स्तोत्रसंहिता 20 - पवित्र शास्त्र RV (Re-edited) Bible (BSI)

विजयासाठी प्रार्थना

मुख्य गवयासाठी; दाविदाचे स्तोत्र.

¹ संकटाच्या दिवशी परमेश्वर तुझे ऐको; याकोबाच्या देवाचे नाव तुला उच्चपदी प्रस्थापित करो;

² पवित्रस्थानातून तो तुला साहाय्य पाठवो, सीयोनेतून तो तुला आधार देवो;

³ तो तुझ्या सर्व अन्नार्पणांचे स्मरण ठेवो, तुझे होमार्पण त्याला मान्य होवो;

⁴ तुझे मनोरथ तो पूर्ण करो, तुझे सर्व संकल्प सिद्धीस नेवो.

⁵ तुला मिळालेल्या तारणामुळे आम्ही उत्सव करू; आमच्या देवाच्या नावाचा ध्वज उभारू; तुझ्या सर्व मागण्या परमेश्वर पूर्ण करो.

⁶ परमेश्वर आपल्या अभिषिक्ताला तारतो, हे मला आता कळून आले; तो आपल्या उजव्या हाताच्या उद्धारक प्रतापाची कृत्ये करून आपल्या पवित्र स्वर्गातून त्याचे ऐकेल.

⁷ कोणी रथाची व कोणी घोड्यांची बढाई मारतात; आम्ही तर आमचा देव परमेश्वर ह्याच्या नावाची प्रशंसा करू.

⁸ ते वाकून खाली पडले आहेत; आम्ही तर उठून ताठ उभे आहोत.

⁹ हे परमेश्वरा, तारण कर. आम्ही धावा करतो तेव्हा राजाने आमचे ऐकावे.