स्तोत्रसंहिता 61 - पवित्र शास्त्र RV (Re-edited) Bible (BSI)

देवाच्या संरक्षणावर भरवसा

मुख्य गवयासाठी; तंतुवाद्याच्या साथीने गायचे दाविदाचे स्तोत्र.

¹ हे देवा, माझा धावा ऐक; माझ्या प्रार्थनेकडे लक्ष दे.

² माझे मन व्याकूळ झाले असता दिगंतापासूनही मी तुझा धावा करतो; जो खडक मला दुर्गम आहे त्यावर मला ने.

³ कारण तू माझा आश्रय, वैर्‍यापासून लपण्यास बळकट दुर्ग असा होत आला आहेस.

⁴ तुझ्या मंडपात मी सर्वकाळ राहीन; मी तुझ्या पंखांच्या छायेचा आश्रय घेईन. (सेला)

⁵ कारण, हे देवा, तू माझी नवसाची प्रार्थना ऐकली आहेस; तुझ्या नावाचे भय धरणार्‍यांचे वतन तू मला दिले आहेस;

⁶ तू राजाला दीर्घायू कर; त्याच्या आयुष्याची वर्षें कैक पिढ्यांच्या वर्षांइतकी होवोत.

⁷ तो देवासमोर चिरकाल राहो; तुझे वात्सल्य व सत्य त्याचे रक्षण करतील असे कर;

⁸ म्हणजे तुझ्या नावाची स्तोत्रे निरंतर गाऊन मी आपले नवस नित्य फेडत राहीन.