स्तोत्रसंहिता 147 - पवित्र शास्त्र RV (Re-edited) Bible (BSI)

यरुशलेमेवर केलेल्या कृपेबद्दल परमेश्वराची स्तुती

¹ परमेशाचे स्तवन करा,1 कारण आमच्या देवाची स्तोत्रे गाणे चांगले आहे, मनोरम आहे, आणि स्तोत्रे गाणे शुभच आहे.

² परमेश्वर यरुशलेम पुन्हा बांधून वसवतो; इस्राएलातील पांगलेल्यांना तो एकत्र करतो.

³ भग्नहृदयी जनांना तो बरे करतो; तो त्यांच्या जखमांना पट्ट्या बांधतो.

⁴ तो तार्‍यांची गणती करतो; तो त्या सर्वांना त्यांची-त्यांची नावे देतो.

⁵ आमचा प्रभू थोर व महासमर्थ आहे; त्याची बुद्धी अमर्याद आहे.

⁶ परमेश्वर लीनांना आधार देतो; तो दुर्जनांना धुळीस मिळवतो.

⁷ तुम्ही परमेश्वराचे उपकारस्मरण करून त्याची कीर्ती वर्णा; वीणेवर आमच्या देवाची स्तोत्रे गा.

⁸ तो मेघांनी आकाश आच्छादतो; तो भूमीसाठी पर्जन्य तयार करतो, डोंगरांवर गवत रुजवतो.

⁹ तो पशूंना व कावळ्यांच्या कावकाव करणार्‍या पिलांना त्यांचे अन्न देतो.

¹⁰ तो घोड्याच्या बलाने आनंदित होत नाही, मनुष्याच्या पायांनी संतोष पावत नाही.

¹¹ जे परमेश्वराचे भय धरतात, जे त्याच्या दयेची प्रतीक्षा करतात त्यांच्यावर तो संतुष्ट होतो.

¹² हे यरुशलेमे, परमेश्वराचा गौरव कर; हे सीयोने, तू आपल्या देवाचे स्तवन कर.

¹³ कारण त्याने तुझ्या वेशींचे अडसर बळकट केले आहेत; त्याने तुझ्या ठायी तुझ्या मुलांना आशीर्वाद दिला आहे.

¹⁴ तो तुझ्या सीमांच्या आत शांतता पसरतो; उत्कृष्ट गव्हाने तुला तृप्त करतो;

¹⁵ तो आपली आज्ञा पृथ्वीवर पाठवतो; त्याचा शब्द फार वेगाने धावतो.

¹⁶ तो लोकरीसारखे हिम पाडतो; राखेसारखे दवाचे कण पसरतो.

¹⁷ तो आपल्या बर्फाचा चुर्‍याप्रमाणे वर्षाव करतो. त्याच्या गारठ्यापुढे कोण टिकेल?

¹⁸ तो आपला हुकूम पाठवून ते वितळवतो; तो आपला वारा वाहवतो तेव्हा पाणी वाहू लागते.

¹⁹ तो याकोबाला आपले वचन, इस्राएलाला आपले नियम व निर्णय विदित करतो.

²⁰ कोणत्याही राष्ट्राबरोबर त्याने असे वर्तन केले नाही; त्याचे निर्णय ती जाणत नाहीत. परमेशाचे स्तवन करा!1