स्तोत्रसंहिता 26 - पवित्र शास्त्र RV (Re-edited) Bible (BSI)

सात्त्विकतेचा दावा

दाविदाचे स्तोत्र.

¹ हे परमेश्वरा, माझा न्याय कर, कारण मी सात्त्विकपणे वागलो आहे, आणि परमेश्वरावर भरवसा ठेवला आहे; मी घसरणार नाही.

² हे परमेश्वरा, मला कसास लाव, माझी पारख कर; माझे अंतर्याम व माझे हृदय पडताळून पाहा.

³ तुझे वात्सल्य माझ्या दृष्टीपुढे आहे; तुझ्या सत्यमार्गाने मी चाललो आहे.

⁴ अधम लोकांत मी बसलो नाही; कपटी लोकांची संगत मी धरणार नाही.

⁵ दुष्कर्म्यांच्या सभेचा मी द्वेष करतो; दुर्जनांबरोबर मी बसणार नाही.

⁶ हे परमेश्वरा, मी निर्दोषतेने आपले हात धुईन आणि तुझ्या वेदीला फेरा घालीन;

⁷ म्हणजे मी प्रकटपणे तुझे उपकारस्मरण करीन व तुझी सर्व आश्‍चर्यकर्मे वर्णन करीन.

⁸ हे परमेश्वरा, तुझे वसतिस्थान, तुझ्या गौरवाचे निवासस्थान ही मला प्रिय आहेत.

⁹ पातक्यांबरोबर माझा जीव आणि पातकी मनुष्यांबरोबर माझा प्राण काढून नेऊ नकोस;

¹⁰ त्यांचे हात उपद्रवाने भरलेले आहेत, त्यांचा उजवा हात लाचलुचपतींनी भरलेला आहे.

¹¹ मी तर सात्त्विकपणे वागेन; माझा उद्धार कर, माझ्यावर दया कर.

¹² माझा पाय प्रशस्त स्थळी स्थिर आहे; जनसभांत मी परमेश्वराचा धन्यवाद करीन.