांला कोण पाहणार?” असे ते म्हणतात.

⁶ ते कुटिल युक्त्या शोधून काढतात; ते म्हणतात, “आपण चतुराईने युक्ती शोधून काढली आहे;” प्रत्येकाचे अंतर्याम व हृदय खोल आहे,

⁷ तरी देव त्यांच्यावर तीर सोडील; ते अकस्मात घायाळ होतील.

⁸ त्यांचीच जीभ त्यांना प्रतिकूल होऊन ते अडखळून पडतील; त्यांना पाहणारे सर्व जण डोके हलवतील.

⁹ तेव्हा मानवजातीस धाक बसेल; ते देवाची कृती वाखाणतील व त्याच्या कृतीचा नीट विचार करतील.

¹⁰ परमेश्वराच्या ठायी नीतिमान मनुष्य हर्ष पावेल व त्याचा आश्रय करील; सरळ अंतःकरणाचे सर्व जन उल्लास पावतील.