स्तोत्रसंहिता 48 - पवित्र शास्त्र RV (Re-edited) Bible (BSI)

सीयोनेचे सौंदर्य व वैभव

कोरहाच्या मुलांचे संगीतस्तोत्र.

¹ परमेश्वर थोर आहे, आमच्या देवाच्या नगरात, त्याच्या पवित्र डोंगरावर, तो स्तुतीस अत्यंत पात्र आहे.

² उत्तर सीमेवरील सीयोन डोंगर, राजाधिराजाचे नगर, उच्चतेमुळे सुंदर व सर्व पृथ्वीचा आनंद आहे.

³ देव त्याच्या प्रासादांमध्ये आश्रयदुर्ग असा प्रकट झाला आहे.

⁴ कारण पाहा, राजे एकत्र झाले व एकजुटीने चढाई करून आले.

⁵ हे नगर पाहताच ते विस्मित झाले, व घाबरे होऊन पळत सुटले.

⁶ तेथे त्यांना कंप सुटला; त्यांना प्रसूतिवेदनांप्रमाणे वेदना झाल्या

⁷ पूर्वेच्या वार्‍याने तार्शीशची गलबते तू फोडतोस.

⁸ जे आम्ही ऐकले ते सेनाधीश परमेश्वराच्या नगरात, आमच्या देवाच्या नगरात पाहिले; ते हे की, देव सर्वकाळ ते स्थिर राखील. (सेला)

⁹ हे देवा, तुझ्या मंदिरात आम्ही तुझ्या वात्सल्याचे चिंतन केले.

¹⁰ हे देवा, जसे तुझे नाव, तशी तुझी कीर्ती पृथ्वीच्या शेवटापर्यंत जात आहे; तुझा उजवा हात न्यायपूर्ण आहे;

¹¹ तुझ्या न्यायकृत्यांमुळे सीयोन डोंगर आनंद पावो; यहूदाच्या कन्या उल्लासोत.

¹² सीयोनेसभोवती फिरा, तिला फेरा घाला; तिचे बुरूज मोजा;

¹³ तिच्या कोटांकडे लक्ष द्या, तिच्या प्रासादांमधून फिरा, म्हणजे पुढील पिढीला तिच्याविषयी तुम्हांला सांगता येईल.

¹⁴ कारण हा देव आमचा सनातन देव आहे; तो सर्वकाळ आमचा मार्गदर्शक होईल.