स्तोत्रसंहिता 136 - पवित्र शास्त्र RV (Re-edited) Bible (BSI)

परमेश्वराच्या अखंड प्रेमाबद्दल उपकारस्तुती

¹ परमेश्वराचे उपकारस्मरण करा, कारण तो चांगला आहे; कारण त्याची दया सनातन आहे.

² देवाधिदेवाचे उपकारस्मरण करा; कारण त्याची दया सनातन आहे.

³ प्रभूंच्या प्रभूचे उपकारस्मरण करा; कारण त्याची दया सनातन आहे.

⁴ जो एकटाच मोठी अद्भुत कृत्ये करतो त्याचे; कारण त्याची दया सनातन आहे.

⁵ ज्याने बुद्धिचातुर्याने आकाश केले त्याचे; कारण त्याची दया सनातन आहे.

⁶ ज्याने पृथ्वी जलांवर विस्तारली त्याचे; कारण त्याची दया सनातन आहे.

⁷ ज्याने मोठमोठ्या ज्योती निर्माण केल्या त्याचे; कारण त्याची दया सनातन आहे.

⁸ ज्याने दिवसावर प्रभुत्व चालवण्यासाठी सूर्य निर्माण केला त्याचे; कारण त्याची दया सनातन आहे.

⁹ ज्याने रात्रीवर प्रभुत्व चालवण्यासाठी चंद्र व तारे निर्माण केले त्याचे; कारण त्याची दया सनातन आहे.

¹⁰ ज्याने मिसर देशातील प्रथमजन्मलेले मारून टाकले त्याचे; कारण त्याची दया सनातन आहे.

¹¹ ज्याने मिसरी लोकांतून इस्राएल लोकांना बाहेर आणले त्याचे; कारण त्याची दया सनातन आहे.

¹² ज्याने प्रतापी हाताने व पुढे केलेल्या बाहूने त्यांना बाहेर आणले त्याचे; कारण त्याची दया सनातन आहे.

¹³ ज्याने तांबडा समुद्र दुभागला त्याचे; कारण त्याची दया सनातन आहे.

¹⁴ ज्याने इस्राएलास त्यामधून पार नेले त्याचे; कारण त्याची दया सनातन आहे.

¹⁵ ज्याने फारोला व त्याच्या सैन्याला तांबड्या समुद्रात गडप केले त्याचे; कारण त्याची दया सनातन आहे.

¹⁶ ज्याने आपल्या लोकांना रानातून नेले त्याचे; कारण त्याची दया सनातन आहे.

¹⁷ ज्याने मोठेमोठे राजे मारून टाकले त्याचे; कारण त्याची दया सनातन आहे.

¹⁸ ज्याने प्रतापी राजे ठार केले त्याचे; कारण त्याची दया सनातन आहे.

¹⁹ ज्याने अमोर्‍यांचा राजा सीहोन ह्याला ठार मारले त्याचे; कारण त्याची दया सनातन आहे.

²⁰ ज्याने बाशानाचा राजा ओग ह्याला ठार मारले त्याचे; कारण त्याची दया सनातन आहे.

²¹ ज्याने त्यांचा देश वतन करून दिला त्याचे; कारण त्याची दया सनातन आहे.

²² ज्याने आपला सेवक इस्राएल ह्याला तो वतन करून दिला त्याचे; कारण त्याची दया सनातन आहे.

²³ ज्याने आमच्या दैन्यावस्थेत आमची आठवण केली त्याचे; कारण त्याची दया सनातन आहे.

²⁴ ज्याने आम्हांला आमच्या शत्रूंपासून सोडवले त्याचे; कारण त्याची दया सनातन आहे.

²⁵ जो सर्व प्राण्यांना अन्न देतो त्याचे; कारण त्याची दया सनातन आहे.

²⁶ स्वर्गातील देवाचे उपकारस्मरण करा; कारण त्याची दया सनातन आहे.