स्तोत्रसंहिता 33 - पवित्र शास्त्र RV (Re-edited) Bible (BSI)

उत्पन्नकर्त्याची व संरक्षकाची महती

¹ अहो नीतिमानांनो, परमेश्वराचा जयजयकार करा; सरळ माणसांना स्तुतिगान शोभते.

² वीणेवर परमेश्वराचे उपकारस्मरण करा; दशतंतू वाद्यावर त्याचे गुणगान गा.

³ त्याच्यापुढे नवे गीत गा; जयघोष करीत कुशलतेने वाद्ये वाजवा;

⁴ कारण परमेश्वराचे वचन सरळ आहे; त्याची सर्व कृती सत्याची आहे.

⁵ त्याला नीती व न्याय ही प्रिय आहेत; परमेश्वराच्या वात्सल्याने पृथ्वी भरली आहे.

⁶ परमेश्वराच्या शब्दाने आकाश निर्माण झाले; त्याच्या मुखश्वासाने आकाशातील सर्व सैन्य निर्माण झाले.

⁷ तो समुद्राची जले राशीसारखी एकवट करतो; महासागराचे निधी साठवतो.

⁸ अखिल पृथ्वी परमेश्वराचे भय धरो; जगात राहणारे सर्व त्याचा धाक बाळगोत.

⁹ कारण तो बोलला आणि अवघे झाले; त्याने आज्ञा केली आणि सर्वकाही स्थिर झाले.

¹⁰ राष्ट्रांच्या मसलती परमेश्वर निरर्थक करतो; लोकांचे संकल्प निष्फळ करतो.

¹¹ परमेश्वराची योजना सर्वकाळ टिकते; त्याच्या मनातील संकल्प पिढ्यानपिढ्या कायम राहतात.

¹² ज्या राष्ट्रांचा देव परमेश्वर आहे ज्या लोकांना त्याने आपल्या वतनाकरता प्रजा म्हणून निवडले आहे, ते धन्य!

¹³ परमेश्वर आकाशातून पाहतो; सर्व मानवजातीला तो निरखतो.

¹⁴ तो आपल्या निवासस्थानातून पृथ्वीवर राहणार्‍या सर्वांना न्याहाळून पाहतो.

¹⁵ त्या सर्वांची हृदये घडणारा व त्यांची सर्व कामे जाणणारा तो आहे.

¹⁶ कोणीही राजा मोठ्या सैन्यबलाने जय पावतो असे नाही; वीरपुरुष आपल्या पराक्रमाने निभावतो असे नाही.

¹⁷ जयप्राप्तीसाठी घोडा केवळ व्यर्थ होय; त्याला आपल्या महाबळाने कोणाचा बचाव करता येणार नाही.

¹⁸ पाहा, जे परमेश्वराचे भय धरतात व त्याच्या दयेची अपेक्षा करतात,

¹⁹ त्यांचा जीव मृत्यूपासून सोडवावा व दुष्काळात त्यांचा प्राण वाचवावा म्हणून त्यांच्यावर त्याची नजर असते.

²⁰ आमचा जीव परमेश्वराची प्रतीक्षा करीत आहे; आमचे साहाय्य व ढाल तोच आहे.

²¹ त्याच्या ठायी आमच्या हृदयाला आनंद आहे, कारण त्याच्या पवित्र नावावर आमची श्रद्धा आहे.

²² हे परमेश्वरा, आम्ही तुझी आशा धरली आहे. म्हणून आमच्यावर तुझी कृपादृष्टी असो.